শেহতীয়াকৈ দিল্লীত নিযুক্তি দিয়া হৈছে তালিবানৰ প্ৰথমগৰাকী ৰাষ্ট্ৰদূতক। ইয়াৰ লগে লগে চৰ্চা আৰম্ভ হৈছে যে ভাৰতে এতিয়া আফগানিস্তানৰ তালিবান চৰকাৰক আনুষ্ঠানিকভাৱে স্বীকৃতি দিয়াৰ পথত অগ্ৰসৰ হৈছে নেকি। অপাৰেচন সিন্দুৰৰ সময়ত ভাৰতীয় প্ৰতিনিধি আনন্দ প্ৰকাশে কাবুল ভ্ৰমণ কৰিছিল আৰু পৰৱৰ্তী সময়ত পাকিস্তানৰ হেঁচাৰ মাজতো আফগান বৈদেশিক মন্ত্ৰী আমিৰ খান মুত্তাকী ভাৰতলৈ আহিছিল। সেই সময়তেই ধাৰণা কৰা হৈছিল যে ভাৰতে হয়তো তালিবানৰ সৈতে কূটনৈতিক সম্পৰ্ক স্থাপন কৰিব। অৱশেষত দিল্লীৰ পৰা আশ্ৰফ ঘনী চৰকাৰৰ শেষ চিহ্নও মচি পেলোৱা হ’ল আৰু তালিবানে ক্ষমতা দখল কৰাৰ পিছত প্ৰথমবাৰৰ বাবে ভাৰতত এজন কূটনীতিবিদক নিযুক্তি দিয়া হ’ল। দিল্লীত এই দায়িত্ব অৰ্পণ কৰা হৈছে নুৰ আহমেদ নূৰক। এতিয়া প্ৰশ্ন উত্থাপন হৈছে যে ইছলামবাগ আৰু শ্বাংহাইৰ যুটীয়া প্ৰত্যাহ্বানৰ মুখত দিল্লীয়ে এইবাৰ তালিবান চৰকাৰক স্বীকৃতি দিব নেকি।
অপাৰেচন সিন্দুৰৰ সময়ত আফগান তালিবান চৰকাৰে ভাৰতৰ পক্ষত থিয় দিয়াৰ কথা উল্লেখ কৰিছিল। ভাৰতৰ বৈদেশিক মন্ত্ৰী এছ জয়শংকৰক সাক্ষাৎ কৰাৰ পিছত আমিৰ খান মুত্তাকীয়ে সংবাদমেলত জনাইছিল যে তেওঁলোকে নিৰাপত্তা সহযোগিতাৰ বিষয়ত বিস্তৰ আলোচনা কৰিছে। তেওঁলোকে স্পষ্ট কৰি দিছিল যে আফগানিস্তানৰ মাটিক কোনো দেশৰ বিৰুদ্ধে ব্যৱহাৰ কৰিবলৈ দিয়া নহয় আৰু এই বিষয়ত দুয়োখন দেশৰ মাজত যোগাযোগ অব্যাহত থাকিব। এই বন্ধুত্বৰ প্ৰতিদান স্বৰূপেই হয়তো এইবাৰ দিল্লীত আফগান উচ্চায়ুক্তত নতুন ৰাষ্ট্ৰদূত হিচাপে নূৰ আহমেদ নূৰক নিযুক্তি দিয়া হৈছে। বিশেষজ্ঞসকলৰ মতে এয়া ভাৰতৰ পৰা ইছলামবাগ আৰু চাংহাইলৈ প্ৰেৰণ কৰা এক শক্তিশালী বাৰ্তা।
নূৰ আহমেদ নূৰৰ তালিবানৰ সৈতে সম্পৰ্ক অতি পুৰণি। তালিবানে দ্বিতীয়বাৰৰ বাবে আফগানিস্তানত ক্ষমতা দখল কৰাৰ পিছত তেওঁ বৈদেশিক মন্ত্ৰালয়ৰ প্ৰথম ৰাজনৈতিক সঞ্চালক হিচাপে কাম কৰিছিল। তেওঁ ইতিমধ্যে দিল্লীত উপস্থিত হৈ নিজৰ কাৰ্যভাৰ গ্ৰহণ কৰিছে। বৰ্তমানৰ কূটনৈতিক পৰিস্থিতিত পাকিস্তানে এফালে আমেৰিকা আৰু আনফালে চীনৰ সৈতে ঘনিষ্ঠতা বঢ়াই ভাৰতৰ ওপৰত হেঁচা দিয়াৰ চেষ্টা কৰিছে। এনে অৱস্থাত পাকিস্তানৰ বিৰোধী হিচাপে পৰিচিত তালিবানৰ সৈতে বন্ধুত্ব গঢ়ি ভাৰতে পাকিস্তানক ওলোটাই হেঁচাত ৰাখিব বিচাৰিছে বুলি চৰ্চা চলিছে।
কেৱল কূটনীতিয়েই নহয়, শেহতীয়াকৈ স্বাস্থ্য খণ্ডতো ভাৰত আৰু আফগানিস্তানৰ মাজত সম্পৰ্ক অধিক শক্তিশালী হোৱা দেখা গৈছে। আফগান স্বাস্থ্যমন্ত্ৰী মৌলৱী নূৰ জালাল জালালীয়ে উল্লেখ কৰিছে যে পাকিস্তানৰ সৈতে সম্পৰ্কৰ অৱনতি ঘটাৰ পৰিপ্ৰেক্ষিতত আফগানিস্তানৰ ঔষধৰ প্ৰয়োজনীয়তা পূৰণৰ বাবে ভাৰত তেওঁলোকৰ বাবে এক অন্যতম গুৰুত্বপূৰ্ণ বিকল্প হৈ পৰিছে। মুত্তকীৰ ভাৰত ভ্ৰমণৰ পিছৰে পৰা দুয়োখন দেশৰ সম্পৰ্ক এক নতুন মাত্ৰালৈ গৈছে। যদিও ভাৰতে এতিয়াও আনুষ্ঠানিকভাৱে তালিবান চৰকাৰক স্বীকৃতি দিয়া বুলি ঘোষণা কৰা নাই, তথাপিও জয়শংকৰৰ সৈতে হোৱা আলোচনাৰ পাছত ভাৰতে তালিবানে নিযুক্তি দিয়া কূটনীতিবিদসকলক গ্ৰহণ কৰিবলৈ মান্তি হৈছে।
বৰ্তমান আফগান নাগৰিকসকলে চিকিৎসা আৰু ব্যৱসায়িক কামত ভাৰতীয় ভিছাৰ বাবে আবেদন কৰাৰ সুযোগ লাভ কৰিছে। ইয়াৰ পূৰ্বে ২০২৩ চনত তালিবানে এজন কূটনীতিবিদক দিল্লীলৈ পঠিয়াবলৈ চেষ্টা কৰিছিল যদিও সেই সময়ত দূতাবাসৰ কৰ্মচাৰীসকলে তেওঁক গ্ৰহণ কৰা নাছিল। পৰৱৰ্তী সময়ত ইক্ৰামুদ্দিন কামিলক মুম্বাইত থকা কনছুলেটত নিযুক্তি দিয়া হৈছিল। এতিয়ালৈকে দিল্লীত আশ্ৰফ ঘনী চৰকাৰৰ সময়ত নিযুক্তি পোৱা মহম্মদ ইব্ৰাহিমখিলে দায়িত্ব পালন কৰি আছিল। কিন্তু নূৰ আহমেদ নূৰৰ নিযুক্তিয়ে দিল্লীৰ পৰা পূৰ্বৰ চৰকাৰৰ সকলো অস্তিত্ব মচি পেলাই এক নতুন কূটনৈতিক অধ্যায়ৰ সূচনা কৰিছে।
