আজি অসম সংগ্ৰামী মঞ্চ এৰি নতুন আঞ্চলিক ৰাজনৈতিক দল অসম জাতীয় পৰিষদৰ সৈতে চামিল হ’ল অদীপ ফুকন।
অসম সংগ্ৰামী মঞ্চৰ কাৰ্য্যকৰী সভাপতি হিচাপে কাৰ্য্যনিৰ্বাহ কৰা অদীপ ফুকনৰ সৈতে মঞ্চৰ বহুকেইগৰাকী উচ্চ পদবীৰ নেতা তথা বিষয়ববীয়া AJP ৰ সৈতে চামিল হয়।
তাৰ ভিতৰত অন্যতম অসম সংগ্ৰামী মঞ্চৰ ৰাজ্যিক উপ সভাপতি ৰবীন্দ্ৰ কুমাৰ দত্ত, সাধাৰণ সম্পাদক লুচি নেওগ, অমিতাভ বৰঠাকুৰ, গৌতম পাঠক সাংগঠনিক সম্পাদক, অজয় তালুকদাৰ, দিলীপ দাস, কিশোৰ হাজৰিকা(সভাপতি নলবাৰী জিলা), কমলা কলিতা(সভাপতি, ৰঙিয়া জিলা সমিতি), জিয়াউৰ ৰহমান(সাধাৰণ সম্পাদক, হোজাই জিলা সমিতি), নিতুল পাটোৱাৰী(সাধাৰণ সম্পাদক, বৰপেটা জিলা সমিতি)কে ধৰি অন্য বহুকেইগৰাকী।
ইপিনে, AJP ত যোগদান কৰিয়েই ৰাজ্যিক সমন্বয়কৰ দায়িত্ব লাভ কৰিলে অদীপ ফুকনে। পূৰ্বতে ৰাজ্যিক সমন্বয়ক হিচাপে প্ৰাক্তন মন্ত্ৰী জগদীশ ভুঞা আছিল যদিও এতিয়া অদীপ ফুকন অন্তৰ্ভুক্ত হোৱাৰ পাছত দুগৰাকী ৰাজ্যিক সমন্বয়কৰ দায়িত্বত থাকিব।
ইপিনে, আছুৰ প্ৰাক্তন নেতা চিত্তৰঞ্জন বসুমতাৰী আৰু ৰাজু ফুকনৰ লগতে নতুনকৈ ৰবীন্দ্ৰ কুমাৰ দত্ত, লুচি নেওগ আৰু অমিতাভ বৰঠাকুৰক অসম জাতীয় পৰিষদৰ আহ্বায়কৰ দায়িত্ব প্ৰদান কৰে।
আনহাতে, অসম জাতীয় পৰিষদত যোগদান কৰাৰ পাছতেই বিজেপি চৰকাৰৰ বিৰুদ্ধে সৰব হৈ পৰে অদীপ ফুকন।
তেওঁ কয় ‘দিল্লীৰ বিজেপি চৰকাৰখন এক ৰাষ্ট্ৰীয় সমস্যা। অসমৰ বিজেপি চৰকাৰ এক জাতীয় সমস্যা। এই সমস্যাৰ সমাধানৰ বাবে শক্তিশালী ৰাজনৈতিক ধাৰা অধিক শক্তিশালী কৰিব লাগিব।এক নতুন সময় আহিছে ইয়াক উলাই কৰিলে আগন্তুক ৫ বছৰ সংকটকালত পৰিব, কিন্তু আমি এই সংকটকাললৈ নিব বিচৰা নাই।‘উল্লেখযোগ্য যে কিছুবছৰ পূৰ্বে অদীপ কুমাৰ ফুকনে বিজেপিতো যোগদান কৰি পিছত দলৰ পৰা ওলাই আহিছিল।
