কালি কাৰাৰুদ্ধ কৃষক মুক্তি সংগ্ৰাম সমিতিৰ উপদেষ্টা অখিল গগৈয়ে জনোৱা আহ্বানৰ প্ৰতি সঁহাৰি জনাই ৭০ সংগঠনৰ সৈতে একত্ৰিত হ’ল কৃষক মুক্তি সংগ্ৰাম সমিতি।
মঙ্গলবাৰে কৃষক মুক্তি সংগ্ৰাম সমিতিৰ কেন্দ্ৰীয় কাৰ্যালয়ত অনুষ্ঠিত হোৱা বৈঠকত কৃষক মুক্তিৰ নেতৃত্বত আৰু ৭০ সংগঠনৰ উদ্যোগত এক নতুন ৰাজনৈতিক দল গঠনৰ সিদ্ধান্ত গ্ৰহণ কৰা হয়।
এই বৈঠকৰ পাছতে ৭০ সংগঠনৰ নেতৃত্বই এক সংবাদমেল সম্বোধন কৰে কৃষক মুক্তি সংগ্ৰাম সমিতিৰ কেন্দ্ৰীয় কাৰ্য্যালয়ত।
উক্ত সংবাদমেলতে কৃষক মুক্তি সংগ্ৰাম সমিতিৰ সাধাৰণ সম্পাদক ধৈৰ্য কোঁৱৰে কয় ‘বিজেপিক উৎখাত কৰাৰ সংকল্প লৈ তেওঁলোকক পৰাভূত কৰিবলৈ আমি টঙালি বান্ধিছো। বিজেপিক ২০২১ত পৰাভূত কৰিব নোৱাৰিলে অসমৰ জাতীয় জীৱন কেতিয়াও নিৰাপদ নহ’ব।’
‘ফেচিষ্ট বিজেপিয়ে এনেকুৱা এটা পৰিস্থিতিৰ সৃষ্টি কৰিছে যাতে অন্যই দ্বি-মত প্ৰকাশ কৰিব নোৱাৰে। বাক স্বাধীনতা প্ৰকাশ কৰিব নোৱাৰা পৰিৱেশৰ সৃষ্টি কৰিছে। কেইবাটাও অসম বিৰোধী সিদ্ধান্ত লৈ অসমীয়া জাতিক তচনচ কৰি দিব বিচাৰিছে।’ ধৈৰ্যই লগতে কয়।
উক্ত সংবাদমেলতে বিজেপি চৰকাৰক কটাক্ষ কৰি ধৈৰ্যই কয় ‘দিল্লীৰ দালালি কৰা সৰ্বানন্দ সোণোৱাল আৰু হিমন্ত বিশ্ব শৰ্মাক অসমৰ ৰাজনীতিৰ পৰা উৎখাত কৰি লাগিব। অসমৰ পৰা আৰএছএছ বিজেপিক পুলিয়ে-পুখালিয়ে উভালি পেলাব লাগিব। তেনেকুৱা এক সংকল্প ৭০ সংগঠনৰ মজিয়াত লোৱা হৈছে।’
আনহাতে, উক্ত সংবাদমেলতে উপস্থিত থাকি টাই আহোম ছাত্ৰ সন্থাৰ যুটীয়া সম্পাদক মিলন বুঢ়াগোহাঁইয়ে কয় ‘আজিৰ দিনটোত কেইটামান ঐতিহাসিক সিদ্ধান্ত লোৱা হৈছে। অসমত ৰাজনৈতিক দলৰ উত্থান হ’বলৈ হ’লে সকলো একত্ৰিত হ’ব লাগিব। কৃষক মুক্তি সংগ্ৰাম সমিতিৰ নেতৃত্বত এই ৰাজনৈতিক দলটো গঠন কৰাৰ পোষকতা কৰা হৈছে।’
ইপিনে, আজিৰ বৈঠকত হোৱা সিদ্ধান্ত সম্পৰ্কেও তেওঁ উল্লেখ কৰে।
তেওঁ উল্লেখ কৰা অনুসৰি ‘অসমত আঞ্চলিকতাবাদী ৰাজনৈতিক দলৰ উত্থান হ’বলৈ হ’লে এটা দল, এখন পতাকা আৰু এখন সংবিধানৰ অধীনত হ’ব লাগিব।’
ইপিনে, টাই আহোম ছাত্ৰ সন্থাই কাইলৈ হোটেল প্ৰাগ কন্টিনেন্টেলত আছু আৰু ৩০ জাতি-জনগোষ্ঠীয় সংগঠনৰ সৈতে আলোচনা অনুষ্ঠিত হ’ব বুলি জানিবলৈ দি তেওঁ লগতে কয় ‘সেই আলোচনাত উপস্থিত থাকি আমি সকলোকে একত্ৰিত হৈ বিজেপিৰ বিৰুদ্ধে যুঁজ দিবলৈ পৰামৰ্শ দিম।’
‘যদি আছু অসম জাতীয়তাবাদী যুৱ ছাত্ৰ পৰিষদ আৰু কৃষক মুক্তি সংগ্ৰাম সমিতি একত্ৰিত হৈ প্ৰতিদ্বন্দ্বিতা নকৰে বিজেপিক ৱাক অভাৰ দিয়া হ’ব।’ সংবাদমেলত বুঢ়াগোহাঁইয়ে এইদৰে কয়।
আনহাতে, শিৱসাগৰৰ উপ নিৰ্বাচনত কৃষক নেতা অখিল গগৈক প্ৰক্ষেপ কৰা হ’ব বুলি বৈঠকত সিদ্ধান্ত গ্ৰহণ কৰা হৈছে বুলি সদৰী কৰি তেওঁ কয় ‘নিৰ্দলীয়ভাৱে তেওঁ প্ৰতিদ্বন্দ্বিতা কৰাৰ সিদ্ধান্ত গ্ৰহণ কৰা হৈছে। অখিল গগৈলৈ অনুমতি বিচাৰি পত্ৰ প্ৰেৰণ কৰাৰ সিদ্ধান্ত গ্ৰহণ কৰা হৈছে।’
ইপিনে, সংবাদমেলত উপস্থিত থাকি ৭০ সংগঠনৰ অন্যতম নেতৃত্ব মহেন্দ্ৰ দিহিঙীয়াই কয় ‘CAA বিৰোধী সংগ্ৰাম পুনৰ আৰম্ভ কৰা হ’ব। গাঁৱে ভুঞে এই সংগ্ৰাম লৈ যোৱা হ’ব। প্ৰস্তাৱিত কৃষক মুক্তি সংগ্ৰাম সমিতিৰ ৰাজনৈতিক দলৰ ক্ষেত্ৰত তেওঁলোকৰ নেতৃত্বত আৰু ৭০ সংগঠনৰ উদ্যোগত বিকল্প ৰাজনৈতিক দল প্ৰতিষ্ঠা কৰিবলৈ আগবাঢ়িম।’
‘জাতি মাটি ভেটিৰ মিছা শ্ল’গান দি বিজেপি চৰকাৰে অসমীয়া জাতিটোক কোঙা কৰি পেলালে। বিজেপিয়ে দিয়া প্ৰতিশ্ৰুতি তেওঁলোকে নিজে ধৰি ৰাখিব নোৱাৰিলে। বিজেপিক শত্ৰু হিচাপে পৰিগণিত কৰিছো।’ দিহিঙ্গীয়াই এইদৰে কয়।
আনহাতে, উক্ত সংবাদমেলতে উপস্থিত থাকি টাই আহোম যুৱ পৰিষদৰ কাৰ্যকৰী সভাপতি লোহিত গগৈয়ে কয় ‘কৃষক মুক্তি সংগ্ৰাম সমিতি, সদৌ অসম ছাত্ৰ সন্থা আৰু অসম জাতীয়তাবাদী যুৱ ছাত্ৰ পৰিষদে উমৈহতীয়াভাৱে সুদৃঢ় আঞ্চলিক ৰাজনৈতিক শক্তি প্ৰস্তুত কৰিব লাগে। সকলো আঞ্চলিক ৰাজনৈতিক শক্তিলৈ পত্ৰ প্ৰেৰণৰ সিদ্ধান্ত গ্ৰহণ কৰা হৈছে।’