বিজেপিৰ সৈতে মিত্ৰতাৰ পৰা লাভৱান হৈছে নেকি অগপ দল বা অগপ দলৰ মন্ত্ৰী-বিধায়ক! মাজে মাজে উক দি উঠা ক্ষোভ-অসন্তুষ্টিবোৰ, মিত্ৰতা ভংগৰ হুংকাৰবোৰ আচলতে দলীয় নহয় নেকি? সেয়া দুই এজন নেতাৰ ব্যক্তিগত মত নেকি?
এই প্ৰশ্ন উদয় হোৱাৰ মূলতে হ’ল আজি এখন সংবাদমেলত অগপ দলটোৰ সভাপতি অতুল বৰাই কৰা মন্তব্য। আজি সংবাদমেলত বৰাই পৰিৱৰ্তিত সুৰত কৰা মন্তব্যই এই কথা স্পষ্ট কৰিলে যে আগন্তুক পঞ্চায়ত অথবা লোকসভা নিৰ্বাচনত মিত্ৰতা অব্যাহত থাকিব অগপ আৰু বিজেপিৰ।
আগন্তুক সময়ছোৱাত অগপ-বিজেপিৰ মিত্ৰতাক লৈ প্ৰশ্ন উত্থাপন হৈ থকাৰ সময়তে বা বিষয়টোক লৈ ব্যাপক চৰ্চা চলি থকাৰ সময়তে অতুল বৰাই আজি কয়, “আগন্তুক দিনবোৰত কেনেকৈ মিত্ৰজোঁটৰ সু-সমন্বয় ৰক্ষা কৰি চলিব পাৰি, সেই বিষয়ে মুখ্য মন্ত্ৰীৰ সৈতে আলোচনা কৰিছিলো।”
আনহাতে কংগ্ৰেছৰ অপশাসন দূৰ কৰাৰ বাবেই যোৱাবাৰ দুয়োটা দলৰে মতানৈক্য থকাৰ পাছতো মিত্ৰজোঁট কৰিছিল বুলি অতুল বৰাই কয়।
অৱশ্যে মিত্ৰজোঁটত থাকিও ৰাজ্যৰ সমস্যাবোৰৰ ক্ষেত্ৰত অগপৰ স্থিতি অটুট ৰখাৰ কথা উনুকিয়াই দিয়ে সভাপতিগৰাকীয়ে।
তেওঁ কয় “মিত্ৰজোঁটত আছো যদিও যোৱা দিনবোৰত আমাৰ স্থিতিৰ পৰা আঁতৰি যোৱা নাই। তাৰ মাজতো মিত্ৰজোঁটৰ চৰকাৰখন চলাই নিব লাগিব।
উল্লেখযোগ্য যে, চলিত বৰ্ষৰ মে’ মাহত নেডাৰ অধিৱেশনত অংশগ্ৰহণ কৰিবলৈ আহোতে বিজেপিৰ ৰাষ্ট্ৰীয় সভাপতি অমিত শ্বাহে উত্তৰ পূবৰ ২৫খন লোকসভা আসনৰ ২১খনেই বিজেপিয়ে দখল কৰাৰ পৰিকল্পনা কৰিছে বুলি কৈছিল। কিন্তু একে সময়তে এইটোও স্পষ্ট কৰি দিছিল যে পৰৱৰ্তী লোকসভা নিৰ্বাচন পৰ্য্যন্ত দলটোৱে ইয়াৰ মিত্ৰ অগপ আৰু বি পি এফৰ সৈতে মিত্ৰতা অব্যাহত ৰাখিব।
ইয়াৰোপৰি আগন্তুক পঞ্চায়ত তথা লোকসভা নিৰ্বাচনত অগপৰ সৈতে মিত্ৰতা চলাই নিয়াৰ ইংগিত দিছিল বিজেপিৰ ৰাজ্যিক সভাপতি ৰঞ্জিত দাসেও। যোৱা ২৬ জুনত সংবাদমেলৰ জৰিয়তে বিজেপিৰ ৰাজ্যিক সভাপতি ৰঞ্জিত দাসে অহা ছেপ্তেম্বৰ মাহত অনুষ্ঠিত হ’ব লগীয়া পঞ্চায়ত নিৰ্বাচনত অগপ-বিপিএফৰ সৈতে মিত্ৰতাৰে নিৰ্বাচনত প্ৰতিদ্বন্দ্বিতা কৰাৰ সম্ভাৱনা ব্যক্ত কৰিছিল। লগতে আগন্তুক বিধানসভা নিৰ্বাচনত অগপ-বিপিএফৰ মিত্ৰতাৰে ১৪খন লোকসভা আসনেই দখলত অনাৰ কথা কৈছিল।
আনহাতে, কিছুদিন পূৰ্বে সাংবাদিকৰ সৈতে বাৰ্তালাপত অগপৰ সভাপতি অতুল বৰাই কৈছিল যে পঞ্চায়ত নিৰ্বাচনত অগপই অকলে অৱতীৰ্ণ হ’ব তথা দলটোৱে ইতিমধ্যে সাংগঠনিক ভেটি সুদৃঢ় কৰি তোলাৰ দাবী কৰি বিগত সময়ছোৱাত তৃণমূল পৰ্যায়ত দলক শক্তিশালী কৰি তোলাৰ বাবে বিভিন্ন পদক্ষেপ গ্ৰহণ কৰিছে।
বৰ্তমান সুৰ সলোৱা অগপ নেতাগৰাকীয়ে তাৰ পৰিৱৰ্তে আগন্তুক দিনবোৰত মিত্ৰজোঁটৰ সৈতে সু-সমন্বয় ৰক্ষা কৰি চলিব বুলি কোৱা কথাষাৰে ৰাজনৈতিক বিশ্লেষকৰ মাজত নতুন মাত্ৰা পাইছে।
আনহাতে, কেইদিনমান পূৰ্বে অগপৰ সাধাৰণ সম্পাদক তথা পশ্চিম গুৱাহাটী সমষ্টিৰ বিধায়ক ৰমেন্দ্ৰ নাৰায়ণ কলিতাই বিজেপিৰ উচ্চস্তৰীয় নেতাৰ আগত আগন্তুক লোকসভা নিৰ্বাচনত অগপৰ বাবে ৫খন আসন বিচাৰিছিল আৰু লগতে উক্ত আসনকেইখনত অগপৰ স্থিতি সুদৃঢ় বুলিও দাবী কৰিছিল।
ইয়াৰ বিপৰীতে মঙলবাৰে অগপ সভাপতি অতুল বৰাৰ স্থিতিত আপোচ কৰি হ’লেও মিত্ৰতা ৰক্ষাৰ আগ্ৰহ দেখা পোৱা গ’ল।
এই সন্দৰ্ভত বৰাই কয়, “আগত পঞ্চায়ত নিৰ্বাচন, গতিকে লোকসভা নিৰ্বাচনলৈ বহুদিন আছে। এতিয়াই আমি কিমানখন আসন লাগিব সেই কথা স্পষ্ট কৰা নাই। লোকসভা নিৰ্বাচনৰ আগতহে আমি কেইখন আসন লাগে সেই কথা ক’ম।”
এক দলৰে দুজন নেতাৰ বিপৰীত ভাষ্যই বৰ্তমান পৰিস্থিতিত বিশেষ তাৎপৰ্য্য বহন কৰিছে। ইয়াৰোপৰি দলটোৰ কিছুসংখ্যক তৃণমূল কৰ্মীয়ে ইতিমধ্যই অসন্তুষ্টি প্ৰকাশ কৰিছে।
