১৪ অক্টোবৰ অৰ্থাৎ দেওবাৰে অসমৰ আঞ্চলিক দল অসম গণ পৰিষদৰ ৩৪ সংখ্যক প্ৰতিষ্ঠা দিৱস। সময়ৰ দাবী সন্মুখত ৰাখি দলটোৱে নিজৰ শক্তি প্ৰদৰ্শনৰ বাবে সাজু হৈছে। শিৱসাগৰ জিলাৰ আমগুৰিত কেন্দ্ৰীয়ভাৱে দলটোৰ প্ৰতিষ্ঠা দিৱস পালন কৰা হ’ব।
অগপই প্ৰতিষ্ঠা দিৱসৰ দিনটোতে আগন্তুক নিৰ্বাচনৰ বাবে নিজৰ স্থিতি স্পষ্ট কৰাৰ লগতে ৰাজ্যখনৰ জনসাধাৰণৰ মনত উদ্ৰেক হোৱা প্ৰশ্নসমূহৰ সন্দৰ্ভত দলৰ ব্যাখ্যা দাঙি ধৰাৰ সম্ভাৱনা আছে।
আমগুৰিত অনুষ্ঠিত হ’বলগীয়া প্ৰতিষ্ঠা দিৱসৰ কাৰ্যসূচীত আঞ্চলিক দলটোৰ প্ৰায়বোৰ শীৰ্ষনেতাই অংশগ্ৰহণ কৰিব। দলৰ সভাপতি অতুল বৰা, কাৰ্যকৰী সভাপতি কেশৱ মহন্ত, প্ৰাক্তন মুখ্যমন্ত্ৰী প্ৰফুল্ল কুমাৰ মহন্ত, প্ৰাক্তন সভাপতি বৃন্দাবন গোস্বামী, জ্যেষ্ঠ নেতা ফণীভূষণ চৌধুৰীকে ধৰি প্ৰায় আটাইবোৰ জ্যেষ্ঠ, কনিষ্ঠ নেতাই প্ৰতিষ্ঠা দিৱসৰ কাৰ্যসূচীত অংশগ্ৰহণ কৰিব।
প্ৰতিষ্ঠা দিৱসৰ এই কেন্দ্ৰীয় কাৰ্যসূচীত উজনি অসমৰ আটাইকেইখন জিলাৰ পৰা প্ৰতিনিধি উপস্থিত থাকিব বুলি জানিব পৰা গৈছে। বিশেষকৈ গোলাঘাট, যোৰহাট, শিৱসাগৰ, চৰাইদেউ, ডিব্ৰুগড়, তিনিচুকীয়া জিলাৰ পৰা সৰহ সংখ্যকৰ উপস্থিতি আশা কৰিছে নেতৃত্বই। তদুপৰি, ৰাজ্যখনৰ আন প্ৰান্তৰ পৰাও দলৰ বিভিন্ন পৰ্যায়ৰ গোটসমূহৰ পৰা প্ৰতিনিধিয়ে অংশগ্ৰহণ কৰিব।
জানিব পৰা মতে প্ৰতিষ্ঠা দিৱসৰ পৰাই অগপই নিৰ্বাচনী প্ৰচাৰৰ শুভাৰম্ভ কৰিব। ইপিনে অসমৰ জনসাধাৰণৰ ক্ষোভৰ প্ৰতি লক্ষ্য ৰাখি নাগৰিকত্ব সংশোধনী বিধেয়কৰ বিৰোধিতাৰ প্ৰসংগয়ো সভাত স্থান লাভ কৰিব আৰু ইয়াৰ দ্বাৰা দলটোৱে নিজৰ পূৰ্বৰ স্থিতি দোহাৰি ৰাইজক দলটোৰ প্ৰতি আকৃষ্ট কৰাৰ পৰিকল্পনা কৰিছে।
আমগুৰিত কেন্দ্ৰীয়ভাৱে অনুষ্ঠিত হ’বলগীয়া প্ৰতিষ্ঠা দিৱসৰ কাৰ্যসূচী সন্দৰ্ভত দলীয় এটা বিবৃতিত অগপৰ কেন্দ্ৰীয় কমিটীয়ে এক সংগ্ৰামী পটভূমিত জন্মলাভ কৰা অগপ দল অসমৰ সংগ্ৰামী জনসাধাৰণে নিজ হাতে গঢ় দিয়া ৰাজ্যখনৰ সবাতোকৈ গুৰুত্বপূৰ্ণ আৰু অন্যতম আঞ্চলিক দল বুলি উল্লেখ কৰিছে।
বিবৃতিটোত লগতে কোৱা হৈছে যে ৰাজ্যখনৰ জাতীয় সমস্যাসমূহৰ ক্ষেত্ৰত দলটোৱে আপোচহীনভাৱে নিজৰ স্থিতি অব্যাহত ৰাখিছে আৰু সাম্প্ৰতিক ৰাজনৈতিক পৰিস্থিতিত অগপৰ গুৰুত্ব স্বাভাৱিকতে বৃদ্ধি পাইছে।
উল্লেখযোগ্য যে সন্মুখৰ পঞ্চায়ত আৰু লোকসভাৰ দুটাকৈ গুৰুত্বপূৰ্ণ নিৰ্বাচনলৈ লক্ষ্য ৰাখি অগপই অসমৰ ৰাইজৰ হৃদস্পন্দন অনুভৱ কৰি নিজৰ স্থিতি ব্যাখ্যা কৰিব বুলি দলৰ সূত্ৰই জানিব দিয়ে। আনহাতে, বিজেপিৰ একাংশ নেতাই শেহতীয়াকৈ অগপ সম্পৰ্কত কৰা মন্তৱ্যৰো প্ৰত্যুত্তৰ দলৰ নেতাসকলে এই প্ৰতিষ্ঠা দিৱসৰ কাৰ্যসূচীৰ মঞ্চৰ পৰাই দাঙি ধৰিব বুলি জানিব পৰা গৈছে।