সততে সাম্প্ৰদায়িক আৰু উচটনিমূলক মন্তব্য দি থকা বিজেপিৰ হোজাই সমষ্টিৰ বিধায়ক শিলাদিত্য দেবক তেওঁৰ শেহতীয়া সাম্প্ৰদায়িক মন্তব্য আৰু এন আৰ চিক অৱমাননা কৰাৰ প্ৰতিবাদত তামুলপুৰ অাৰক্ষী থানাত ১৭ অক্তোবৰত তামুলপুৰ জিলা এ বি এম ছুৱে এখন এজাহাৰ দাখিল কৰে।
সদৌ বি টি চি সংখ্যালঘু ছাত্ৰ সন্থাই দাখিল কৰা এজাহাৰৰ ভিত্তিত তামুলপুৰ অাৰক্ষীয়ে শিলাদিত্যৰ বিৰুদ্ধে ভাৰতীয় দণ্ডবিধিৰ ১০৫/১২০/বি/১৫৩/এ ধাৰাত এটি গোচৰ ৰুজু কৰে।
এজাহাৰ দাখিল কৰি তামুলপুৰ জিলা এ বি এম ছুৰ সভাপতি টাইচন হুছেইনে সংবাদ মাধ্যমৰ আগত অসমৰ মুখ্য মন্ত্রী সৰ্বানন্দ সোণোৱাল আৰু বিজেপি চৰকাৰৰ পৃষ্ঠপোষকতাতে শিলাদিত্য দেবে এনে মন্তব্য কৰি আহিছে বুলি মন্তব্য কৰে।
উল্লেখযোগ্য যে যোৱা ১৩ অক্তোবৰত আলফা স্বাধীনে গুৱাহাটীৰ শুক্লেশ্বৰ ঘাটত কৰা বোমা বিস্ফোৰনৰ পিছত বিজেপি বিধায়ক শিলাদিত্য দেবে এটা ব্যক্তিগত খণ্ডৰ টিভি চেনেলৰ সন্মুখত উচটনিমূলক মন্তব্যৰে আলফা (স্বাঃ)ৰ সেনাধ্যক্ষ পৰেশ বৰুৱাক ঈদত বোমা বিস্ফোৰণৰ বাবে প্ৰত্যাহ্বান জনাইছিল।
ইয়াৰ উপৰি বিধায়কজনে সময়ে সময়ে এন আৰ চিত মুছলমান বাংলাদেশীৰ নাম অন্তৰ্ভুক্ত হোৱা বুলি এন অাৰ চি প্ৰক্ৰিয়াক চূড়ান্তভাৱে অৱমাননা কৰি আহিছে বুলিও সংগঠনটোৱে উল্লেখ কৰে।