চোকা অস্ত্ৰৰে চিকিৎসক হানি খুচি থৈ চিকিৎসালয়ৰ কৰিড’ৰেৰে নিৰ্বিকাৰভাৱে ওলাই গৈছে এজন যুৱক। হঠাৎ কেইজনমানে চিঞৰি উঠিল, ‘সেই ল’ৰাটোৱে মাৰিলে, ধৰ তাক৷’ হুলস্থুল শুনি চিকিৎসালয়খনৰ নিৰপত্তাৰক্ষীসকলে তাক কৰায়ত্ত কৰে।
তেনে এটা হাড় কঁপোৱা ঘটনাৰ ভিডিঅ’ বুধবাৰে ছ’চিয়েল মিডিয়াত ভাইৰেল হৈ পৰে। গুৰুতৰভাৱে আহত চিকিৎসক বালাজী জগন্নাথৰ চিকিৎসা আৰম্ভ হৈছে। আৰু সেই যুৱকজন? তেওঁ কোন? দৰাচলতে ঘটনাটো কি?
তামিলনাডুৰ কলাইগনাৰ চেণ্টেনাৰী চৰকাৰী চিকিৎসালয়। সেইদিনাই ভিগনেশ নামৰ যুৱকজনৰ বিৰুদ্ধে চিকিৎসকক উপৰ্যুপৰি ছুৰীকাঘাত কৰাৰ অভিযোগ উত্থাপন হৈছিল। ভিগনেশৰ মাতৃ এগৰাকী কেন্সাৰ ৰোগী। নিয়মীয়াকৈ কেমো চলে। ভিগনেশে অভিযোগ কৰে যে চিকিৎসকে মাকৰ সঠিক চিকিৎসা কৰা নাই। গতিকে মাতৃৰ স্বাস্থ্য বেয়া হৈ গৈ আছে। আৰক্ষীৰ জেৰাত জনায় যে সেই খঙৰ বাবেই তেওঁ চিকিৎসালয়খনৰ কেন্সাৰ ৱাৰ্ডত এই কাম কৰিছিল।
লগতে পঢ়কঃ ইজৰাইলৰ সেনাৰ হৈ যুঁজ দিয়া ভাৰতীয়, গাজা যুদ্ধত নিহত মিজো যুৱক
ডাক্তৰ বালাজী জগন্নাথক চোকা দাৰে কেইবাবাৰো ছুৰীৰে আঘাত কৰি চিকিৎসালয়ৰ পৰা ওলাই আহে বিগনেশ। যদিও ভাইৰেল ভিডিঅ’টোত ছুৰীৰে আঘাত কৰা এই মুহূৰ্তটো বন্দী হোৱা নাই, তথাপিও নিৰ্বিকাৰভাৱে খোজকাঢ়ি যোৱা ছবি বন্দী হৈছে। ইয়াৰ পিছতে ততাতৈয়াকৈ চিকিৎসালয়খনৰ নিৰাপত্তাৰক্ষীসকলে ভিগনেশক ঘেৰি ধৰিলে।
ভিডিঅ’টোত এবাৰো তেওঁক পলাবলৈ চেষ্টা কৰা দেখা পোৱা নাই। ভিগনেশে অবিৰতভাৱে তৰ্কাতৰ্কি কৰি থাকিল। ভিডিঅ’টোত ভিগনেশে কোৱা শুনা গৈছে যে ‘আপোনাৰ মা-দেউতা বিপদত পৰিলে কি কৰিলেহেঁতেন?’
বৰ্তমান সেই চিকিৎসালয়তে চিকিৎসাধীন হৈ আছে চিকিৎসক বালাজী। বুকুত পেচমেকাৰ স্থাপন কৰা হৈছে। কপাল, পিঠি আৰু কাণত আঘাতপ্ৰাপ্ত হৈছে। তেওঁক আই চি ইউত ৰখা হৈছে। অৱশ্যে তেওঁৰ শাৰীৰিক অৱস্থা সুস্থিৰ বুলি কোৱা হৈছে। তামিলনাডুৰ মুখ্যমন্ত্ৰী এম কে ষ্টেলিনে এই ঘটনা সন্দৰ্ভত সম্পূৰ্ণ তদন্তৰ নিৰ্দেশ দিছে।
লগতে পঢ়কঃ বিশ্বক দেখুৱাব পথ! কাৰ্বন নিৰ্গমন হ্ৰাস কৰাৰ বাবে ভূটানৰ নেতৃত্বত গঠন নতুন মঞ্চ ‘জি-জিৰ’
ইপিনে, চেন্নাইৰ এই ঘটনাই পুনৰবাৰ চিকিৎসকৰ সুৰক্ষাৰ ওপৰত প্ৰশ্নৰ উত্থাপন কৰিছে। ইতিমধ্যে এই ঘটনাৰ প্ৰতিবাদত তামিলনাডুৰ চিকিৎসকে অনিৰ্দিষ্টকালীন ধৰ্মঘটৰ আহ্বান জনাইছে।
