মধ্যপ্ৰদেশৰ ছিংগৰৌলী জিলাত আদানী গ্ৰুপক আবণ্টিত এটা কয়লা খনিৰ বাবে প্ৰদান কৰা পাৰিপাৰ্শ্বিক অনুমোদনক লৈ ৰাষ্ট্ৰীয় সেউজ ন্যায়াধিকৰণে (এন জি টি) কেন্দ্ৰীয় চৰকাৰ আৰু মধ্যপ্ৰদেশ চৰকাৰলৈ জাননী প্ৰেৰণ কৰিছে। পৰিৱেশকৰ্মী অজয় ডুবে দাখিল কৰা দুখন পৃথক আৱেদনৰ ভিত্তিত ন্যায়াধিকৰণৰ প্ৰধান বিচাৰপীঠে এই জাননী জাৰি কৰে। আৱেদন দুখনত প্ৰকল্পটোৰ বাবে ৫.৭০ লাখৰো অধিক গছ কটাৰ অনুমতি বাতিল কৰাৰ লগতে প্ৰস্তাৱিত হাতী কৰিডৰৰ সুৰক্ষাৰ দাবী জনোৱা হৈছে। এই কয়লা খনিটো আদানী পাৱাৰৰ সহযোগী প্ৰতিষ্ঠান মহান এনাৰ্জেন লিমিটেডক আবণ্টন দিয়া হৈছে।
‘দ্য হিন্দু’ৰ এক প্ৰতিবেদন অনুসৰি, যোৱা ২৬ ফেব্ৰুৱাৰীত ৰাষ্ট্ৰীয় সেউজ ন্যায়াধিকৰণৰ অধ্যক্ষ প্ৰকাশ শ্ৰীবাস্তৱ আৰু বিশেষজ্ঞ সদস্য আফৰোজ আহমেদৰ বিচাৰপীঠে এই শুনানি গ্ৰহণ কৰে। ন্যায়াধিকৰণে আৱেদনৰ বিষয়বস্তুৰ ওপৰত কোনো মন্তব্য নকৰাকৈ কেন্দ্ৰীয় পৰিৱেশ, বন আৰু জলবায়ু পৰিৱৰ্তন মন্ত্ৰণালয়, ৰাষ্ট্ৰীয় বন্যপ্ৰাণী পৰিষদ আৰু মধ্যপ্ৰদেশ বন বিভাগলৈ জাননী প্ৰেৰণ কৰি পৰৱৰ্তী শুনানিৰ কমেও এসপ্তাহৰ পূৰ্বে শপতনামা দাখিল কৰিবলৈ নিৰ্দেশ দিছে। আৱেদনকাৰী ডুবেই অভিযোগ কৰা অনুসৰি, এই বিশাল পৰিমাণৰ গছ কটাৰ ফলত অঞ্চলটোৰ স্থানীয় পৰিৱেশ তন্ত্ৰ আৰু বন্যপ্ৰাণীৰ বিচৰণত গভীৰ নেতিবাচক প্ৰভাৱ পৰিব। সেয়েহে তেওঁ যোৱা বছৰৰ ৯ মে’ত পৰিৱেশ মন্ত্ৰণালয় আৰু ২২ মে’ত মধ্যপ্ৰদেশ বন বিভাগে গছ কটাৰ সন্দৰ্ভত জাৰি কৰা নিৰ্দেশনাক প্ৰত্যাহ্বান জনাইছে। গছ কটাৰ সৈতে জড়িত আৱেদনখনৰ পৰৱৰ্তী শুনানি ২২ এপ্ৰিলত আৰু হাতী কৰিডৰ সম্পৰ্কীয় আৱেদনখনৰ শুনানি ২৬ মে’ত অনুষ্ঠিত হ’ব।
আৱেদনকাৰীয়ে প্ৰস্তাৱিত চিধী-ছিংগৰৌলী-পালামু হাতী কৰিডৰৰ সীমা নিৰ্ধাৰণ কৰি ইয়াক পৰিৱেশগতভাৱে স্পৰ্শকাতৰ অঞ্চল হিচাপে ঘোষণা কৰাৰো দাবী জনাইছে। শুনানিৰ সময়ত আৱেদনকাৰীৰ অধিবক্তাই ২০১৮ আৰু ২০১৯ চনত সমগ্ৰ দেশৰ হাতী কৰিডৰসমূহক স্পৰ্শকাতৰ অঞ্চল হিচাপে ঘোষণা কৰাৰ সন্দৰ্ভত এন জি টিয়ে দিয়া নিৰ্দেশনাৰ কথা উল্লেখ কৰে। সংবাদ মাধ্যমৰ আগত ডুবে অভিযোগ কৰে যে কয়লা খনিটোৰ বাবে প্ৰয়োজনীয় অনুমোদন লাভৰ স্বাৰ্থত ইচ্ছাকৃতভাৱে হাতী কৰিডৰৰ অধিসূচনা জাৰি কৰাত পলম কৰা হৈছে। এবাৰ কৰিডৰ হিচাপে অধিসূচনা জাৰি হ‘লে কোম্পানীটোৱে সেই অঞ্চলত গছ কটা আৰু অন্যান্য কাৰ্যকলাপৰ বাবে অনুমতি লাভ নকৰিব বুলি তেওঁ দাবী কৰে।
পৰিৱেশ মন্ত্ৰণালয়ৰ নিজা এক ক্ষেত্ৰভিত্তিক প্ৰতিবেদনৰ উদ্ধৃতি দি পৰিৱেশকৰ্মীগৰাকীয়ে প্ৰকাশ কৰে যে আবণ্টিত অঞ্চলটো অতি ঘন অৰণ্যৰে আৱৰি আছে, য’ত শাল, চিচু আৰু চেগুনকে ধৰি ৫০ বিধৰো অধিক প্ৰজাতিৰ গছ পোৱা যায়। সেয়েহে এই অঞ্চলটো ব্যক্তিগত খণ্ডৰ কয়লা খননৰ বাবে মুকলি কৰি নিদিবলৈ তেওঁ দাবী জনাইছে। উল্লেখযোগ্য যে, প্ৰায় ২৭ বৰ্গ কিলোমিটাৰ জুৰি বিস্তৃত ধিৰৌলী কয়লা খনিটো মধ্যপ্ৰদেশৰ অন্যতম বৃহৎ কয়লা খনি। যোৱা বৰ্ষৰ ছেপ্টেম্বৰ মাহত আদানী গ্ৰুপে এই খনিটোত খনন কাৰ্য আৰম্ভ কৰাৰ বাবে কেন্দ্ৰীয় কয়লা মন্ত্ৰণালয়ৰ পৰা অনুমোদন লাভ কৰা বুলি সদৰী কৰিছিল।
এই সমগ্ৰ প্ৰক্ৰিয়াটোক লৈ ৰাজনৈতিক মহলতো তীব্ৰ প্ৰতিক্ৰিয়াৰ সৃষ্টি হৈছে। কংগ্ৰেছ দলেও এই প্ৰকল্পত পাৰিপাৰ্শ্বিক নীতি উলংঘা হোৱাৰ লগতে ভূমি অধিগ্ৰহণ আৰু ক্ষতিপূৰণ প্ৰদানৰ ক্ষেত্ৰত অনিয়ম সংঘটিত হোৱাৰ অভিযোগ উত্থাপন কৰিছে। যোৱা ২৭ ফেব্ৰুৱাৰীত স্থগিত হোৱা মধ্যপ্ৰদেশ বিধানসভাৰ বাজেট অধিৱেশনত কংগ্ৰেছ বিধায়কসকলে অভিযোগ কৰে যে খনন কাৰ্যৰ বাবে যি আঠখন গাঁৱৰ মাটি অধিগ্ৰহণ কৰা হৈছে, সেই গাঁৱৰ নিৱাসীসকলক চৰকাৰে উচিত ক্ষতিপূৰণ প্ৰদান কৰা নাই।
