বিজেপি আৰু অগপ মিত্ৰজোঁটৰ আসন ভাগ বতৰোবা অদ্যপি চুড়ান্ত হোৱা নাই যদিও ৮১ নং লাহৰীঘাট সমষ্টি অসম গণ পৰিষদ দলৰ ভাগত পৰিব বুলি প্ৰচাৰ চলাৰ লগে লগে বাহিৰা সমষ্টিৰ উপৰি ঘৰুৱা সমষ্টিৰ প্ৰাৰ্থীত্ব প্ৰত্যাশীসকল দলীয় টিকটকলৈ তৎপৰ হৈ পৰিছে।
বাহিৰা সমষ্টিৰ পৰা অহা এনে এগৰাকী প্ৰাৰ্থীত্ব প্ৰত্যাশীক কেন্দ্ৰ কৰি লাহৰীঘাট অগপ আৰম্ভ হৈছে অন্তঃকন্দল।
কেন্দ্ৰীয় নেতৃত্বৰে থকা সু-সম্পৰ্কৰ সুযোগলৈ আব্দুল জলিল নামৰ এজন নেতাই সুদুৰ কমলপুৰৰ পৰা আহি লাহৰীঘাট সমষ্টিৰ দলীয় টিকট দাবী কৰিছে। এই কথাক সহজভাবে ল’ব পৰা নাই লাহৰীঘাট নিষ্ঠাৱান অগপ কৰ্মীসকলে।
লাহৰীঘাট সমষ্টিত মৃতপ্ৰায় হৈ পৰা দলটোৰ পুনৰ সক্ৰিয় কৰি তোলা অগপ কৰ্মীৰ আৱেগ অনুভৱক গুৰুত্ব নিদি কেৱল নিজৰ স্বাৰ্থ সিদ্ধিৰ বাবে দলটোত চলিত বৰ্ষৰ ১০ জানুবাৰিত অগপত যোগদান কৰিয়ে দলীয় টিকট বিচৰা কাৰ্যত জাঙোৰ খাই উঠিছে লাহৰীঘাট সমষ্টিৰ তৃণমূলৰ অগপ কৰ্মীসকল।
তাৰেই পৰিণতিত দেওবাৰে অগপৰ লাহৰীঘাট সমষ্টি সমিতিৰ কাৰ্যালয়ৰ সন্মুখত ক্ষুব্ধ অগপ কৰ্মীয়ে ন-অগপ আব্দুল জলিলৰ পুত্তলিকা জ্বলোৱাৰ উপৰি আব্দুল জলিল গ’বেক, আব্দুল জলিল মুৰ্দাবাদ, বিদেশী প্ৰাৰ্থী নামানো আদি শ্ল’গানেৰে উত্তাল কৰি তোলে ইয়াৰ পৰিবেশ।
উল্লেখ্য যে ৮১ নং লাহৰীঘাট সমষ্টি ২৪ খন আঞ্চলিকে পূৰ্বৰে এজন শক্তিশালী স্থানীয় প্ৰাৰ্থীক টিকট দিয়াৰ বাবে দাবী জনাই আহিছে।
