দেশজুৰি হাজাৰ হাজাৰ ঔষধৰ দোকান এদিনৰ বাবে বন্ধ থকাৰ বাবে সাধাৰণ ৰাইজ চিন্তিত হৈ পৰিছে। অল ইণ্ডিয়া অৰ্গেনাইজেশ্যন অৱ কেমিষ্টছ এণ্ড ড্ৰাগিষ্টছ চমুকৈ এআইঅ’চিডিয়ে ২০ মে’ অৰ্থাৎ আজি সমগ্ৰ দেশতে ধৰ্মঘটৰ ঘোষণা কৰিছে। প্ৰায় ১২.৪ লাখতকৈও অধিক কেমিষ্ট, ফাৰ্মাচিষ্ট আৰু ঔষধ যোগানকাৰীক প্ৰতিনিধিত্ব কৰা এই সংগঠনটোৱে ই-ফাৰ্মাচী অৰ্থাৎ অনলাইন ঔষধ ব্যৱসায়ৰ নিয়মসমূহৰ ত্ৰুটি দূৰ কৰাৰ দাবীত এই প্ৰতিবাদ সাব্যস্ত কৰিছে। অৱশ্যে কেন্দ্ৰীয় চৰকাৰে আশ্বাস দিছে যে এই ধৰ্মঘটৰ ফলত জনসাধাৰণে ঔষধৰ কোনো নাটনিৰ সন্মুখীন হ’বলগীয়া নহয়।
এই ধৰ্মঘটৰ মূল কাৰণ হৈছে অনলাইন ফাৰ্মাচী আৰু ক্ষিপ্ৰভাৱে ঔষধ যোগান ধৰা বিভিন্ন ম’বাইল এপসমূহৰ বাবে কোনো স্পষ্ট নিয়ম নথকাটো। সংগঠনটোৰ অভিযোগ অনুসৰি অনলাইন ব্যৱস্থাত ডাক্তৰৰ প্ৰেছক্ৰিৰিপচন পৰীক্ষা কৰাৰ সঠিক পদ্ধতি নাই আৰু কোনটো নিয়মেৰে ঔষধ যোগান ধৰা হ’ব সেইটোও স্পষ্ট নহয়। ইয়াৰ উপৰি আইন উলংঘা কৰিলে জবাবদিহি কৰাৰ কোনো ব্যৱস্থাও ইয়াত নাই। চৰকাৰে জাৰি কৰা দুটা বিশেষ নিয়মৰ বাবে অনলাইন ফাৰ্মাচীবোৰে কোনো স্পষ্ট আইন নোহোৱাকৈয়ে চলি থকাৰ সুযোগ পাইছে আৰু এই আইনী ফাঁকৰ বাবে তেওঁলোকে কোনো তদাৰক অবিহনেই ব্যৱসায় চলাই আছে। সেয়েহে সংগঠনটোৱে এই নিয়ম দুটা অতি সোনকালে প্ৰত্যাহাৰ কৰাৰ দাবী জনাইছে।
সংগঠনটোৰ সাধাৰণ সম্পাদক ৰাজীৱ সিংঘলে জনোৱা মতে বহুতো অনলাইন ফাৰ্মাচী আৰু ইনষ্টেণ্ট ডেলিভাৰী প্লেটফৰ্মে ভুৱা বা ভুল প্ৰেছক্ৰিৰিপচনৰ ভিত্তিত ঔষধ যোগান ধৰি আহিছে। তেওঁৰ দাবী যে অনলাইন ফাৰ্মাচীবোৰকো সাধাৰণ দোকানবোৰৰ দৰেই কঠোৰ নিয়মৰ অধীনলৈ আনিব লাগে। এই ধৰ্মঘটৰ বাবে দিল্লীত প্ৰায় ১৫ হাজাৰ আৰু সমগ্ৰ দেশতে ৭ৰ পৰা ৮ লাখ খুচুৰা ঔষধৰ দোকান বন্ধ থাকিব পাৰে বুলি ধাৰণা কৰা হৈছে, যাৰ ফলত কিছুমান অঞ্চলত সাময়িকভাৱে ঔষধ পোৱাত সাধাৰণ ৰাইজ অসুবিধাৰ সন্মুখীন হ’ব পাৰে।
এই পৰিস্থিতিৰ মাজতে কেন্দ্ৰীয় স্বাস্থ্য মন্ত্ৰালয়ে জনাইছে যে ধৰ্মঘট হ’লেও জৰুৰীকালীন ফাৰ্মাচীসমূহ খোলা থাকিব। ইয়াৰ ভিতৰত সকলো ডাঙৰ ফাৰ্মাচী চেইন, হাস্পতালৰ ভিতৰত থকা ফাৰ্মাচী, জন ঔষধি কেন্দ্ৰ আৰু অমৃত ফাৰ্মাচীসমূহ সম্পূৰ্ণৰূপে খোলা থাকিব। ইয়াৰ উপৰি কেইবাখনো ৰাজ্যৰ কেমিষ্ট আৰু ড্ৰাগিষ্ট সংগঠনে জনস্বাৰ্থৰ কথা চিন্তা কৰি নিজক এই ধৰ্মঘটৰ পৰা আঁতৰাই ৰাখিছে আৰু দোকান খোলা ৰখাৰ সিদ্ধান্ত লৈছে। গতিকে ধৰ্মঘটক কেন্দ্ৰ কৰি কিছু আশংকা সৃষ্টি হ’লেও চৰকাৰ আৰু বিভিন্ন ৰাজ্যিক সংগঠনৰ আশ্বাস অনুসৰি ঔষধৰ যোগান বন্ধ নহয় আৰু কোনো ডাঙৰ সংকটৰ সম্ভাৱনা নাই।
