পশ্চিম দিল্লীত এজন ছিৰিয়াৰ শৰণাৰ্থী আৰু তেওঁৰ ১১ মহীয়া পুত্ৰক এচিডেৰে আক্ৰমণ কৰা বুলি অভিযোগ উঠিছে। ৰাফাত নামৰ যুৱকজন আৰু তেওঁৰ পুত্ৰক ছফদৰজংৰ এখন চিকিৎসালয়ত ভৰ্তি কৰোৱা হৈছে। সোমবাৰে আৰক্ষীয়ে এফআইআৰ ৰুজু কৰি তদন্ত আৰম্ভ কৰে।
আৰক্ষী সূত্ৰৰ মতে, ঘটনাটো ৩০ ছেপ্টেম্বৰৰ। ৰাফাত, মাৰিছা আৰু তেওঁলোকৰ পুত্ৰই বিগত কিছুদিন ধৰি বিকাশপুৰীস্থিত ৰাষ্ট্ৰসংঘৰ শৰণাৰ্থী উচ্চায়ুক্তৰ কাৰ্যালয়ৰ বাহিৰত থাকে। ৰাফাতে ক’লে যে তেওঁ এটা কল চেণ্টাৰত কাম কৰি আছিল। কিছুদিন আগতে চাকৰি হেৰুৱালে। তেওঁৰ ভাষাত, “মই ৰাষ্ট্ৰসংঘৰ বিষয়াজনৰ সৈতে যোগাযোগ কৰিলোঁ। তেওঁ সহায় কৰিবলৈ অস্বীকাৰ কৰিলে। ইয়াৰ পিছত মই অফিচৰ বাহিৰত থাকিবলৈ বাধ্য হ’লোঁ।তাতেই এচিড আক্ৰমণ সংঘটিত হোৱা বুলি অভিযোগ উঠিছে।”
এটা প্ৰেছক ৰাফাতে কয় যে তেওঁ নিজৰ কেঁচুৱা পুত্ৰৰ সৈতে ৰাস্তাত থিয় হৈ আছিল। হঠাৎ হাতত কেন লৈ দুই এজন মানুহ দৌৰি থকা দেখিলে। তেওঁৰ মতে, বিপদ দেখি তেওঁ পুত্ৰক কোলাত লৈ পলাই যাবলৈ চেষ্টা কৰে। কিন্তু শেষৰ কোনো প্ৰতিৰক্ষা নাছিল।
তেওঁৰ ভাষাত, “মই পলাবলৈ চেষ্টা কৰিছিলো যদিও বেছি দূৰলৈ যাব পৰা নাছিলো। মোৰ আৰু মোৰ ল’ৰাটোৰ ওপৰত কিবা এটা দলিয়াই দিলে। ছাল জ্বলি থকা যেন লাগিল।” ৰাফাতে আৰু দাবী কৰে যে তেওঁ কেইবাজনো অটো চালকক তেওঁক আৰু তেওঁৰ পুত্ৰক চিকিৎসালয়লৈ নিবলৈ অনুৰোধ কৰিছিল যদিও কোনোৱেই সঁহাৰি নিদিলে। অৱশেষত বাইকত অহা এজন ব্যক্তিয়ে তেওঁলোকক চিকিৎসালয়লৈ লৈ গ’ল।
ৰাফাতৰ পত্নী মাৰিছাই কয় যে তেওঁৰ পুত্ৰৰ চকু, ডিঙি আৰু বুকু এচিডৰ দ্বাৰা জ্বলি গৈছে। তেওঁৰ ভাষাত “মই ক্ষন্তেক সময়ৰ বাবে ভাবিছিলো যে মই মোৰ সন্তানক হেৰুৱাম।কোনোবাই শিশুৰ লগত এনে ব্যৱহাৰ কেনেকৈ কৰিব পাৰে?” পাছত এটা স্বেচ্ছাসেৱী সংগঠনে ভুক্তভোগীৰ পৰিয়ালৰ সৈতে যোগাযোগ কৰে।
