মণিপুৰত অসম ৰাইফলছৰ কনভয়ত হোৱা আক্ৰমণৰ ঠিক এসপ্তাহ পিছতেই এইবাৰ চুবুৰীয়া ৰাজ্য নাগালেণ্ডত এক ভয়ংকৰ বিস্ফোৰণ সংঘটিত হৈছে। নাগালেণ্ডৰ চুমৌকেডিমা জিলাৰ সুখোভিত হোৱা এক সন্দেহযুক্ত আইইডি বিস্ফোৰণৰ ফলত অসম ৰাইফলছৰ এজন জোৱান শ্বহীদ হৈছে আৰু আন চাৰিগৰাকী গুৰুতৰভাৱে আহত হৈছে।
নিহত জোৱানজনৰ নাম হাৱিলদাৰ মহম্মদ ইকবাল। তেওঁ ২৮ নং অসম ৰাইফলছত কৰ্মৰত আছিল। দুৰ্ঘটনা সংঘটিত হোৱা ঠাইৰ ওচৰতেই অসম ৰাইফলছৰ প্ৰশিক্ষণ কেন্দ্ৰ অৱস্থিত। জানিব পৰা মতে, সোমবাৰে বিয়লি জোৱানৰ এটা দলে ডিমাপুৰত থকা প্ৰশিক্ষণ কেন্দ্ৰৰ এটা অংশৰ পৰা সুখোভিৰ আন এটা অংশলৈ গৈ থকাৰ সময়তে এই অতৰ্কিত বিস্ফোৰণটো ঘটে।
এই অঞ্চলটোত দীৰ্ঘদিন ধৰি শান্তি বিৰাজ কৰি থকাৰ বাবে সাধাৰণতে তাত কোনো সামৰিক অভিযান চলোৱা নহয়। এই প্ৰশিক্ষণ কেন্দ্ৰটো মূলতঃ তিনিটা অংশত বিভক্ত। জোৱানসকলে অতি সাধাৰণ আৰু দৈনন্দিন কামৰ বাবে এটা অংশৰ পৰা আনটো অংশলৈ যাতায়ত কৰি থকাৰ সময়তে এই দুৰ্ঘটনাটো সংঘটিত হয়।
কোহিমাৰ প্ৰতিৰক্ষা বিভাগৰ মুখপাত্ৰই জানিবলৈ দিয়া মতে, জোৱানৰ গাড়ী লক্ষ্য কৰি চলোৱা এই বিস্ফোৰণটো এটা আইইডি বিস্ফোৰণ বুলিয়েই প্ৰাথমিকভাৱে সন্দেহ কৰা হৈছে। ঘটনাৰ পিছতেই সেনা আৰু আৰক্ষীয়ে সমগ্ৰ এলেকাটো ঘেৰি পেলাইছে। দোষীক বিচাৰি উলিয়াবলৈ আৰু সেই এলেকাত আন কোনো আইইডি লুকুৱাই থোৱা আছে নেকি তাক পৰীক্ষা কৰিবলৈ তন্নতন্নকৈ তালাচী চলোৱা হৈছে। অৱশ্যে বেয়া বতৰৰ বাবে অভিযানত কিছু অসুবিধাৰ সৃষ্টি হৈছে বুলি সেনা সূত্ৰই প্ৰকাশ কৰিছে।
নাগালেণ্ডৰ মুখ্যমন্ত্ৰী নেইফিউ ৰিঅ‘ই এই আক্ৰমণৰ তীব্ৰ গৰিহণা দিছে। সামাজিক মাধ্যমত তেওঁ কয় যে চুমৌকেডিমাৰ এই বোমা বিস্ফোৰণ এক অতি কাপুৰুষোচিত কাম আৰু সভ্য সমাজত ইয়াৰ কোনো স্থান নাই। তেওঁ ভুক্তভোগীসকলৰ প্ৰতি সমবেদনা জ্ঞাপন কৰে আৰু দোষীক শীঘ্ৰেই চিনাক্ত কৰি কঠোৰ শাস্তি প্ৰদান কৰা হ‘ব বুলি আশ্বাস দিয়ে। ৰাইজৰ শান্তি আৰু নিৰাপত্তা বিঘ্নিত কৰাৰ কোনো অপচেষ্টাই সফল হ‘বলৈ দিয়া নহ‘ব বুলিও তেওঁ স্পষ্ট কৰি দিয়ে।
সোমবাৰৰ এই বিস্ফোৰণটো মণিপুৰৰ উখৰুল জিলাত অসম ৰাইফলছৰ ওপৰত হোৱা আক্ৰমণৰ ঠিক এসপ্তাহ পিছত সংঘটিত হৈছে। যোৱা ৬ জুলাইত মণিপুৰত সন্দেহযুক্ত উগ্ৰপন্থীয়ে চলোৱা সেই আক্ৰমণত অসম ৰাইফলছৰ দুজন জোৱান শ্বহীদ হৈছিল। হিংসাজৰ্জৰ মণিপুৰত চলিত বৰ্ষত সেয়া আছিল চতুৰ্থটো ডাঙৰ আক্ৰমণ। তাৰ পিছতেই নাগালেণ্ডত হোৱা এই বিস্ফোৰণে সমগ্ৰ উত্তৰ-পূৰ্বাঞ্চলৰ নিৰাপত্তা ব্যৱস্থাক লৈ নতুনকৈ চিন্তাৰ কাৰণ হৈ পৰিছে বুলি বিশেষজ্ঞসকলে মত প্ৰকাশ কৰিছে।
