বাংলাদেশত সংখ্যালঘু লোকৰ ওপৰত চলি থকা অত্যাচাৰৰ প্ৰতিবাদত ‘বাংলাদেশ’ বুলি লিখা বেগ লৈ সংসদত প্ৰৱেশ কৰে কেৰালাৰ ৱায়ানাদৰ সাংসদ প্ৰিয়ংকা গান্ধী ভাদ্ৰাই। লগতে সোমবাৰে বিজয় দিৱস উপলক্ষে সংসদত ভাষণ দি প্ৰিয়ংকাই দেশৰ সাম্প্ৰতিক পৰিস্থিতি আৰু ভাৰতত চৰকাৰৰ ভূমিকাক লৈ প্ৰশ্ন উত্থাপন কৰে।
প্ৰিয়ংকাৰ উপৰি মঙলবাৰে সংসদ ভৱনৰ সন্মুখত বিৰোধীয়ে বেগ লৈ প্ৰতিবাদ সাব্যস্ত কৰে। যাৰ সন্মুখত লিখা আছিল – ‘বাংলাদেশত হিন্দু আৰু খ্ৰীষ্টানসকল কাষত থিয় দিয়ক’।
মন কৰিবলগীয়া যে শ্বেখ হাছিনাৰ পদত্যাগৰ পিছত মহম্মদ ইউনুছ বাংলাদেশৰ অন্তৱৰ্তীকালীন চৰকাৰৰ মুৰব্বী হোৱাৰ পিছত বাংলাদেশত হিন্দুসকলৰ ওপৰত অত্যাচাৰৰ অভিযোগ উত্থাপন হৈছে। ইয়াৰ মাজতে চট্টগ্ৰামত হিন্দু আৰু বৌদ্ধ ধৰ্মাৱলম্বী লোকৰ ওপৰত আক্ৰমণ সংঘটিত হৈছে। সেনাবাহিনীৰ বিৰুদ্ধেও সংখ্যালঘুল্প নিৰ্যাতন কৰাৰ অভিযোগ উত্থাপন হৈছে।
আনহাতে সোমবাৰে বিজয় দিৱস উপলক্ষে কংগ্ৰেছৰ সাংসদ প্ৰিয়ংকা গান্ধীয়ে কেন্দ্ৰীয় চৰকাৰৰ ভূমিকাক লৈ প্ৰশ্ন উত্থাপন কৰে। তেওঁ কয়, ‘বাংলাদেশত হিন্দু আৰু সংখ্যালঘুৰ ওপৰত চলি থকা অত্যাচাৰৰ বিৰুদ্ধে এই চৰকাৰে মাত মাতিব লাগে। আমি বাংলাদেশ চৰকাৰৰ সৈতে আলোচনা কৰি নিপীড়িতৰ কাষত থিয় দিয়া উচিত।’
উল্লেখ্য যে সোমবাৰে ‘পেলেষ্টাইন’ বুলি লিখা বেগ এটা লৈ সংসদলৈ আহিছিল প্ৰিয়ংকা গান্ধী। পেলেষ্টাইনৰ জনসাধাৰণৰ প্ৰতি সমৰ্থন আৰু সংহতি প্ৰকাশ কৰিবলৈ এইদৰে ‘পেলেষ্টাইন’ বুলি লিখা বেগ লৈ আনিছিল প্ৰিয়ংকা গান্ধীয়ে। ইয়াৰ পিছতে মঙলবাৰে একে পন্থাৰে বাংলাদেশৰ নিৰ্যাতিত সংখ্যালঘুৰ প্ৰতি সংহতি প্ৰকাশ কৰে।
