আণ্ডাৰৱৰ্ল্ড ডন ডাউদ ইব্ৰাহিমক বিষ পান কৰোৱা হৈছে! তেওঁক পাকিস্তানৰ চিকিৎসালয়ত ভৰ্তি কৰা হৈছে! দেওবাৰে নিশাৰ পৰাই এনে জল্পনা-কল্পনাৰ বাতৰি বিয়পি পৰিছে। সময়ৰ লগে লগে জল্পনা-কল্পনাৰ মাত্ৰা বৃদ্ধি পাইছে।
বিভিন্ন সূত্ৰৰ খবৰ অনুসৰি ডাউদক ৰখা পাকিস্তানী চিকিৎসালয়খনত কটকটীয়া নিৰাপত্তাৰ ব্যৱস্থা কৰা হৈছে। তাত কেৱল চিকিৎসক আৰু পৰিয়ালৰ সদস্যকহে যোৱাৰ অনুমতি দিয়া হৈছে।
অৱশ্যে সেই বিষয়ত আনুষ্ঠানিকভাৱে কোনো মন্তব্য কৰা নাই পাকিস্তানে। এতিয়ালৈকে ইছলামবাদে ডাউদৰ বিষয়ে কোনো তথ্য দিয়া নাই। ভাৰত চৰকাৰেও এই সন্দৰ্ভত কোনো মন্তব্য কৰা নাই। অৱশ্যে জল্পনা-কল্পনা ইয়াতেই শেষ হোৱা নাই।
লগতে পঢ়কঃ উদ্যোগপতি সজ্জন জিন্দালৰ বিৰুদ্ধে ধৰ্ষণৰ অভিযোগ অভিনেত্ৰীৰ! মুম্বাইৰ থানাত দাখিল এজাহাৰ
সাধাৰণতে ডি গেঙৰ মাষ্টাৰমাইণ্ড ডাউদৰ স্থিতিক লৈ সদায়ে ব্যাপক জল্পনা-কল্পনা চলি থাকে। বিভিন্ন সূত্ৰৰ বাতৰি অনুসৰি ডাউদ বৰ্তমান পাকিস্তানৰ কৰাচীত বাস কৰে। একাংশ বাতৰিত দাবী কৰা হৈছে যে ১৯৯৩ চনৰ মুম্বাই আক্ৰমণৰ মাষ্টাৰমাইণ্ড তথা ভাৰতৰ মষ্ট ৱাণ্টেড ডাউদ দীৰ্ঘদিন ধৰি পাকিস্তানত আছে। মুম্বাই আক্ৰমণত ২৫০ৰো অধিক লোকৰ মৃত্যু হৈছিল। আহত হৈছিল ১০০০ৰো অধিক লোক।
বাতৰি অনুসৰি ডাউড বৰ্তমান কৰাচীৰ ক্লিফটন অঞ্চলত বাস কৰে। এবছৰৰ পূৰ্বে ডাউদৰ ভাগিনিয়েকে দাবী কৰিছিল যে ভাৰতৰ ডাউদ পুনৰ বিবাহপাশত আবদ্ধ হৈছে। তাৰপিছৰে পৰা তেওঁ কৰাচীতে আছে।
ভাৰতৰ ৰাষ্ট্ৰীয় তদন্তকাৰী সংস্থাই (এন আই এ) দাখিল কৰা চাৰ্জশ্বীট অনুসৰি দাউদৰ ভগ্নী হাছিনা পাৰ্কাৰৰ পুত্ৰ আলিশাই কৈছিল যে ‘ডাউদ ইব্ৰাহিমৰ দ্বিতীয় পত্নী আছে। তেওঁ পাকিস্তানী পাঠান, নাম মেইজাবিন। দাউদৰ তিনিগৰাকী কন্যা আছে – মাৰুখ (জুনেদৰ সৈতে বিবাহিত, যি জাভেদ মিয়াঁদাদৰ পুত্ৰও), মেহৰীন (বিবাহিত) আৰু মাজিয়া (অবিবাহিত)। এটা পুত্ৰও আছে – মহীন নৱাজ। তেওঁৰো বিয়া হৈছে।’
লগতে পঢ়কঃ লজ্জাজনক: কেৰালাত ৫২ বছৰীয়া মহিলাক ধৰ্ষণৰ অভিযোগত গ্ৰেপ্তাৰ অসমৰ যুৱক
উল্লেখ্য যে ২০২২ চনৰ নৱেম্বৰ মাহত এন আই এয়ে ডাউদকে ধৰি চাৰিজন ব্যক্তিৰ বিৰুদ্ধে সন্ত্ৰাসবাদী কাৰ্যকলাপৰ বাবে ধন যোগান ধৰাৰ অভিযোগত অভিযোগনামা দাখিল কৰিছিল।
