বিগত তিনি বছৰ ধৰি ক’ভিড মহামাৰীৰ লগতে ভুৱা বাতৰিৰ দ্ৰুত সম্প্ৰসাৰণে বিশ্বজুৰি আতংকৰ সৃষ্টি কৰি থকাৰ সময়তে শেহতীয়াকৈ আফ্ৰিকাৰ কেইবাখনো দেশত ইব’লা ভাইৰাছৰ প্ৰাদুৰ্ভাৱে পুনৰ এক জটিল পৰিস্থিতিৰ সূচনা কৰিছে। আফ্ৰিকাত ইতিমধ্যে ছশৰো অধিক লোক এই ভাইৰাছত আক্ৰান্ত হোৱাৰ লগতে শতাধিক লোকৰ মৃত্যু ঘটিছে, যাৰ ফলত বিশ্বজুৰি এই ৰোগে ক’ভিডৰ দৰে ভয়াবহ ৰূপ ল’ব নেকি তাক লৈ তীব্ৰ শংকাৰ সৃষ্টি হৈছে। অৱশ্যে বিশ্ব স্বাস্থ্য সংস্থাৰ প্ৰাক্তন মুখ্য বিজ্ঞানী সৌম্যা স্বামীনাথনে প্ৰকাশ কৰা মতে, ইব’লাৰ বৰ্তমানৰ প্ৰাদুৰ্ভাৱ উদ্বেগজনক যদিও ভাৰতত বৰ্তমানলৈকে এই ভাইৰাছ বিয়পি পৰাৰ কোনো পৰিস্থিতি সৃষ্টি হোৱা নাই আৰু দেশবাসীয়ে এই মুহূৰ্তত শংকিত হোৱাৰ পৰিৱৰ্তে কেৱল সতৰ্কতা অৱলম্বন কৰাটো প্ৰয়োজন।
২০১৯ চনৰ পৰা ২০২২ চনলৈ ক’ভিড মহামাৰীৰ সময়ছোৱাত বিশ্ব স্বাস্থ্য সংস্থাৰ প্ৰধান বিজ্ঞানী হিচাপে কাৰ্যনিৰ্বাহ কৰা আৰু সংস্থাটোৰ সঞ্চালক প্ৰধান টেড্ৰছ আডানম গেব্ৰিয়েছাছৰ সৈতে প্ৰত্যক্ষভাৱে কাম কৰা সৌম্যা স্বামীনাথনে এই ৰোগৰ প্ৰাদুৰ্ভাৱৰ সন্দৰ্ভত গুৰুত্বপূৰ্ণ মত প্ৰকাশ কৰিছে। তেওঁ উল্লেখ কৰিছে যে পশ্চিম আফ্ৰিকাৰ দেশসমূহৰ পৰা সমগ্ৰ বিশ্বলৈ মানুহৰ যাতায়াত অব্যাহত আছে আৰু সেই দেশসমূহত বহুসংখ্যক ভাৰতীয় লোকেও বসবাস কৰে। যিহেতু এই যাতায়াত সম্পূৰ্ণৰূপে বন্ধ কৰিব নোৱাৰি, সেয়েহে ভাৰতৰ বাবে সতৰ্কতামূলক ব্যৱস্থা গ্ৰহণ কৰাটো অপৰিহাৰ্য হৈ পৰিছে। আনহাতে, ইব’লাৰ সংক্ৰমণ নিয়ন্ত্ৰণৰ বাবে বৰ্তমান বিশ্ব স্বাস্থ্য সংস্থা আৰু আফ্ৰিকা চেণ্টাৰ্ছ ফৰ ডিজিজ কণ্ট্ৰ’ল এণ্ড প্ৰিভেনচনে কংগো চৰকাৰৰ সৈতে যুটীয়াভাৱে পৰিকল্পনা প্ৰস্তুত কৰিছে। জানিব পৰা মতে, কংগোৰ লগতে কেনিয়াতো এই ভাইৰাছৰ সংক্ৰমণ ক্ৰমাৎ বৃদ্ধি পাইছে।
বিজ্ঞানীগৰাকীয়ে লগতে পৰামৰ্শ দিছে যে যিহেতু বৰ্তমানলৈকে ইব’লা প্ৰতিৰোধৰ বাবে কোনো নিৰ্দিষ্ট ছিটা বা চিকিৎসাপদ্ধতি আৱিষ্কাৰ হোৱা নাই, সেয়েহে সংক্ৰমণ নিয়ন্ত্ৰণৰ বাবে আক্ৰান্ত ব্যক্তিৰ সংস্পৰ্শলৈ অহা লোকসকলক চিনাক্ত কৰি তেওঁলোকক আছুতীয়াকৈ ৰখাটোৱেই একমাত্ৰ ফলপ্ৰসূ উপায়। এই ভাইৰাছৰ মূল বাহক হৈছে এবিধ বিশেষ প্ৰজাতিৰ ফলভোজী বাদুলি, যিয়ে নিজে আক্ৰান্ত নোহোৱাকৈয়ে ভাইৰাছবিধ কঢ়িয়াই লৈ ফুৰে। পৰৱৰ্তী সময়ত এই বাদুলিৰ জৰিয়তে অন্যান্য বন্যপ্ৰাণীৰ দেহলৈ ভাইৰাছ বিয়পে আৰু তেনে আক্ৰান্ত প্ৰাণীৰ মাংস ভক্ষণ কৰিলে বা সংস্পৰ্শলৈ আহিলে মানুহৰ দেহলৈকো এই সংক্ৰমণ ঘটে। মানুহৰ দেহত এবাৰ প্ৰৱেশ কৰাৰ পিছত আক্ৰান্ত ব্যক্তিৰ তেজ বা শৰীৰৰ জুলীয়া পদাৰ্থ, হাঁচি আৰু কাঁহৰ জৰিয়তে ই আন সুস্থ লোকলৈ বিয়পি পৰে।
ইব’লা ভাইৰাছত আক্ৰান্ত হোৱা ব্যক্তিৰ দেহত প্ৰাথমিক অৱস্থাত জ্বৰ, চৰ্দি-কাঁহ আৰু পেটৰ সংক্ৰমণৰ দৰে লক্ষণ দেখা যায়। সময়ৰ লগে লগে এই ভাইৰাছে ৰোগীৰ হৃদযন্ত্ৰ, যকৃৎ আৰু বৃক্কৰ দৰে গুৰুত্বপূৰ্ণ অংগসমূহৰ বিস্তৰ ক্ষতিসাধন কৰে। পৰৱৰ্তী পৰ্যায়ত শৰীৰৰ ভিতৰত ৰক্তক্ষৰণ আৰম্ভ হয় আৰু ক্ৰমান্বয়ে একাধিক অংগ বিকল হৈ পৰাৰ ফলত অৱশেষত ৰোগীৰ মৃত্যু ঘটে।
এই ভয়াৱহ ভাইৰাছৰ সংক্ৰমণ ৰোধ কৰাৰ উদ্দেশ্যে প্ৰভাৱিত অঞ্চলসমূহত বিশ্ব স্বাস্থ্য সংস্থাকে ধৰি অন্যান্য আন্তঃৰাষ্ট্ৰীয় স্বাস্থ্য গোটসমূহে নিৰন্তৰ নিৰীক্ষণ ব্যৱস্থা কটকটীয়া কৰি তুলিছে। যিকোনো স্থানত সংক্ৰমণৰ সামান্যতম লক্ষণ দেখা পালেই লগে লগে পৰীক্ষা কৰাৰ লগতে প্ৰয়োজনীয় নিৰাপত্তামূলক পদক্ষেপ গ্ৰহণ কৰি পৰিস্থিতি নিয়ন্ত্ৰণলৈ আনিবলৈ সংশ্লিষ্ট কৰ্তৃপক্ষসমূহক কঠোৰ নিৰ্দেশনা প্ৰদান কৰা হৈছে।
