সদ্য ঘোষিত অসম বিধানসভাৰ নিৰ্বাচনৰ ফলাফলত ১০২ নং টীয়ক বিধানসভা সমষ্টিত পুনৰবাৰ মিত্ৰজোঁট তথা অগপ দলৰ প্ৰাৰ্থী ৰেণুপমা ৰাজখোৱাই শেষ হাঁহি মাৰিবলৈ সক্ষম হয়।
ৰাজখোৱাই তেওঁৰ নিকটতম প্ৰতিদ্বন্দ্বী কংগ্ৰেছৰ পল্লৱী গগৈক ১৩৫০টা ভোটৰ ব্যৱধানত পৰাস্ত কৰি অসম বিধানসভালৈ নিৰ্বাচিত হৈছে।
সমষ্টিটোত পাঁচ গৰাকী প্ৰাৰ্থী আছিল ক্ৰমে মিত্ৰজোঁটৰ ৰেনুপমা ৰাজখোৱা, কংগ্ৰেছৰ পল্লবী গগৈ, ৰাইজৰ দলৰ প্ৰাৰ্থী কবিন্দ্ৰ চুতীয়া ফুকন, লোক জনশক্তিৰ ৰুবী নেওগ বৰা আৰু নিৰ্দলীয় প্ৰাৰ্থী সীমান্ত কুমাৰ দত্ত।
জানিবপৰা মতে, এইবাৰ নিৰ্বাচন নেখেলাৰ সিদ্ধান্ত লোৱা ৰেণুপমা ৰাজখোৱাক শেষত দলীয় সিদ্ধান্তৰ বাবে প্ৰাৰ্থিত্ব প্ৰদান কৰা হয় আৰু দুয়ো দলৰ নেতা-কর্মী সকলে ৰাতিক দিন কৰি তীব্ৰতৰ কৰি তোলে প্ৰচাৰ অভিযান যাৰ বাবে দখলত থকা সমষ্টিটো পুনৰ নিজৰ হাতত ৰাখিবলৈ সক্ষম হয়।
সমষ্টিটোত একাংশ লোকৰ অসন্তুষ্টি আছিল যদিও শেষত চৰকাৰ খনৰ স্বাৰ্থত মিত্ৰজোঁটৰ প্ৰাৰ্থী গৰাকীক জয়যুক্ত কৰিবলৈ সংগ দিয়া দেখা গ’ল।
উল্লেখযোগ্য যে যোৱাটো কাৰ্যকালত টীয়ক সমষ্টিত বহুবোৰ হিতাধিকাৰী সৃষ্টি কৰিলে যাৰ বাবে সেইসকল হিতাধিকাৰীয়ে মিত্ৰজোঁটৰ প্ৰাৰ্থী গৰাকীক আঁকোৱালি ল’লে।
ৰেণুপমা ৰাজখোৱাই ৪৭৫৫৫ টা ভোট লাভ কৰাৰ বিপৰীতে কংগ্ৰেছৰ পল্লৱী গগৈয়ে লাভ কৰে ৪৬২০৫ টা ভোট।
সেইদৰে, ৰাইজৰ দলৰ কবিন্দ্ৰ চেতিয়া ফুকনে লাভ কৰে ৫৯৪০টা, লোক জনশক্তিৰ ৰুবি নেওগ বৰাই লাভ কৰে ১০৯৯ টা আৰু নিৰ্দলীয় প্ৰাৰ্থী সীমান্ত কুমাৰ দত্তই লাভ কৰে ১১৫১টা ভোট।
