যোৰহাট জিলাৰ পূব প্ৰান্তৰ ঐতিহাসিক ঢেকীয়াখোৱা বৰনামঘৰত আজি মংগলবাৰে আছুৰ সাধাৰণ সম্পাদক শংকৰজ্যোতি বৰুৱা উপস্থিত হৈ বন্তি জ্বলাই ৰাজ্যবাসীৰ কুশলৰ বাবে নেদেখাজনৰ চৰণত সেৱা আগবঢ়ায়।
তেওঁ লগতে যোৱা বুধবাৰে যোৰহাটৰ নিমাতিঘাটত সংঘটিত হোৱা মৰ্মান্তিক নাও দুৰ্ঘটনাত আহত নিহতসকলৰ আত্মাৰ সদগতি তথা আশু আৰোগ্যৰ বাবে প্ৰাৰ্থনা কৰে।
আছু নেতাগৰাকীয়ে দুৰ্ঘটনাৰ বাবে সম্পূৰ্ণ বিভাগীয় মন্ত্ৰী-বিষয়াক দোষাৰোপ কৰি বিভাগীয় মন্ত্ৰী চন্দ্ৰমোহন পাটোৱাৰীক তীব্ৰ সমালোচনা কৰাৰ লগতে অনতি পলমে উক্ত ঘটনাৰ উচিত তদন্ত কৰি ব্যৰ্থ মন্ত্ৰীগৰাকীক মন্ত্ৰীসভাৰ পৰা অপসাৰণ কৰিবলৈ ৰাজ্যৰ মুখ্যমন্ত্ৰীলৈ আহ্বান জনায়।
উল্লেখযোগ্য যে যোৱা বৃহস্পতিবাৰে ৰাজ্যৰ মুখ্যমন্ত্ৰীগৰাকী নিমাতিঘাটত উপস্থিত হৈ একক ইঞ্জিন চালিত নাও যাতায়াতৰ ক্ষেত্ৰত নিষেধাজ্ঞা জাৰি কৰিছিল যদিও উক্ত দিনাই বিয়লিভাগলৈ আছুৰ সাধাৰণ সম্পাদকগৰাকীসহ এক সজাতি দল একক ইঞ্জিন চালিত নাৱেৰে নিমাতিঘাটৰ পৰা মাজুলীলৈ যাত্ৰা কৰাক লৈ এক বিতৰ্কৰ সুত্ৰপাত হৈছিল।
এই ঘটনাৰ সন্দৰ্ভত সাংবাদিকে কৰা প্ৰশ্নৰ উত্তৰত সম্পাদকগৰাকীয়ে উক্ত বিতৰ্কটো দুৰ্ভাগ্যজনক আখ্যা দি দুখৰ সময়ত ৰাইজৰ দুখৰ সমভাগী হৈ সহায়ৰ হাত আগবঢ়াটোহে শ্ৰেয় বুলি মন্তব্য কৰে।