মাত্ৰ কৌতুহলৰ বাবেই কাকো খবৰ নিদিয়াকৈ কাবুলৰ পৰা দিল্লীলৈ আহিছিল এজন নাবালক। দিল্লী অভিমুখী বিমানৰ লেণ্ডিং গিয়াৰত তেওঁ আত্মগোপন কৰি আছিল ১৩ বছৰীয়া কিশোৰজনে। তাতেই ২ ঘন্টা লুকাই ভাৰত পালেহি কিশোৰটি।
ইন্দিৰা গান্ধী আন্তঃৰাষ্ট্ৰীয় বিমানবন্দৰত বিমানখন অৱতৰণ কৰাৰ পিছতহে বিষয়টো পোহৰলৈ আহে।
চৰকাৰী সূত্ৰৰ মতে, কাবুল বিমানবন্দৰৰ ‘নিষিদ্ধ’ অঞ্চলত প্ৰৱেশ কৰিবলৈ সক্ষম হয় কিশোৰটি। ইয়াৰ পিছত তেওঁ কে এ এম এয়াৰৰ বিমান আৰ কিউ-৪৪০১ৰ পিছফালে থকা চেণ্ট্ৰেল লেণ্ডিং গিয়াৰ কম্পাৰ্টমেণ্টৰ ভিতৰত লুকাই থাকে।
কাবুলৰ পৰা অহা এই বিমানখন প্ৰায় দুঘণ্টাৰ অন্তত দিল্লীত অৱতৰণ কৰে। দেওবাৰে পুৱা প্ৰায় ১১ বজাত বিমানখন আহি দিল্লীত উপস্থিত হয়।
ইয়াৰ পিছত বিমানখনৰ কৰ্মচাৰীয়ে বিমানখনৰ ওচৰতে নাবালকজন ঘূৰি ফুৰা দেখি লগে লগে বিমানবন্দৰৰ নিৰাপত্তাৰক্ষীক খবৰ দিয়ে।
সূত্ৰ অনুসৰি নাবালকজনে কয় যে তেওঁ কেৱল কৌতুহলৰ বাবেই বিমানত উঠিছিল। লেণ্ডিং গিয়াৰত বহিলে কি বিপদ হ’ব পাৰে সেই বিষয়ে তেওঁৰ কোনো ধাৰণা নাছিল।
বিষয়াসকলে জনোৱা মতে, দেওবাৰে নিশা প্ৰায় ১২:৩০ বজাত বিমানখন দিল্লীৰ পৰা কাবুললৈ উভতি গৈছিল। তেতিয়াই কিশোৰজনক পুনৰ কাবুললৈ উভটাই পঠোৱা হয়।
