দেওবাৰে তামিলনাডুৰ এটা আতচবাজী কাৰখানাত হোৱা বিস্ফোৰণত ২০ জন লোকৰ মৃত্যু হোৱাৰ পিছত এইবাৰ কেৰালাতো একেই অনুৰূপ ঘটনা সংঘটিত হৈছে। কেৰালাৰ এটা আতচবাজী কাৰখানাত হোৱা ভয়ংকৰ বিস্ফোৰণত কমেও ১৩ জন শ্ৰমিকৰ প্ৰাণহানি হৈছে। এই দুৰ্ঘটনাত আন ৪০ জন লোক আহত হৈছে আৰু ইয়াৰে ৫ জনৰ অৱস্থা অতি সংকটজনক বুলি জানিব পৰা গৈছে। মঙলবাৰে বিয়লি প্ৰায় ৩ বাজি ৩৫ মিনিটত ত্ৰিশূৰ জিলাৰ মুণ্ডাথিকোড অঞ্চলত এই ভয়ংকৰ বিস্ফোৰণটো সংঘটিত হয়। খবৰ পোৱাৰ লগে লগে আৰক্ষী আৰু অগ্নিনিৰ্বাপক বাহিনীৰ লোক উদ্ধাৰ অভিযানৰ বাবে ততাতৈয়াকৈ ঘটনাস্থলীত উপস্থিত হয়।
ঘটনাস্থলীত উদ্ধাৰ অভিযান চলোৱা অগ্নিনিৰ্বাপক বাহিনীৰ এগৰাকী কৰ্মীয়ে জানিবলৈ দিয়া মতে, এই আতচবাজী কাৰখানাটো এখন শুকান ধাননি পথাৰৰ মাজত অৱস্থিত আছিল। প্ৰচণ্ড গৰমৰ বাবে পৰিস্থিতি অধিক ভয়াবহ হৈ পৰে। স্থানীয় সূত্ৰৰ পৰা জানিব পৰা মতে, এই ঘটনাত কমেও ১৩ জন শ্ৰমিকৰ মৃত্যু হৈছে। দুৰ্ঘটনাৰ খবৰ পোৱাৰ লগে লগে আৰক্ষী, অগ্নিনিৰ্বাপক বাহিনী আৰু এম্বুলেন্স ততাতৈয়াকৈ ঘটনাস্থলীত উপস্থিত হয় আৰু আহতসকলক উদ্ধাৰ কৰি ত্ৰিশূৰ চিকিৎসা মহাবিদ্যালয়ত ভৰ্তি কৰোৱায়।
আতচবাজী কাৰখানাত হোৱা এই বিস্ফোৰণৰ খবৰ পাই কেৰালাৰ মুখ্যমন্ত্ৰী পিনাৰাই বিজয়নে গভীৰ উদ্বেগ প্ৰকাশ কৰিছে। তেওঁ ৰাজ্যৰ মুখ্য সচিবক এই সন্দৰ্ভত তৎকালীনভাৱে প্ৰয়োজনীয় ব্যৱস্থা গ্ৰহণ কৰিবলৈ নিৰ্দেশ দিছে। ইয়াৰ লগতে এই দুৰ্ঘটনাত ১৩ জন লোকৰ মৃত্যুত তেওঁ গভীৰ শোক প্ৰকাশ কৰিছে। উল্লেখযোগ্য যে, যোৱা দেওবাৰে তামিলনাডুৰ এটা আতচবাজী কাৰখানাত হোৱা বিস্ফোৰণতো ২০ জন শ্ৰমিকৰ মৃত্যু হৈছিল আৰু আন ছজন লোক আহত হৈছিল। সংকটজনক অৱস্থাত থকা লোকসকলক উদ্ধাৰ কৰি স্থানীয় চিকিৎসালয়ত ভৰ্তি কৰোৱা হৈছিল আৰু শ্ৰমিকসকলৰ অকাল মৃত্যুত তামিলনাডুৰ মুখ্যমন্ত্ৰী এম কে ষ্টেলিনে গভীৰ শোক প্ৰকাশ কৰিছিল।
