প্ৰাক্তন সেনাধ্যক্ষ জেনেৰেল মনোজ মুকুন্দ নাৰৱনেৰ অপ্ৰকাশিত গ্ৰন্থ ‘ফোৰ ষ্টাৰছ অৱ ডেষ্টিনী’ক লৈ সৃষ্টি হোৱা তীব্ৰ ৰাজনৈতিক বিতৰ্কৰ মাজতে কেন্দ্ৰীয় চৰকাৰে এক গুৰুত্বপূৰ্ণ সিদ্ধান্ত গ্ৰহণৰ প্ৰস্তুতি চলাইছে। চৰকাৰী সূত্ৰৰ পৰা পোৱা খবৰ অনুসৰি, এতিয়াৰে পৰা সামৰিক বাহিনীৰ মুৰব্বী বা ক্ষমতাৰ পদত থকা জ্যেষ্ঠ বিষয়াসকলে অৱসৰ গ্ৰহণৰ পাছত ২০ বছৰলৈ কোনো কিতাপ বা স্মৃতিগ্ৰন্থ প্ৰকাশ কৰিব নোৱাৰিব। শেহতীয়া এক উচ্চস্তৰীয় বৈঠকত এই ২০ বছৰীয়া শীতল সময়সীমা বা কুলিং অফ পিৰিয়ডৰ প্ৰস্তাৱ সন্দৰ্ভত আলোচনা কৰা হৈছে আৰু অতি সোনকালে এই সন্দৰ্ভত চৰকাৰী নিৰ্দেশনা জাৰি হোৱাৰ সম্ভাৱনা আছে।
প্ৰাক্তন সেনাধ্যক্ষ নাৰৱনেৰ কিতাপখনত ২০২০ চনৰ পূব লাডাখত ভাৰত আৰু চীনৰ সামৰিক সংঘাতৰ যি বিৱৰণ দিয়া হৈছে, তাক লৈয়েই মূল বিতৰ্কৰ সূত্ৰপাত হৈছে। বিশেষকৈ চীনৰ আগ্ৰাসনৰ বিৰুদ্ধে ভাৰতীয় সেনাই কেনে সঁহাৰি দিব লাগে, সেই সন্দৰ্ভত চৰকাৰৰ পৰা তাৎক্ষণিক নিৰ্দেশনা পোৱাত পলম হোৱা বুলি যি দাবী কৰা হৈছে, তাক বিৰোধীয়ে সংসদত চৰকাৰৰ বিৰুদ্ধে অস্ত্ৰ হিচাপে ব্যৱহাৰ কৰিছে। এই সংবেদনশীল বিষয়টোৱে ৰাষ্ট্ৰীয় নিৰাপত্তাৰ ক্ষেত্ৰত প্ৰশ্ন উত্থাপন কৰা বুলি চৰকাৰে গণ্য কৰিছে। শুকুৰবাৰে অনুষ্ঠিত কেন্দ্ৰীয় কেবিনেটৰ এক অনানুষ্ঠানিক আলোচনাত কেইবাজনো মন্ত্ৰীয়ে মত প্ৰকাশ কৰে যে গুৰুত্বপূৰ্ণ দায়িত্বত থকা লোকসকলে অৱসৰৰ লগে লগেই এনে সংবেদনশীল তথ্য ৰাজহুৱা কৰাটো উচিত নহয়।
আনহাতে এই বিতৰ্কৰ মাজতে আমেৰিকাৰ অপৰাধী জেফ্ৰি এপষ্টেইনৰ গোচৰক লৈ কেন্দ্ৰীয় মন্ত্ৰী হৰদীপ সিং পুৰীক বিৰোধীয়ে লক্ষ্য কৰি লোৱা বিষয়টোও কেবিনেটত আলোচনা হয়। চৰকাৰে এই ক্ষেত্ৰত স্থিতি স্পষ্ট কৰি দিছে যে এইবোৰ ভিত্তিহীন অভিযোগ আৰু বিৰোধীৰ কোনো উৰাবাতৰিত চৰকাৰে সঁহাৰি নিদিয়ে। মন্ত্ৰী পুৰীয়ে ইতিমধ্যে স্পষ্ট কৰি দিছে যে তেওঁ কেতিয়াও এপষ্টেইনৰ ব্যক্তিগত দ্বীপ ভ্ৰমণ কৰা নাছিল আৰু কেৱল চৰকাৰী কামতহে তেওঁৰ সৈতে সাক্ষাৎ হৈছিল।
জেনেৰেল নাৰৱনেৰ কিতাপখনক লৈ আইনী মেৰপেঁচো এতিয়া তীব্ৰতৰ হৈ উঠিছে। পেংগুইন ৰেণ্ডম হাউছ ইণ্ডিয়া নামৰ প্ৰকাশন সংস্থাটোৱে জানিবলৈ দিছে যে যিহেতু কিতাপখন এতিয়ালৈকে চৰকাৰীভাৱে প্ৰকাশ পোৱা নাই, সেয়েহে ইয়াৰ যিকোনো পিডিএফ বা ডিজিটেল কপি ছচিয়েল মিডিয়াত বিয়পোৱাটো অবৈধ আৰু ইয়াৰ বিৰুদ্ধে দিল্লী আৰক্ষীয়ে তদন্ত আৰম্ভ কৰিছে। নাৰৱনেও এই সন্দৰ্ভত নিজৰ মৌনতা ভংগ কৰি কৈছে যে কিতাপখনৰ কোনো কপি বৰ্তমান বজাৰত উপলব্ধ নহয়। প্ৰতিৰক্ষা মন্ত্ৰালয়ে কিতাপখনৰ পাণ্ডুলিপিটো পৰীক্ষা কৰি থকাৰ বাবে ইয়াৰ প্ৰকাশ বৰ্তমান স্থগিত ৰখা হৈছে। চৰকাৰৰ এই নতুন ২০ বছৰীয়া শীতল সময়সীমাৰ নিয়মে ভৱিষ্যতে জ্যেষ্ঠ বিষয়াসকলৰ কলমৰ স্বাধীনতাৰ ওপৰত কি প্ৰভাৱ পেলাব, সেয়া এতিয়া চৰ্চাৰ বিষয় হৈ পৰিছে।
