আদানি গ্ৰুপৰ বাবে ২০২৩ বৰ্ষ একেবাৰে ভালদৰে যোৱা নাই। জানুৱাৰীৰ শেষত হিণ্ডেনবাৰ্গৰ প্ৰতিবেদনৰ পিছত এইবাৰ ডি বি পাৱাৰ( DB Power) অধিগ্ৰহণত খালে মুখথেকেচা। জানিব পৰা গৈছে যে আদানি গ্ৰুপে আদানি পাৱাৰ আৰু ডি বি পাৱাৰ চুক্তিৰ পৰা আঁতৰি আহিছে। আদানি গ্ৰুপৰ ফালৰ পৰাই অৱশ্যে তথ্য পোৱা গৈছে যে ডি বি পাৱাৰ অধিগ্ৰহণত আদানী গ্ৰুপৰ অন্তিম তাৰিখৰ ম্যাদ উকলি গৈছে। এই চুক্তি সম্পূৰ্ণ কৰাৰ অন্তিম তাৰিখ আছিল ১৫ জানুৱাৰী।
২০২২-ৰ আগষ্টত আদানি পাৱাৰে ডি বি পাৱাৰ অধিগ্ৰহণৰ কথা ঘোষণা কৰে। কিন্তু শেষত ম্যাদৰ ভিতৰত চুক্তিটো সম্পূৰ্ণ নহ’ল আদানি পাৱাৰৰ। উল্লেখ্য যে এই চুক্তি পূৰ্বে কেইবাবাৰো পিছুৱাই দিয়া হৈছিল। অৱশেষত গ্ৰুপটোৱে অধিগ্ৰহণৰ আশা এৰি দিবলৈ বাধ্য হ’ল।
আদানি পাৱাৰ আৰু ডি বি পাৱাৰৰ মাজত অধিগ্ৰহণ চুক্তিৰ মূল্য আছিল ৭০১৭ কোটি টকা। আৰম্ভণিতে চুক্তিটো সম্পাদন কৰাৰ সময়সীমা আছিল ২০২২ৰ ৩১ অক্টোবৰলৈকে। পিছত ইয়াক নৱেম্বৰলৈকে সম্প্ৰসাৰিত কৰা হৈছিল। সেই কাৰ্যকাল পুনৰ ৩১ ডিচেম্বৰত বৃদ্ধি কৰা হৈছিল আৰু অৱশেষত ইয়াক ১৫ জানুৱাৰীলৈ বৃদ্ধি কৰা হয়। কিন্তু শেষত অধিগ্ৰহণ চুক্তি বাতিল কৰা হয়।
ডি বি পাৱাৰ মধ্য প্ৰদেশৰ দৈনিক ভাস্কৰ গ্ৰুপৰ এটা সহায়ক সংস্থা। বৰ্তমান, বিদ্যুৎ কোম্পানীটোৱে ছত্তীশগড়ৰ জাঞ্জগিৰৰ চম্পা জিলাত 2×600 মেগাৱাট বিদ্যুৎ প্ৰকল্প এটা চলাই আছে। আদানি গ্ৰুপৰ পৰিকল্পনা আছিল ডি বি পাৱাৰ অধিগ্ৰহণৰ জৰিয়তে ছত্তীশগড়ত ইয়াৰ ব্যৱসায় সম্প্ৰসাৰিত কৰা।
আদানি গ্ৰুপে এনে এটা সময়ত অধিগ্ৰহণ বাতিল কৰাৰ সিদ্ধান্ত লৈছে যেতিয়া হিণ্ডেনবাৰ্গৰ প্ৰতিবেদনে আদানি সাম্ৰাজ্যক অস্থিৰ কৰি তুলিছে। এই বছৰৰ ২৪ জানুৱাৰীৰ পৰা আদানি গ্ৰুপে কোম্পানীটোৰ শ্বেয়াৰত ১০ লাখ কোটি টকা হেৰুৱাইছে। আদানি এণ্টাৰপ্ৰাইজে শেহতীয়াকৈ অলপ সকাহ পাবলৈ সক্ষম হৈছে যদিও বাকী ষ্টকবোৰে বাল সঁহাৰি প্ৰদৰ্শন কৰা নাই।
আদানি পাৱাৰৰ শেহতীয়া তিনিমাহৰ ফলাফলো আশাব্যঞ্জক নহয়। ২০২২ ডিচেম্বৰৰ কোৱাৰ্টাৰত আদানি পাৱাৰৰ ফলাফল যথেষ্ট হতাশাজনক। কোম্পানীটোৰ মুঠ লাভ ৯৬শতাংশ হ্ৰাস হৈ ৮.৭৭ কোটি টকা হৈছে। কোৱা হৈছে যে কোম্পানীটোৰ বৃহৎ ব্যয়ৰ বাবে মুঠ লাভ হ্ৰাস পাইছে। এবছৰ পূৰ্বে ডিচেম্বৰ কোৱাৰ্টাৰত আদানি পাৱাৰৰ মুঠ লাভ আছিল ২১৮.৪৯ কোটি টকা।
