ইছৰোৰ সৌৰ মহাকাশযান আদিত্য-এল১য়ে পৃথিৱীৰ কক্ষপথত অন্তিম পৰ্যায় সম্পূৰ্ণ কৰিছে। কক্ষপথ সলনি কৰি মহাকাশযানখন পৃথিৱীৰ মাধ্যাকৰ্ষণ শক্তিৰ পৰা ওলাই গৈছে। এইবাৰ ইয়াৰ লক্ষ্য হৈছে সূৰ্য্য আৰু পৃথিৱীৰ মাজৰ লেগ্ৰেঞ্জ বিন্দু বা L1 বিন্দু।
ইছৰো এক্স হেণ্ডলে জনোৱা মতে, সোমবাৰে ভাৰতীয় সময় অনুসৰি নিশা প্ৰায় ২ বজাত আদিত্য-এল১য়ে পঞ্চম কক্ষপথ সলনি কৰি পৃথিৱীৰ আকৰ্ষণ শক্তিৰ বাহিৰলৈ ওলাই যায়।
ইছৰোৱে এই মহাকাশযানখনক সাময়িকভাৱে পৃথিৱীৰ মাধ্যাকৰ্ষণ ক্ষেত্ৰৰ বাহিৰৰ ট্ৰেন্স লেগ্ৰেঞ্জিয়ান বিন্দুত স্থাপন কৰিছে। তাৰ পৰা আদিত্য-এল১ সূৰ্য্য আৰু পৃথিৱীৰ মাজৰ এল১ বিন্দুত উপনীত হ’ব। ১১০ দিনৰ পাছত মহাকাশযানখনক এল ১ৰ ওচৰৰ আন এটা কক্ষপথলৈ প্ৰেৰণ কৰা হ’ব বুলি ইছৰোৱে জানিবলৈ দিয়ে।
লগতে পঢ়ক: গণেশ চতুর্থী বিশেষ: গণেশ পূজাত বিশেষ তাৎপৰ্যপূৰ্ণ ৰিদ্ধি-সিদ্ধি; জানেনে তেওঁলোক কোন?
ইতিমধ্যে ইছৰোৱে পৃথিৱীৰ পৰা বহু দূৰৈৰ মহাজাগতিক বস্তুৰ দিশলৈ মহাকাশযান প্ৰেৰণ কৰিছে। পৃথিৱীৰ কক্ষপথৰ পৰা মহাকাশযান পঠিয়াবলৈ এইবাৰ পঞ্চমবাৰৰ বাবে সফল হৈছে। ইয়াৰ পূৰ্বে ভাৰতীয় মহাকাশ গৱেষণা সংস্থাৰ বিজ্ঞানীসকলে চন্দ্ৰযান-৩ ত একে সফলতা লাভ কৰিছিল।
যোৱা ২ ছেপ্টেম্বৰত অন্ধ্ৰ প্ৰদেশৰ শ্ৰীহৰিকোটাৰ সতীশ ধৱন মহাকাশ গৱেষণা কেন্দ্ৰৰ পৰা সূৰ্য্যৰ পিনে উৰা মাৰিছিল আদিত্য-এল১। ইয়াৰ পিছত পৃথিৱীৰ মাধ্যাকৰ্ষণ শক্তিৰ অধীনত সৌৰ যানখন ইয়াৰ চাৰিওফালে ঘূৰি আছিল। পৃথিৱীৰ ওচৰত মুঠ পাঁচটা কক্ষপথ পৰিৱৰ্তনৰ পিছত অৱশেষত ই ইয়াৰ আকৰ্ষণৰ পৰা হাত সাৰিবলৈ সক্ষম হয়।
Aditya-L1 Mission:
Off to Sun-Earth L1 point!The Trans-Lagrangean Point 1 Insertion (TL1I) maneuvre is performed successfully.
The spacecraft is now on a trajectory that will take it to the Sun-Earth L1 point. It will be injected into an orbit around L1 through a maneuver… pic.twitter.com/H7GoY0R44I
— ISRO (@isro) September 18, 2023
আদিত্য-এল১ সূৰ্য্য আৰু পৃথিৱীৰ মাজৰ L1 বিন্দুত উপস্থিত হৈ সূৰ্য্যক নিবিড়ভাৱে নিৰীক্ষণ কৰিব। পৃথিৱীৰ পৰা ইয়াৰ দূৰত্ব হ’ব ১৫ লাখ কিলোমিটাৰ। ইয়াৰ ফলস্বৰূপে ভাৰতীয় বিজ্ঞানীসকলে সূৰ্য্যৰ বিষয়ে বহুতো অজ্ঞাত তথ্য জানিব পাৰিব বুলি আশা কৰা হৈছে।
