প্ৰকাশ পোৱা এন আৰ চিৰ খচৰাত বিদেশীৰ নাম অন্তৰ্ভুক্তিৰ বাতৰিৰ পাছত এন আৰ চিৰ প্ৰস্তুতৰ লগত বিদেশী জড়িত হোৱাৰ কথা পোহৰলৈ অহাত সমগ্ৰ প্ৰক্ৰিয়াটোত উচ্চতম ন্যায়ালয়ৰ বিশেষ নিৰীক্ষণ হোৱাটো বিচাৰিছে আছুৱে।
মৰিগাঁৱত এন আৰ চি প্ৰস্তুত কৰা কাৰ্যত বিদেশী ন্যায়াধিকৰণ, উচ্চ ন্যায়ালয়ে বিদেশী বুলি ৰায় দিয়া ব্যক্তিক নিয়োজিত কৰাৰ ঘটনা পোহৰলৈ অহাৰ পাছত অন্যান্য জিলাতো এনে হোৱাৰ সন্দেহৰ অৱতাৰণা হৈছে।
উল্লেখযোগ্য যে মৰিগাঁৱৰ খাইৰুল ইছলাম নামৰ বিদেশী ঘোষিত কৰ্মচাৰী এন আৰ চিৰ সেৱা কেন্দ্ৰৰ দায়িত্বত আছিল। সন্দেহযুক্ত নাগৰিকৰ প্ৰব্ৰজন ঘটা কেইবাখনো জিলাত খচৰা এন আৰ চিত নাম সামান্য পৰিমাণেহে বাদ পৰাত পক্ষপাতিত্বৰে নাম সন্নিৱিষ্ট কৰাৰ অভিযোগ উঠিছিল।
এনে কাৰণতে বিদেশীক ভাৰতীয় সজাবলৈ সুযোগ দি বিদেশীক এন আৰ চিৰ কামত নিয়োজিত কৰাৰ সুযোগ দিয়াৰ দৰে কাৰ্য আন জিলাতো হ’ব পাৰে বুলি আছুৱে সন্দেহ প্ৰকাশ কৰিছে।
আনহাতে, মৰিগাঁৱৰ ঘটনা এটা উদাহৰণহে বুলি সদৰী কৰি আছুৰ সাধাৰণ সম্পাদক লুৰীণজ্যোতি গগৈয়ে কয় যে এনে ঘটনা আন জিলাতো হ’ব পাৰে। এন আৰ চি উন্নীতকৰণ প্ৰক্ৰিয়া তদাৰক কৰি থকা উচ্চতম ন্যায়ালয়ৰ ওপৰত অসমৰ ৰাইজ আৰু আছুৰ আস্থা আছে বুলি উল্লেখ কৰি লুৰীণজ্যোতিয়ে কয় যে বিদেশীকো এন আৰ চিৰ কামত জড়িত থকাৰ কথা সংবাদ মাধ্যমেহে উদঙালে।
বিদেশী মুক্ত অসমৰ বাবে এন আৰ চি প্ৰস্তুত কৰা কাৰ্যত যদি বিদেশী জড়িত হৈ পৰে, তেন্তে কেনেদৰে মূল লক্ষ্যত উপনীত হ’ব পৰা যাব বুলি তেওঁ প্ৰশ্ন কৰে।গগৈয়ে আৰু কয় যে বিদেশী মুক্ত এন আৰ চিয়ে অসমৰ বাবে শেষ উপায় বুলি গণ্য হোৱাৰ সময়তে এন আৰ চিৰ কামত বিদেশী নাগৰিক নিয়োজিত হোৱাটো এটা ভয়ংকৰ ঘটনা।
চৰকাৰৰ গাফিলতিৰ কথা উল্লেখ কৰি আছুৰ সাধাৰণ সম্পাদকজনে সমগ্ৰ ব্যৱস্থাটোৰ ক্ষেত্ৰত উচ্চতম ন্যায়ালয়ৰ বিশেষ নিৰীক্ষণৰ প্ৰয়োজনৰ কথা দোহাৰে। আন জিলাৰ ক্ষেত্ৰতো এন আৰ চিৰ খচৰাতে নহয়, নিয়োজিত বিষয়া-কৰ্মচাৰীৰ প্ৰকৃত পৰিচয় সম্পৰ্কতো পুংখানুপুংখভাৱে চৰকাৰে পৰীক্ষণ কৰাৰ লগতে উচ্চতম ন্যায়ালয়ক বিশেষ নিৰীক্ষণৰ ব্যৱস্থা কৰিবলৈ লুৰীণজ্যোতিয়ে আহ্বান জনায়।
