শিক্ষামন্ত্ৰী ধৰ্মেন্দ্ৰ প্ৰধানৰ পদত্যাগৰ দাবীত এইবাৰ পোনে পোনে প্ৰধানমন্ত্ৰী নৰেন্দ্ৰ মোদীৰ কাষ চাপিছে ককৰোচ জনতা পাৰ্টিৰ প্ৰধান অভিজিৎ দীপকে। তেওঁৰ মতে সমগ্ৰ দেশে বৰ্তমান শিক্ষাব্যৱস্থাত দায়বদ্ধতা বিচাৰিছে আৰু শিক্ষামন্ত্ৰী ধৰ্মেন্দ্ৰ প্ৰধানক বৰ্খাস্ত কৰিলেহে এই দায়বদ্ধতা গঢ়ি তোলাৰ কাম আৰম্ভ হ‘ব পাৰে।
জন্মলগ্নৰে পৰা শিক্ষাব্যৱস্থাৰ দুৰ্নীতি, প্ৰশ্নকাকত ফাদিল, পৰীক্ষাৰ অত্যধিক খৰচ আৰু ছাত্ৰ-ছাত্ৰীৰ প্ৰতি দায়বদ্ধতাৰ অভাৱক লৈ ককৰোচ জনতা পাৰ্টিয়ে আন্দোলন কৰি আহিছে। নিট পৰীক্ষাৰ প্ৰশ্নকাকত ফাদিল হোৱাৰ পিছৰে পৰা শিক্ষামন্ত্ৰী ধৰ্মেন্দ্ৰ প্ৰধানৰ পদত্যাগৰ দাবীত দলটো সৰৱ হৈ পৰিছে। এই দাবীৰে দিল্লীৰ যন্তৰ মন্তৰৰ লগতে দেশৰ আন আন প্ৰান্ততো অভিজিৎ দীপকেৰ নেতৃত্বত দলৰ কৰ্মীসকলে প্ৰতিবাদ সাব্যস্ত কৰিছে। কিন্তু ধৰ্মেন্দ্ৰ প্ৰধানে পদত্যাগ কৰা নাই আৰু প্ৰধানমন্ত্ৰীয়েও তেওঁক বৰ্খাস্ত কৰাৰ কথা ভবা নাই।
সেয়েহে উপায়ন্তৰ হৈ প্ৰধানমন্ত্ৰী নৰেন্দ্ৰ মোদীলৈ চিঠি লিখিছে অভিজিতে। চিঠিত তেওঁ উল্লেখ কৰিছে যে আজি বৰ দুখেৰে এই চিঠি লিখিবলগীয়া হৈছে। দেশৰ ভৱিষ্যত প্ৰজন্মৰ মানসিক স্বাস্থ্যক লৈ চিন্তা কৰাৰ সময় এতিয়া আহি পৰিছে। অভিজিৎ দীপকেৰ দাবী অনুসৰি প্ৰশ্নকাকত ফাদিল আৰু শিক্ষাক্ষেত্ৰৰ দুৰ্নীতিৰ বাবে যোৱা কেইদিনমানত এঘাৰ জন ছাত্ৰ-ছাত্ৰীয়ে আত্মহত্যা কৰিছে। ইয়াৰ ভিতৰত যোৱা আঠচল্লিশ ঘণ্টাতেই পাঁচজনৰ মৃত্যু হৈছে। পুনৰবাৰ নিট পৰীক্ষা দিয়াৰ মানসিক চাপত ছাত্ৰ-ছাত্ৰীসকল চিন্তিত হৈ পৰিছে।
ল‘ৰা-ছোৱালীক পঢ়ুৱাবলৈ গৈ পিতৃ-মাতৃয়ে সৰ্বস্বান্ত হ’বলগীয়া হৈছে অথচ অব্যৱস্থাৰ বাবে সেই ছাত্ৰ-ছাত্ৰীয়ে প্ৰাণ হেৰুৱাইছে। চৰকাৰে এই পৰিয়ালবোৰক কমেও এক কোটি টকাকৈ ক্ষতিপূৰণ দিয়া উচিত বুলি তেওঁ দাবী জনাইছে। ককৰোচ জনতা পাৰ্টিৰ প্ৰতিষ্ঠাপকগৰাকীয়ে স্পষ্টকৈ কৈছে যে তেওঁলোকে প্ৰথমৰে পৰাই শিক্ষামন্ত্ৰীৰ পদত্যাগ দাবী কৰি আহিছে। তেওঁলোকে কেৱল দায়বদ্ধতা বিচাৰে আৰু শিক্ষামন্ত্ৰীক পদচ্যুত কৰাটোৱেই হৈছে এই দিশত প্ৰথম পদক্ষেপ। সেয়েহে তেওঁলোকে প্ৰধানমন্ত্ৰীক শিক্ষামন্ত্ৰীগৰাকীক বৰ্খাস্ত কৰিবলৈ বিনম্ৰতাৰে অনুৰোধ জনাইছে।
