নাগৰিকত্ব সংশোধনী বিধেয়ক গৃহীত হ’লে বিজেপিৰ সৈতে মিত্ৰতা ভংগ কৰা হ’ব বুলি অসমৰ জনগণক সঘনাই জনাই অহা অসম গণ পৰিষদৰ নেতৃত্ববৰ্গই সংবাদ মাধ্যমৰ আগত আজিও একেখিনি কথাকো দোহাৰে।
দলটোৱে পূৰ্বৰ দৰেই অমিত শ্বাহলৈ পত্ৰ লিখা, নাগৰিকত্ব সংশোধনী বিধেয়কখন আগন্তুক শীতকালীন অধিৱেশনত গৃহীত হ’লে মিত্ৰতাৰ পৰা ওলাই অহা, ইত্যাদি কথাৰে অসমৰ ৰাইজক পুনৰ আভুৱা ভাঁৰিলে।
আজি আমবাৰীস্থিত দলৰ কাৰ্য্যালয় প্ৰাংগণত অসম আন্দোলনৰ চহিদ খৰ্গেশ্বৰ তালুকাদৰৰ স্মৃতিত চহিদ দিৱসৰ কাৰ্য্যসূচী অনুষ্ঠিত কৰে দলটোৱে। চহিদ তৰ্পণেৰে আৰম্ভ হোৱা কাৰ্য্যসূচীত উপস্থিত আছিল প্ৰাক্তম মুখ্য মন্ত্ৰী প্ৰফুল্ল কুমাৰ মহন্ত আৰু মন্ত্ৰী কেশৱ মহন্তকে ধৰি দলটোৰ প্ৰায়কেইজন শীৰ্ষ নেতা।
চহিদ দিৱসৰ কাৰ্য্যসূচীৰ পিছতে এখন সংবাদমেল সম্বোধন কৰে দলটোৰ নেতাসকলে। অৱশ্যে চহিদ দিৱসৰ কাৰ্য্যসূচী আৰু সংবাদমেলত সভাপতি অতুল বৰা উপস্থিত নাছিল।
নেতাদ্বয়ে জনায় যে কাইলৈৰ পৰা আৰম্ভ হ’ব লগীয়া সংসদৰ অধিৱেশনত নাগৰিকত্ব সংশোধনী বিধেয়ক গৃহীত হ’লে মিত্ৰতা ভংগৰ বাদে উপায় নাথাকিব বুলি অমিত শ্বাহলৈ দলটোৱে পত্ৰ লিখিছে।
উল্লেখযোগ্য যে এইটো কথা অগপ দলটোৱে আগতেও কৈ আহিছে যে বিধেয়কখন গৃহীত হ’লে দলটোৱে ৰাজ্যত বিজেপিৰ সৈতে থকা মিত্ৰতা ভংগ কৰিব। আনহাতে কাইলৰ পৰা আৰম্ভ হ’ব লগীয়া সংসদৰ শীতকালীন আৰু সম্ভাৱতঃ অন্তিমখন অধিৱেশনত এই বিধেয়কখন উত্থাপিত নোহোৱাটোৱে খাটাং হৈ আছে। কাৰণ বিধেয়কখন সন্দৰ্ভত গঠিত যুটীয়া সংসদীয় কমিটীয়ে ইয়াৰ প্ৰতিবেদন এতিয়াও দিয়া নাই। যুটীয়া সংসদীয় কমিটীৰ যোৱা ২৭ নৱেম্বৰৰ বৈঠকৰ পিছত এজন সদস্য ভুৱনেশ্বৰ কলিতাই জানিবলৈ দিছিল, “বিধেয়কখনৰ প্ৰতিটো দফা আলোচনা কৰি সংশোধনৰ বাবে সময়ৰ প্ৰয়োজন হ’ব।”
গতিকে বিধেয়কখন যে কাইলৈৰ পৰা আৰম্ভ হ’ব লগীয়া শীতকালীন অধিৱেশনত উত্থাপন নহয়, সেয়া নিশ্চিত হৈ আছে বুলি অগপ দলে জানেই। ইয়াৰ পিছতো এই অধিৱেশনত বিধেয়ক গৃহীত হ’লে মিত্ৰতা ছেদ কৰাৰ বিকল্প নাথাকিব বুলি অমিত শ্বাহলৈ পত্ৰ লিখাৰ কোনো মানে নাই।
আনহাতে, বিধেয়ক গৃহত কৰা-নকৰা সিদ্ধান্তটো বিজেপি দলটোৰ সভাপতিয়ে নহয়, সংসদেহে ল’ব পাৰে। তেনেস্থলত দলটোৱে এনেকুৱা কথাৰে অসমৰ ৰাইজক আভুৱা ভাঁৰিবৰ চেষ্টা কৰা যেনহে লাগে।
উল্লেখযোগ্য যে পঞ্চায়ত নিৰ্বাচনৰ সময়ত দলটোৱে বিজেপিৰ নেতাসকলৰ পৰা চৰম অপমানসদৃশ মন্তব্য, বিদ্ৰূপ, আৰু কটু সমালোচনাৰ সন্মুখীন হোৱাৰ পিছত মিত্ৰতাৰ পৰা আঁতৰি অহাৰ ইংগিত দিছিল। “মিত্ৰতা ভংগ কৰিবলৈ এক মিনিটো নালাগে।” এয়া আছিল সভাপতি অতুল বৰাৰ মন্তব্য।
কিন্তু পঞ্চায়ত নিৰ্বাচন শেষ হোৱাৰ পিছতে দলৰ নেতৃবৰ্গই নিজৰ সেই স্থিতি ঢিলাই দিয়ে। নিজৰ সিদ্ধান্তৰ ওপৰত ভৰসা কৰাৰ পৰিৱৰ্তে মিত্ৰতা ভংগৰ বল অমিত শ্বাহলৈ ঠেলি নিজে স্বস্তি লৈছে নেতৃবৰ্গই।
আনহাতে আজি মহন্তই সংবাদ মাধ্যমৰ আগত কয়, “মিত্ৰতা ভংগ কৰা-নকৰা সন্দৰ্ভত দলে আগন্তুক দিনত অনুষ্ঠিত কৰিব লগীয়া কাৰ্য্য নিৰ্বাহকত সিদ্ধান্ত ল’ব।”