সদৌ অসম ছাত্ৰ সন্থাই চলিত লকডাউনৰ মাজত অসম চৰকাৰে পেট্ৰ’ল-ডিজেলৰ মূল্যবৃদ্ধিৰ বাবে লোৱা সিদ্ধান্তৰ তীব্ৰ বিৰোধিতা কৰিছে।
ছাত্ৰ সন্থাই এই সিদ্ধান্তক অবিবেচকী বুলি অভিহিত কৰি ইয়াক প্ৰত্যাহাৰ কৰিবলৈ দাবী জনাইছে।
সংগঠনটোৱে কয় জনসাধাৰণে অৰ্থনৈতিকভাৱে অসুবিধাৰ সন্মুখীন হ’লেও কৰ’না ভাইৰাছৰ বিৰুদ্ধে যুঁজিবলৈ চৰকাৰৰ লকডাউনৰ সকলো সিদ্ধান্ত ঐক্যবদ্ধভাৱে কাৰ্য্যকৰী কৰি আহিছে।
এনে সময়ত পেট্ৰল, ডিজেলৰ দাম বৃদ্ধিৰ সিদ্ধান্তই প্ৰত্যক্ষ আৰু পৰোক্ষভাৱে জনসাধাৰণৰ ওপৰতে মাধমাৰ সোধাব, ছাত্ৰ সন্থাৰ বিবৃতিত প্ৰকাশ।
লকডাউনৰ সময়ত অসম চৰকাৰৰ ৰাজহ সংগ্ৰহৰ সমস্যাৰ কথা প্ৰকাশ পাইছে বুলি উল্লেখ কৰি সংগঠনটোৱে কয় কিন্তু মূল্যবৃদ্ধিৰ পৰিৱৰ্তে চৰকাৰে বিকল্প পন্থা অৱলম্বন কৰক।
“লকডাউনৰ সময়ত অসম চৰকাৰে ডিজেল, পেট্ৰলৰ মূল্যবৃদ্ধিৰ সিদ্ধান্তই অসমৰ সৰ্বসাধাৰণ জনসাধাৰণক জৰ্জৰিত কৰিব।…জনসাধাৰণক মাধমাৰ নোসোধোৱাকৈ ৰাজহ সংগ্ৰহৰ বিকল্প পথ উলিয়াই লওক,” আছুৰ উপদেষ্টা সমুজ্জ্বল কুমাৰ ভট্টাচাৰ্য্যই কয়।
