“অসম গণ পৰিষদ দলৰ মন্ত্ৰিত্বৰ লগতহে সম্পৰ্ক আছে, ৰাইজৰ সমস্যাৰ লগত কোনো সম্পৰ্ক নাই৷” এই মন্তব্য নিখিল ভাৰত কংগ্ৰেছ কমিটীৰ সাধাৰণ সম্পাদক, প্ৰদেশ কংগ্ৰেছৰ তত্ত্বাৱধায়ক তথা উত্তৰাখণ্ডৰ প্ৰাক্তন মুখ্য মন্ত্ৰী হৰিশ ৰাৱতৰ৷ বৰপেটা জিলাৰ জনিয়াত আজি বিয়লি অনুষ্ঠিত এখন পঞ্চায়ত নিৰ্বাচনী সভাত অংশগ্ৰহণ কৰি ৰাৱতে বিজেপি, এ আই য়ু ডি এফ আৰু অগপক তুলাধুনা দিয়ে।
তেওঁ কয়, “নৰেন্দ্ৰ মোদীয়ে নিৰ্বাচনৰ পূৰ্বে আচ্ছে দিনৰ প্ৰতিশ্ৰুতি দিছিল যদিও চাৰি বছৰৰ পিছতো ৰাইজে আচ্ছে দিন দেখিবলৈ নাপালে।”
আনহাতে, বিমুদ্ৰাকৰণ, জি এছ টি আদি সকলো ক্ষেত্ৰতে কেন্দ্ৰৰ বিজেপি চৰকাৰ চূড়ান্তভাৱে ব্যৰ্থ হোৱা বুলি উল্লেখ কৰি এনে ব্যৰ্থ চৰকাৰে ৰাইজৰ উন্নয়ন কৰিব নোৱাৰে বুলিও মন্তব্য আগ বঢ়ায় ৰাৱতে৷
সম্প্ৰতি কেন্দ্ৰৰ বিজেপি চৰকাৰৰ বিৰুদ্ধে ৰাইজৰ যুঁজ চলা বুলি উল্লেখ কৰি অগপ, এ আই য়ু ডি এফ দলক ভোট দিয়া মানে বিজেপিকে ভোট দিয়া বুলিও মন্তব্য কৰে নেতাজনে।
অগপ, এ আই য়ু ডি এফ দলে কেতিয়াও চৰকাৰ গঠন কৰিব নোৱাৰে বুলি উল্লেখ কৰাৰ লগতে লোকতন্ত্ৰ, বিকাশ, সৰ্বধৰ্ম, প্ৰেম আৰু স্নেহৰ ভেটি শক্তিশালী কৰিবলৈ হ’লে কংগ্ৰেছ প্ৰাৰ্থীক ভোট দিয়াৰ বাবে আহ্বান জনায় প্ৰদেশ কংগ্ৰেছৰ তত্ত্বাৱধায়কগৰাকীয়ে৷ ৰাজ্যত অনুষ্ঠিত হ’ব লগীয়া পঞ্চায়ত নিৰ্বাচনত কংগ্ৰেছ দলে পূৰ্বতকৈ অধিক ভাল ফল লাভ কৰিবলৈ সক্ষম হ’ব বুলিও দাবী কৰে ৰাৱতে৷
আজিৰ সভাখনত জিলা কংগ্ৰেছৰ সভাপতি শান্তনু শৰ্মা, জনিয়াৰ বিধায়ক আব্দুল খালেক, প্ৰাক্তন বিধায়ক আব্দুৰ ৰহিম খানৰ লগতে কেইবাগৰাকী নেতা উপস্থিত থাকে৷
উল্লেখ্য যে, জনিয়াৰ নিৰ্বাচনী সভাত উপস্থিত হোৱাৰ পূৰ্বে মন্দিয়াতো এখন নিৰ্বাচনী সভাত অংশ গ্ৰহণ কৰে প্ৰদেশ কংগ্ৰেছৰ তত্ত্বাৱধায়কগৰাকীয়ে৷