অনলাইন জুৱাৰ আসক্তি আৰু বিলাসী জীৱনশৈলীৰ প্ৰলোভনে মানুহক কেনেকৈ ডুবাই দিব পাৰে তাৰ এক জীৱন্ত উদাহৰণ পোহৰলৈ আহিছে মধ্যপ্ৰদেশত। অৱশেষত বেংকৰ পৰা লাখ লাখ টকা আত্মসাৎ কৰাৰ অভিযোগত আৰক্ষীৰ হাতত গ্ৰেপ্তাৰ হ’ল এগৰাকী মহিলা কেচিয়াৰ।
তদন্ত কৰি থকা আৰক্ষী বিষয়াসকলেও আনকি মহিলাগৰাকীৰ এই কাণ্ড দেখি আচৰিত হৈ পৰিল। জানিব পৰা মতে, সেই বৃহৎ পৰিমাণৰ ধনৰ ভিতৰত তেওঁ কেৱল ষ্টাৰ মেকাৰ এপতে প্ৰায় ৩৫ লাখ টকা উৰুৱাইছিল।
মধ্যপ্ৰদেশৰ খাৰগোণ জিলাৰ এই চাঞ্চল্যকৰ ঘটনা পোহৰলৈ অহাৰ লগে লগে সমগ্ৰ অঞ্চলটোত চাঞ্চল্যৰ সৃষ্টি হয়। আৰক্ষীৰ সূত্ৰ অনুসৰি মহিলা কেচিয়াৰগৰাকীয়ে জিলা সমবায় বেংকৰ মূল শাখাত কৰ্মৰত আছিল। তেওঁৰ বিৰুদ্ধে বেংকৰ পৰা প্ৰায় ৪২ লাখ টকা আত্মসাৎ কৰাৰ বাবে গুৰুতৰ অভিযোগ উত্থাপন হৈছে।
এই বৃহৎ পৰিমাণৰ চৰকাৰী ধন আত্মসাৎ কৰাৰ বিষয়টো পোহৰলৈ অহাৰ লগে লগে বেংক কৰ্তৃপক্ষই আৰক্ষীৰ কাষ চাপে আৰু লগে লগে কোটোৱালি থানাৰ আৰক্ষীয়ে তদন্ত আৰম্ভ কৰে।
অভিযুক্ত মহিলা কেচিয়াৰগৰাকীক গ্ৰেপ্তাৰ কৰাৰ পিছত তদন্তকাৰীয়ে জেৰা কৰি থকাৰ সময়তে ইটোৰ পিছত সিটো বিস্ফোৰক তথ্যৰ সন্মুখলৈ আহিছে। আৰক্ষীয়ে জনোৱা মতে, বেংকৰ কৰ্মচাৰীগৰাকীয়ে অনলাইনত বিমানৰ টিকট বুকিং কৰাৰ পৰা আৰম্ভ কৰি বিভিন্ন বিলাসী ভ্ৰমণত বহু টকা খৰচ কৰিছিল।
ইয়াৰ উপৰিও ষ্টাৰ মেকাৰ নামৰ অনলাইন গেমিং আৰু মনোৰঞ্জনৰ এপ এটাত বহু টকা বিনিয়োগ কৰিছিল। সেই এপটোত জুৱা আৰু অন্যান্য ভাৰ্চুৱেল গেমত তেওঁ প্ৰায় ৩৫ লাখ টকা হেৰুৱায়।
প্ৰাথমিক তদন্তৰ পৰা অনুমান কৰা হৈছে যে বেংকৰ মূল কেচিয়াৰ হোৱাৰ বাবেই এই বৃহৎ পৰিমাণৰ ধন তেওঁ নিজৰ ব্যক্তিগত একাউণ্টলৈ সহজেই ট্ৰেন্সফাৰ কৰিছিল। বেংক অডিটৰ সময়ত বিপুল পৰিমাণৰ ধনৰ অসামঞ্জস্যতা ধৰা পৰাত প্ৰথমে এই জালিয়াতিৰ কথা পোহৰলৈ আহিছিল।
অভিযুক্ত মহিলাগৰাকীৰ এই ধৰণৰ বিলাসী জীৱনশৈলী আৰু অনলাইন জুৱা খেলৰ আসক্তিৰ বাবে বেংক জমাকাৰীৰ ধন কেনেদৰে অপচয় হ’ল সেয়া এতিয়া আৰক্ষীয়ে তদন্ত আৰম্ভ কৰিছে। কোটোৱালি থানাৰ আৰক্ষীয়ে ধৃত কেচিয়াৰৰ বিৰুদ্ধে জালিয়াতি আৰু আৰ্থিক আত্মসাৎৰ গোচৰ ৰুজু কৰি অধিক আইনী ব্যৱস্থা গ্ৰহণ কৰাৰ দিশে আগবাঢ়িছে।
