নাগৰিকত্ব সংশোধনী বিধেয়ক কোনো কাৰণতেই মানি লোৱা নহ’ব বুলি নিজৰ স্থিতি স্পষ্ট কৰি বিজেপিৰে মিত্ৰতা ত্যাগ কৰা অসম গণ পৰিষদ দলৰ তিনি মন্ত্ৰীয়ে আজি সোণোৱাল মন্ত্ৰীসভাৰ পৰা পদত্যাগ কৰাৰ পূৰ্ণ সম্ভাৱণাই দেখা দিছে।
আজি অগপৰ তিনি মন্ত্ৰী ক্ৰমে দলৰ সভাপতি তথা কৃষি মন্ত্ৰী অতুল বৰা, জলসম্পদ মন্ত্ৰী কেশৱ মহন্ত আৰু খাদ্য আৰু অসামৰিক যোগান মন্ত্ৰী ফণীভূষণ চৌধুৰীয়ে সন্ধিয়া মুখ্য মন্ত্ৰী সৰ্বানন্দ সোণোৱালক সাক্ষাৎ কৰি আনুষ্ঠানিকভাৱে পদত্যাগ পত্ৰ প্ৰদান কৰিব বুলি জানিব পৰা গৈছে।
উল্লেখ্য যে যোৱা ৭ জানুৱাৰিত জেপিচিয়ে বিধেয়কখনৰ প্ৰতিবেদন সদনত দাখিল কৰাৰ প্ৰাকমূহুৰ্তত অগপ সভাপতি অতুল বৰাৰ নেতৃত্বত যোৱা এটি প্ৰতিনিধি দলে নতুন দিল্লীত কেন্দ্ৰীয় গৃহ মন্ত্ৰী ৰাজনাথ সিঙক সাক্ষাৎ কৰি বিধেয়কখনৰ প্ৰৱল বিৰোধিতা কৰিছিল। কিন্তু বিধেয়কক লৈ কেন্দ্ৰীয় নেতৃত্বাধীন বিজেপি চৰকাৰে গ্ৰহণ কৰা আকোৰগোজ স্থিতিত ক্ষুন্ন হৈয়ে বিজেপিৰে মিত্ৰতা ছেদ কৰিছিল অসম গণ পৰিষদ দলে।
মন কৰিবলগীয়া যে বিভিন্ন দল-সংগঠন তথা অসমৰ সৰ্বসাধাৰণ ৰাইজে এই বিধেয়কখনৰ বিৰুদ্ধে তীব্ৰ প্ৰতিবাদ সাব্যস্ত কৰাৰ পাছতো ৮ জানুৱাৰিত বিধেয়কখন লোকসভাত গৃহীত কৰা হয়।