ৰাজস্থানত এগৰাকী মহিলা কনিষ্টবলক চাকৰিৰ পৰা নিলম্বন কৰা হৈছে। ছ’চিয়েল মিডিয়াত ভাইৰেল হোৱা এখন ফটোৰ বাবে এই কঠোৰ ব্যৱস্থা গ্ৰহণ কৰা হয়। ফটোখনত দেখা গৈছে যে এগৰাকী বৃদ্ধ লোকে এটা অভিযোগ দাখিল কৰিবলৈ আৰক্ষী থানালৈ গৈছিল, কিন্তু মহিলা আৰক্ষীগৰাকীয়ে তেওঁৰ কথাত কোনো গুৰুত্ব নিদি সন্মুখতে মেজৰ ওপৰত দুয়োখন ভৰি তুলি আৰামত বহি আছিল।
এই ঘটনাটো ৰাজস্থানৰ ডুংগাৰপুৰ জিলাৰ বিচ্চিৱাৰা আৰক্ষী থানাত সংঘটিত হৈছিল। ছ’চিয়েল মিডিয়াত প্ৰকাশিত খবৰ অনুসৰি, বৃদ্ধ লোকজন থানালৈ গৈছিল যদিও আৰক্ষীগৰাকীয়ে তেওঁৰ সমস্যাক গুৰুত্ব দিয়া নাছিল বৰঞ্চ অৱজ্ঞাহে কৰিছিল। এগৰাকী বয়োজ্যেষ্ঠ লোকৰ সন্মুখত এনেদৰে ভৰি তুলি বহি থকা কাৰ্যটোক মানুহে তীব্ৰ সমালোচনা কৰিছে আৰু ইয়াক অতি অসন্মানজনক আৰু অপেশাদাৰী কৰ্ম বুলি আখ্যা দিছে।
থানাত উপস্থিত থকা কোনোবা এজন ব্যক্তিয়ে এই ফটোখন তুলিছিল আৰু পিছত ই ছ’চিয়েল মিডিয়াত তীব্ৰ বেগত বিয়পি পৰে। মানুহৰ খং আৰু সমালোচনাৰ পিছত ৰাজস্থান আৰক্ষীয়ে বিষয়টো গুৰুত্ব সহকাৰে লয়। ডুংগাৰপুৰ আৰক্ষীয়ে জানিবলৈ দিয়ে যে কনিষ্টবলগৰাকীক তাৎক্ষণিকভাৱে নিলম্বন কৰা হৈছে আৰু তেওঁৰ বিৰুদ্ধে অনুশাসনমূলক ব্যৱস্থাও গ্ৰহণ কৰা হৈছে। এই ঘটনাই পুনৰবাৰ প্ৰমাণ কৰিলে যে ছ’চিয়েল মিডিয়াত ভাইৰেল হোৱা এখন ছবিয়েও কিমান দ্ৰুতভাৱে জনসাধাৰণৰ দৃষ্টি আকৰ্ষণ কৰিব পাৰে আৰু চৰকাৰী ব্যৱস্থা গ্ৰহণ কৰিবলৈ কৰ্তৃপক্ষক বাধ্য কৰাব পাৰে।
