অসম গণ পৰিষদ এতিয়া নামতহে যেন আঞ্চলিকতাবাদী দল, কামে কাজে এতিয়া ৰাষ্ট্ৰীয় দল বিজেপিৰে মিতিৰালি কৰি নিজৰ আঞ্চলিকতাবাদী সাজযোৰ কেতিয়াবাই যেন খুলি পেলালে অসম আন্দোলনৰ ভেটিত ভূমিষ্ঠ হোৱা দলটোৱে।
২০১৬ চনৰ পূৰ্বৰে পৰা বিজেপিৰে মিত্ৰতাৰ পাশত আৱদ্ধ হৈ দলটোৱে যেন নিজৰ চাল-চলন ৰাষ্ট্ৰীয়তাবাদী শক্তিটোৰ সৈতে একাকাৰ কৰি পেলালে। তাৰ এক পূৰ্ণ প্ৰতিস্ফলন ঘটিল দলটোৰ নিৰ্বাচনী ইস্তাহাৰখনত, য’ত নেকি ‘কা’ বিৰোধিতা কৰাৰ নামত এটাও টু শব্দ উল্লেখ কৰা হোৱা নাই।
তাৰ বিপৰীতে বিজেপিৰ নিৰ্বাচনী ইস্তাহাৰত অসমত চৰকাৰ হ’লে ‘কা’ বলবৎ কৰা হ’ব বুলি সদম্ভে উল্লেখ কৰিছে।
ইপিনে, কা বিৰোধী স্থিতিত থকা অসম জাতীয় পৰিষদ, ৰাইজৰ দল, কংগ্ৰেছে তেওঁলোকৰ নিৰ্বাচনী ইস্তাহাৰত ‘কা’ বিৰোধিতাৰ প্ৰসংগ সবিস্তাৰে প্ৰকাশ কৰি উলিয়াইছে। আনকি কা বিৰোধী শক্তিসমূহে চৰকাৰ গঠন কৰিলে অসমত বিশেষ প্ৰক্ৰিয়াৰ মাধ্যমৰে কা খন বলবৎ কৰিবলৈ দিয়া নহ’ব বুলি তেওঁলোকে স্পষ্টকৈ উল্লেখ কৰিছে ইস্তাহাৰত।
কিন্তু বিজেপিৰ নেগুৰত ধৰি কেৱল ক্ষমতাৰ লালসাৰ কথা ভবা অসম গণ পৰিষদে যেন বিগ ব্ৰাডাৰলৈ ভয় কৰিয়েই প্ৰকাশ কৰিবলৈ সাহস নকৰিলে ‘কা’ বিৰোধিতা কৰাৰ প্ৰসংগ। বিজেপিৰ ওচৰত যেন নেগুৰ পেলাই ‘নোদোকা নেতা’ হোৱাৰ আখৰাত ব্যস্ত অসম গণ পৰিষদৰ শীৰ্ষ নেতৃত্ব।
চৰ্চা চলিছে কিছুদিন পাছতে আঞ্চলিকতাবাদী আদৰ্শৰ দলটো ধ্বংসৰ গৰাহলৈ থেলি দি অতুল-কেশৱ-ফণী পন্থী পৰ্য্যায়ক্ৰমে বিলীন যাব বিজেপিৰ সৈতে।
যিটো দলে অসমীয়াৰ অস্তিত্ব, ভাষা-সংস্কৃতি-ৰাজনৈতিক অধিকাৰ ধ্বংসকাৰী ‘কা’ বিৰোধিতা কৰাৰ প্ৰসংগ উত্থাপন কৰিবলৈ সাহস নকৰিলে সেই দলে আকৌ নিৰ্বাচনী ইস্তাহাৰত অসম চুক্তি ৰূপায়ণ দলৰ প্ৰথম আৰু প্ৰধান লক্ষ্য বুলি উল্লেখ কৰাৰ লগতে ৬নং দফা কাৰ্যকৰী কৰাৰ কথা উল্লেখ কৰে।
তদুপৰি ‘কা’ৰ ক্ষেত্ৰত ইতিমধ্যে নৰম স্থিতি লোৱা অসম গণ পৰিষদে হেনো অসম চুক্তিৰ আধাৰত অবৈধ অনুপ্ৰৱেশ চিনাক্তকৰণ আৰু বহিষ্কৰণৰ বাবে কেন্দ্ৰীয় চৰকাৰক হেচা প্ৰদান কৰিব আৰু বিদেশীমু্ক্ত ৰাষ্ট্ৰীয় নাগৰিকপঞ্জীৰ উন্নীতকৰণ সম্পূৰ্ণ কৰিবলৈও অগপ দলে কেন্দ্ৰক হেচা প্ৰদান কৰিব বুলি উল্লেখ কৰে ইস্তাহাৰত
ইস্তহাৰ মুকলি অনুষ্ঠানত সাংসদ বীৰেণ বৈশ্য, প্ৰাক্তন সাংসদ কুমাৰ দীপক দাস, নুৰুল হুছেইন, মনোজ শইকীয়াসহ কেইবাগৰাকী অগপ নেতা উপস্থিত থাকে৷