অসম আন্দোলনৰ পটভূমিত জন্মলাভ কৰা ৰাজ্যখনৰ প্ৰথমটো আঞ্চলিক জাতীয়বাদী দল অসম গণ পৰিষদ বৰ্তমান বিজেপিৰ হাতৰ পুতলা হৈ পৰাটো সকলোৱে লক্ষ্য কৰিছে।
১৯৮৫চনৰ পৰা উত্থান-পতনৰ মাজেৰে পাৰ হৈ অহা অসম গণ পৰিষদ দলটো আজি ইতিহাসৰ আটাইতকৈ চৰম অপমানজনক স্থিতিত আহি উপনীত হৈছে।
ক’বলৈ গ’লে অগপ দলটোৱে সম্প্ৰতি নিজৰ স্বাধীনতা হেৰুৱাই পেলাইছে আৰু বিজেপিৰ তথাকথিত ৰাষ্ট্ৰীয়তাবাদৰ ওচৰত দলটোৰ আঞ্চলিক-জাতীয়তাবাদী আদৰ্শ বিসৰ্জন দিছে।
দলটোৰ বৰ্তমান নেতৃত্বত থকা তথা মিত্ৰজোঁট চৰকাৰত মন্ত্ৰিত্বৰ লোভনীয় ক্ষমতা-আকৰ্ষণৰ মোহত বন্দী অতুল বৰা, কেশৱ মহন্তকে ধৰি সুবিধাবাদী নেতাকেইজনে দলটোকটো ধ্বংসৰ মুখলৈ ঠেলি দিলেই, লগতে ৰাজ্যখনৰ জাতীয়তাবাদী অসমীয়া জনসাধাৰণক বিশ্বাসঘাতকতাও কৰিলে।
ক্ষমতাৰ দম্ভ-অহংকাৰত মত্ত নেতাকেইজনে বিজেপিৰ প্ৰভাৱশালী মন্ত্ৰী বুলি পৰিচিত নেতাৰ প্ৰৰোচনাত পৰি এনেদৰে গুৰু-গোঁসাই নমনা হ’ল যে তেওঁলোকে এতিয়া দলটোৰ প্ৰতিষ্ঠাতাসকলকো অৱমাননা কৰিবলৈ কুণ্ঠাবোধ নকৰিলে।
আটাইতকৈ দুৰ্ভাগ্যজনক কথাটো হ’লে যে আগন্তুক বিধানসভা নিৰ্বাচনত অগপ দলে প্ৰাৰ্থিত্ব দিয়াৰ পৰাও বঞ্চিত কৰিলে দলৰ বহুকেইগৰাকী প্ৰতিষ্ঠাপক নেতাক।
বিজেপি নেতাৰ শ্ৰুতলিপি মতেই এইদৰে প্ৰাৰ্থিত্বৰ পৰা বঞ্চিত কৰা হৈছে দলৰ কাণ্ডাৰীসকলক।
এইক্ষেত্ৰত অগপৰ বৰ্তমান নেতৃত্বই দৃষ্টিকটুভাৱে প্ৰাৰ্থিত্বৰ পৰা বঞ্চিত কৰিলে দলটোৰ প্ৰতিষ্ঠাপক সভাপতি তথা ৰাজ্যখনৰ দুবাৰকৈ মুখ্যমন্ত্ৰীৰ আসনত বহা প্ৰাক্তন মুখ্যমন্ত্ৰী প্ৰফুল্ল কুমাৰ মহন্তক।
কিন্তু অত্যন্ত আশ্চৰ্যকৰ বিষয়টো হ’ল অগপ নেতৃত্বই বিজেপিৰ এনে এগৰাকী নেতাৰ বাবে প্ৰফুল্ল মহন্তৰ আসনখন এৰি দিলে যাৰ ৰাজনৈতিক তথা সামাজিক জীৱনত ‘কলংক’ৰ চেকা আছে।
বঢ়মপুৰত অগপই প্ৰফুল্ল মহন্তক বঞ্চিত কৰি বিজেপিৰ প্ৰাৰ্থী জিতু গোস্বামীক আসনখন এৰি দিছে।
কিন্তু তাৎপৰ্যপূৰ্ণ কথাটো হ’ল জিতু গোস্বামীৰ বিৰুদ্ধে তিনিটাকৈ জালিয়াতি, দুৰ্নীতি আৰু প্ৰৱঞ্চনাৰ অপৰাধমূলক গোচৰ চলি আছে।
জিতু গোস্বামীৰ বিৰুদ্ধে থকা গোচৰকেইটা হৈছে Spl Court case (PMLA)9/18, RC BSK/2012/E/002 আৰু BSK/2012/E/006। গোচৰকেইটা চলি আছে ক্ৰমে Special Judge, Assam; CBI,KolKata, West Bengal, CBI Guwahati আৰু CBI Court Guwahati ত।
উল্লেখযোগ্য যে যোৱা ২০১৯চনৰ ছেপ্টেম্বৰ মাহত আবকাৰী বিভাগে অসম-মেঘালয় সীমান্তত উচ্ছেদ কৰা অবৈধ সুৰা বটলিং প্লাণ্টটো অসম বিজেপিৰ দুজন শীৰ্ষ নেতাই চলাই থকাৰ তথ্য পোহৰলৈ আহিছিল।
দুৰ্নীতিৰ প্ৰতি শূন্য সহনশীলতাৰ শ্ল’গান দিয়া দলটোলৈ লজ্জা কঢ়িওৱা এই নেতা দুজনৰ এজন আছিল ক্ৰমে জিতু গোস্বামী।
২০১৯ৰ ১২ ছেপ্টেম্বৰত আবকাৰী বিভাগে অসম-মেঘালয় সীমান্তৰ বাৰ মাইলত এই অবৈধ সুৰা বটলিং প্লাণ্টটো উচ্ছেদ কৰিছিল আৰু বহু পৰিমাণৰ সুৰা, সুৰাৰ বহুতো খালী বটল আৰু বটলত লগোৱা ব্ৰেণ্ড লেবেল, বটল ৱাশ্বিং মেচিন আদি সামগ্ৰী বৃহৎ পৰিমাণত জব্দ কৰিছিল।
অভিযানৰ সময়ত সুভাষ বড়ো নামৰ এজন লোকক গ্ৰেপ্তাৰো কৰিছিল আবকাৰী আৰু আৰক্ষীয়ে, যিজন চৌহদটোৰ বিপৰীতে থকা মেছাৰ্ছ হিমালয়া ডিছটিলেৰি প্ৰাইভেট লিমিটেডৰ এজন কৰ্মচাৰী বুলি আবকাৰী বিভাগৰ বিষয়াই জানিবলৈ দিছিল।
জেৰাত সুভাষ বড়োৱে তেওঁ যোৱা ১৫ বছৰ ধৰি মেছাৰ্চ হিমালয়া ডিছটিলেৰি প্ৰাইভেট লিমিটেডত কাম কৰি থকাৰ কথা উল্লেখ কৰিছিল। দণ্ডাধীশৰ সন্মুখত বড়োই স্বীকাৰোক্তি দিছিল যে “মই মাথো মোক মালিক জিতু গোস্বামীয়ে যি কৰিবলৈ দিছে সেইটো কৰিবলৈ চেষ্টা কৰিছো।”
বড়োৰ ভাষ্যত এইটো স্পষ্ট হৈছিল যে জিতু গোস্বামীয়ে অবৈধ বটলিং প্লাণ্টটোত চোৱাচিতা কৰিবলৈ পূৰ্ণকান্ত নেওগ নামৰ এজনক দায়িত্ব দিছিল।
মন কৰিব লগীয়া কথাটো হ’ল ২০১৫ চনত মেছাৰ্ছ হিমালয়া ডিছটিলেৰি প্ৰাইভেট লিমিটেড ৫.৬ কোটি টকা ঋণ ঘূৰাই নিদিয়া বাবে আই ডি বি আই বেংকৰ দ্বাৰা ছীল কৰি দিয়া হৈছিল।
জিতু গোস্বামী বিজেপিৰ নেতা আৰু লগতে তেওঁ অসম ৰাজ্যিক পাঠ্যপুথি প্ৰণয়ন আৰু প্ৰকাশন নিগমৰ উপাধ্যক্ষও। তেওঁ ২০১৬ৰ বিধানসভা নিৰ্বাচনত চামগুৰিৰ সমষ্টিৰ পৰা প্ৰতিদ্বন্দ্বিতা কৰি পৰাজিত হৈছিল।
বঢ়মপুৰৰ বিজেপি প্ৰাৰ্থী জিতু গোস্বামীৰ বিৰুদ্ধে ইণ্ডিয়ান অভাৰচীজ বেংকৰ পৰা জালিয়াতিৰে ঋণ লোৱাৰ তথা কেইবাকোটি টকাও আত্মস্যাৎ কৰাৰ অভিযোগ আছে। EDয়ে গোস্বামীৰ লগতে তেওঁৰ পত্নীৰ বিৰুদ্ধেও অভিযোগনামা দাখিল কৰিছিল। অভিযোগনামাত গোস্বামীৰ জেডি জুৱেলাৰ্ছ প্ৰাইভেট লিমিটেডৰ নামো আছে। এই গোচৰত EDয়ে জিতু গোস্বামীৰ ৩কোটি টকাৰ সম্পত্তিও বাজেয়াপ্ত কৰিছিল।
কিন্তু এনে এজন ব্যক্তিক প্ৰাৰ্থিত্ব দিয়াৰ সমৰ্থনতে বৰ্তমান অগপ নেতৃত্বই দলটোৰ প্ৰতিষ্ঠাপক প্ৰফুল্ল কুমাৰ মহন্তৰ প্ৰাৰ্থিত্বৰ পৰা বঞ্চিত কৰিলে।
দৰাচলতে কা-বিৰোধী তথা অসমীয়া জনসাধাৰণৰ দাবীৰ সমৰ্থনত থকাৰ বাবেই বিজেপি আৰু তেওঁলকৰ বহতীয়া বৰ্তমান অগপ নেতৃত্বৰ ৰোষৰ বলি হ’বলগীয়া হ’ল প্ৰাক্তন মুখ্যমন্ত্ৰী মহন্ত।
বিজেপিৰ উচ্চাকাংক্ষী তথা প্ৰভাৱশালী মন্ত্ৰীৰ হেঁচাতে অগপ নেতৃত্বই এনে সিদ্ধান্ত গ্ৰহণ কৰা বুলিও বিভিন্ন মহলত চৰ্চা চলিছে।