অহা ৭ জুনত হ’বলগীয়া ৰাজ্যসভাৰ নিৰ্বাচনত অসম গণ পৰিষদক এখন আসন এৰি দিব বিজেপিয়ে। এই আসনখনত প্ৰতিদ্বন্দিতা কৰিব অসম গণ পৰিষদৰ প্ৰাক্তন কেবিনেট মন্ত্ৰী তথা সাংসদ বীৰেন্দ্ৰ প্ৰসাদ বৈশ্যই। দিল্লীত সংবাদ মাধ্যমৰ আগত আজি এই কথা ঘোষণা কৰে অগপ সভাপতি অতুল বৰাই।
উল্লেখ্য যে, অহা ১৪ জুনত ৰাজ্যসভাৰ দুখন আসন খালী হ’ব। সেই আসন দুখনকৈ লৈ ইতিমধ্যে ৰাজনৈতিক দলসমূহে কুচকাৱাজ আৰম্ভ কৰিছে যদিও দুয়োখন আসন বিজেপিৰ দখললৈ যোৱাটো নিশ্চিত হৈ পৰিছে।
ইপিনে, আজি বিজেপিৰ ৰাষ্ট্ৰীয় সভাপতি অমিত শ্বাহক মুখ্য মন্ত্ৰী সৰ্বানন্দ সোণোৱাল আৰু নেডাৰ আহ্বায়ক হিমন্ত বিশ্ব শৰ্মাই সাক্ষাৎ কৰি অভিনন্দন জনোৱাৰ উপৰিও অসমৰ ৰাজ্যসভাৰ আসন দুখন সন্দৰ্ভত আলোচনা কৰে।
আলোচনাৰ অন্তত মন্ত্ৰী হিমন্ত বিশ্ব শৰ্মাই এখন আসনত বিজেপিয়ে নিজে প্ৰাৰ্থিত্ব প্ৰদান কৰিব বুলি ঘোষণা কৰাৰ লগতে এখন আসন অসম গণ পৰিষদক এৰি দিব বুলিও সদৰী কৰে।
‘’আমাৰ ৰাজ্যসভাৰ নিৰ্বাচনৰ প্ৰাৰ্থীৰ সন্দৰ্ভত প্ৰাৰম্ভিক আলোচনা হৈ যায়। খুব সম্ভৱ আমি অসম গণ পৰিষদক দ্বিতীয় আসনখন এৰি দিম আৰু আনখন আসনত ভাৰতীয় জনতা পাৰ্টীয়ে প্ৰতিদ্বন্দিতা কৰিব,‘’-অমিত শ্বাহৰে আলোচনাৰ অন্তত সংবাদ মাধ্যমৰ আগত এই মন্তব্য হিমন্ত বিশ্ব শৰ্মাৰ।
ইপিনে, অসমৰ পৰা বিহাৰৰ ৰামবিলাস পাছোৱানে বিজেপিৰ হৈ ৰাজ্যসভাৰ প্ৰথমখন আসনত প্ৰতিদ্বন্দ্বিতা কৰিব বুলি অধিক ৰূপত চৰ্চিত বিষয়টো নস্যাৎ কৰি হিমন্তই কয়, ‘’অসমৰ ব্যক্তিয়েই নিৰ্বাচনত উঠিব। অসমৰ বাহিৰৰ পৰা প্ৰাৰ্থী অহাৰ কোনো কথা নাই। আজি গধুলি নাইবা কাইলৈ আনুষ্ঠানিক ঘোষণা হৈ যাব।‘’
আনহাতে, হিমন্ত বিশ্ব শৰ্মাৰ এই মন্তব্যৰ পাছতে সংবাদ মাধ্যমৰ জৰিয়তে প্ৰতিক্ৰিয়া প্ৰকাশ কৰিছে অগপ সভাপতি অতুল বৰাই।
বৰাই কয়, ‘’ভাৰতীয় জনতা পাৰ্টীৰ ৰাষ্ট্ৰীয় নেতৃত্বই আমাক এখন আসন প্ৰতিদ্বন্দ্বিতা কৰিবৰ বাবে এৰি দিছে। পৰহিলৈ আমি মনোনয়ন পত্ৰ দাখিল কৰিম। বীৰেন্দ্ৰ প্ৰসাদ বৈশ্যক সৰ্বসন্মতিক্ৰমে আসনখনৰ প্ৰাৰ্থী হিচাপে ইতিমধ্যে মনোনীত কৰা হৈ আছে।‘’
উল্লেখ্য যে, বিজেপিৰ পৰা দলীয় প্ৰাৰ্থিত্ব বিচাৰি ইতিমধ্যে আৱেদন জনাইছে ৰাষ্ট্ৰীয় সম্পাদক তথা সাংসদ ৰমেন ডেকা, কেন্দ্ৰীয় ৰাজ্যিক ৰেইল মন্ত্ৰী ৰাজেন গোহাঁই, গুৱাহাটীৰ সাংসদ বিজয়া চক্ৰৱৰ্তী, যোৰহাটৰ সাংসদ কামাখ্যা প্ৰসাদ তাছা, বিজেপিৰ ৰাজ্যিক উপ-সভাপতি বিজয় গুপ্তা, জ্যেষ্ঠ নেতা তথা “বিজেপি বাৰ্তা”ৰ সম্পাদক দেৱদত্ত বৰকটকীৰ উপৰি আন কেইবাজনো নেতাই।
