ৰাজ্যত পঞ্চায়ত নিৰ্বাচনৰ দিন চমু চাপি অহাৰ সময়তে মন্ত্ৰী বিধায়কসকলক নিজৰ সমষ্টিত ব্যস্ত হৈ পৰা পৰিলক্ষিত হৈছে। আজি কৃষি মন্ত্ৰী তথা বোকাখাতৰ বিধায়ক অতুল বৰাই বোকাখাত নগৰকে ধৰি কেইবাখনো গাঁও পঞ্চায়তৰ বিভিন্ন স্থানত এলানি পথ নিৰ্মাণ কামৰ উদ্বোধন কৰে।
মন্ত্ৰী অতুল বৰাই মুঠ ১,০৪,৯৬,৪৬০ টকাৰ আঁচনিৰে বোকাখাত পৌৰসভাৰ চগমল চৌধুৰী পথ, চি এন বি কলেজ পথ, মুহি মেধি পথ আৰু ৩৭ নং ৰাষ্ট্ৰীয় ঘাই পথৰ পৰা ম’হমাইকী সংযোগী পথৰ নিৰ্মানৰ কামৰ শুভাৰম্ভ কৰে।
অনুষ্ঠানত গোলাঘাট জিলা পৰিষদৰ মূখ্য কাৰ্যবাহী বিষয়া অভিজিত বৰুৱা, বোকাখাতৰ মহকুমাধিপতি বিবেক শ্যাম, বোকাখাত পৌৰসভাৰ পৌৰপতি চিত্ৰা কাৰ্ডং, বোকাখাত ৰাজহচক্ৰৰ চক্ৰ বিষয়া খনিন্দ্ৰ দাস, মহকুমা আৰক্ষী বিষয়া বিতুল চেতিয়া, পৌৰসভাৰ কেউটা ৱাৰ্ডৰ ৱাৰ্ড সদস্যৰ লগতে অনান্য ব্যক্তিসকল উপস্থিত থাকে।
তদুপৰি মন্ত্ৰীগৰাকীয়ে আজি বোকাখাত মহকুমা কল্যাণ বিভাগৰ দ্বাৰা ২৭৫ নং অনুচ্ছেদৰ অধীনত ৪ লাখ ৯৫ হাজাৰ টকাৰে নিৰ্মিত টিমৌআটি মৰং ঘৰটিৰ শুভ উদ্বোধন কৰি ৰাইজলৈ উৎসৰ্গা কৰে।
উল্লেখযোগ্য যে গোলাঘাট ৰাজ্যিক পথ সংমণ্ডলৰ অন্তৰ্গত বোকাখাত সমষ্টিত কেবিনেট মন্ত্ৰীজনে লুখুৰাখনীয়া, ডিফলু বাগিচা, আনন্দপুৰ বাগিচা, কৰৈআটি গাঁও, মণ্ডল গাঁও, মহমাইকী গাঁও, গোঁসাইবাৰী, গৰমুৰ, বোকাখাত বাগিচা, বৰছাপৰি বাগিছা, বিহৰা বাগিচা, নুমলীগড় বাগিচা, নিকৰী, নপমুৱা, তামুলীপথাৰ, কচুপথাৰ, ৰাধাবাৰী বাগিচা, ৰঙাগঢ়া বাগিচা, মৰঙীয়াল, বহুপথাৰক লৈ মুঠ ২৬ টা পথৰ আধাৰশিলা স্থাপন কৰে।
