পাকিস্তানৰ ৰাজধানী ইছলামাবাদত থকা ভাৰতীয় উচ্চায়ুক্তৰ কাৰ্য্যালয়ৰ দুগৰাকী কৰ্মচাৰীক ১৫ জানুৱাৰিত আৰক্ষীয়ে আটক কৰি মাৰপিট কৰাৰ গুৰুতৰ অভিযোগ উত্থাপিত হৈছে।
এক সূত্ৰ অনুসৰি, আৰক্ষীয়ে দুদীৰ্ঘ ১২ ঘণ্টা ধৰি ভাৰতীয় উচ্চায়ুক্তৰ কাৰ্য্যালয়ৰ কৰ্মচাৰী দুগৰাকীক আটক কৰি মাৰপিট কৰাৰ লগতে অপৰিস্কাৰ পানী খাবলৈ দিয়া হৈছিল বুলি জানিব পৰা গৈছে।
উচ্চায়ুক্তৰ কাৰ্য্যালয়ত কৰ্মৰত কৰ্মচাৰী দুগৰাকীক এটা ১৫-১৬ জনীয় দলে আটক কৰি লৈ গৈছিল।
উল্লেখযোগ্য যে, ইছলামাবাদস্থিত ভাৰতীয় উচ্চায়ুক্তৰ কাৰ্য্যালয়ৰ কৰ্মচাৰী দুগৰাকীৰ বিৰুদ্ধে পথ দুৰ্ঘটনা সংঘটিত কৰাৰ অভিযোগ উত্থাপিত হৈছিল।
আনহাতে, পাকিস্তানৰ আৰক্ষীয়ে ভাৰতীয় উচ্চায়ুক্তৰ কাৰ্য্যালয়ক কোনোধৰণৰ খবৰ নিদিয়াকৈ কৰ্মচাৰী দুগৰাকীক আটক কৰা ঘটনাৰ দ্বাৰা নিৰ্দিষ্ট প্ৰট’কল ভংগ কৰিছে।
ভাৰতৰ সংবাদমাধ্যমত প্ৰথমে পাকিস্তানত থকা ভাৰতীয় উচ্চায়ুক্তৰ কাৰ্য্যালয়ৰ দুগৰাকী কৰ্মচাৰী সন্ধানহীন হোৱা বুলি বাতৰি প্ৰকাশ পাইছিল।
এই বাতৰিৰ পাছতে ভাৰতে পাকিস্তানৰ ওপৰত হেচা প্ৰয়োগ কৰাৰ পাছতে পাকিস্তানে ভাৰতীয় কৰ্মচাৰী দুজনক এৰি দিবলৈ বাধ্য হৈছিল।