খাদ্য সামগ্ৰী, ঔষধ, ইন্ধনজাত সামগ্ৰীৰ পৰা আৰম্ভ কৰি সকলো ব্যৱহাৰ্য সামগ্ৰীৰে মূল্যবৃদ্ধিৰ প্ৰতিবাদত আৰু মূল্যবৃদ্ধি হ্ৰাস কৰাৰ দাবীত বঙাইগাঁৱত আছুৱে বিক্ষোভ কাৰ্যসূচী ৰূপায়ণ কৰে ৷
বঙাইগাঁও আঞ্চলিক ছাত্ৰ সন্থাৰ উদ্যোগত বৰপাৰাস্থিত আছুৰ জিলা কাৰ্যালয় শ্বহীদ ভৱনৰ সন্মুখত ৰূপায়ণ কৰা বিক্ষোভ কাৰ্যসূচীত অংশগ্ৰহণ কৰা আছু কৰ্মীসকলে বিজেপি চৰকাৰ হায় হায়, মূল্যবৃদ্ধি ৰোধ কৰক আদি শ্লোগান দি প্ৰতিবাদ সাব্যস্ত কৰে ৷
ইপিনে বিক্ষোভ কাৰ্যসূচীত অংশগ্ৰহণ কৰি বঙাইগাঁও জিলা ছাত্ৰ সন্থাৰ সাধাৰণ সম্পাদক জ্যোতি শংকৰ চৌধুৰীয়ে সংবাদ মাধ্যমৰ আগত কয় যে পৰিৱৰ্তনৰ কথা কৈ শাসনৰ গাদীত বহা নৰেন্দ্ৰ মোদী নেতৃত্বাধীন বিজেপি চৰকাৰখনে এতিয়া পৰিৱৰ্তনৰ নামত খাদ্য সামগ্ৰীকে ধৰি সকলো সামগ্ৰীৰে মূল্যবৃদ্ধি ঘটাই সাধাৰণ ৰাইজক জুৰুলা কৰি পেলাইছে ৷
কোৰোনা কালত জুৰুলা হোৱা সাধাৰণ ৰাইজক সকাহ দিয়াৰ সলনি এতিয়া বিজেপি চৰকাৰে ভূতৰ ওপৰত দানহ পৰাদি ইন্ধনজাত সামগ্ৰী, ৰন্ধন গেছ, ঔষধকে ধৰি সকলো অত্যাৱশ্যকীয় সামগ্ৰীৰ ব্যাপক মূল্যবৃদ্ধি ঘটাই জুৰুলা কৰি তোলা কাৰ্যত তীব্ৰ বিৰোধিতা কৰে ৷
লগতে অতিশীঘ্ৰে অত্যাৱশ্যকীয় সামগ্ৰীৰ মূল্যবৃদ্ধি ৰোধ কৰাৰ ক্ষেত্ৰত ৰাজ্য চৰকাৰখনক ব্যৱস্থা গ্ৰহণ কৰি সাধাৰণ ৰাইজক সকাহ দিবলৈ দাবী জনায় ৷
বিক্ষোভ কাৰ্যসূচীত বঙাইগাঁও আঞ্চলিক ছাত্ৰ সন্থাৰ সভাপতি চম্পক চৌধুৰী, সাধাৰণ সম্পাদক নয়নজ্যোতি ৰায়ৰ লগতে আন আছুকৰ্মী উপস্থিত থাকে ৷
