একাডেমী অৱ মোচন পিকচাৰ আৰ্টছ এণ্ড চাইন্সেছৰ ব’ৰ্ড অৱ গভৰ্ণৰে আগন্তুক ৯৯ সংখ্যক অস্কাৰ বঁটাৰ বাবে কেইটামান গুৰুত্বপূৰ্ণ নিয়মৰ পৰিৱৰ্তন ঘোষণা কৰিছে। এই নতুন নিয়ম অনুসৰি, কৃত্ৰিম বুদ্ধিমত্তা বা এআই ব্যৱহাৰ কৰি নিৰ্মাণ কৰা কোনো বিষয়বস্তুক অস্কাৰৰ মঞ্চত আদৰণি জনোৱা নহ’ব। অৰ্থাৎ অস্কাৰত জয়লাভ কৰিবলৈ হ’লে ছবি এখন সম্পূৰ্ণৰূপে মানুহৰ দ্বাৰা সৃষ্টি হোৱাটো বাধ্যতামূলক কৰা হৈছে। চলচ্চিত্ৰ জগতত যন্ত্ৰৰ ব্যৱহাৰ বৃদ্ধি পোৱাৰ সময়তে স্বয়ংক্ৰিয়কৰণৰ বিৰুদ্ধে একাডেমীৰ এই সিদ্ধান্তক এক ঐতিহাসিক পদক্ষেপ হিচাপে গণ্য কৰা হৈছে।
দ্য হলিউড ৰিপ’ৰ্টাৰৰ এক প্ৰতিবেদন অনুসৰি, মানুহৰ সৃষ্টিশীলতাৰ প্ৰতি এআইয়ে কঢ়িয়াই অনা অস্তিত্বৰ সংকটৰ প্ৰতি লক্ষ্য ৰাখিয়েই একাডেমীয়ে এই কঠোৰ সিদ্ধান্ত গ্ৰহণ কৰিছে। একাংশ বিশ্লেষকৰ মতে, ২০২৫ চনত প্ৰয়াত অভিনেতা ভেল কিলমাৰৰ এটা আধৰুৱা অভিনয় এআই প্ৰযুক্তিৰ জৰিয়তে সম্পূৰ্ণ কৰা হৈছিল আৰু তাৰ প্ৰতিক্ৰিয়া স্বৰূপেই একাডেমীয়ে এই পদক্ষেপ ল’বলৈ বাধ্য হৈছে। ইয়াৰ উপৰিও, অস্কাৰৰ বাবে কেৱল মানুহে নিজ হাতে লিখা চিত্ৰনাট্যহে গ্ৰহণযোগ্য হ’ব বুলি স্পষ্ট কৰি দিয়া হৈছে। ইয়াৰ পূৰ্বে এআইৰ প্ৰভাৱ ৰোধ কৰিবলৈ চলচ্চিত্ৰ উদ্যোগটোত এনে কোনো সুনিৰ্দিষ্ট ব্যৱস্থা গ্ৰহণ কৰা হোৱা নাছিল।
২০২৪ চনত প্ৰখ্যাত প্ৰযোজক তথা অভিনেতা টাইলাৰ পেৰীয়ে অ’পেনএআইৰ নতুন ভিডিঅ’ নিৰ্মাণ সঁজুলি ‘ছ’ৰা’ৰ ক্ষমতা দেখি আশ্চৰ্যপ্ৰকাশ কৰিছিল। ইয়াৰ পিছতেই তেওঁ নিজৰ আটলাণ্টাৰ ষ্টুডিঅ’ৰ প্ৰায় ৮০ কোটি ডলাৰৰ সম্প্ৰসাৰণৰ কাম অনিৰ্দিষ্টকাললৈ বন্ধ কৰি দিয়াৰ কথা ঘোষণা কৰিছিল। পেৰীয়ে সেই সময়ত সকীয়াই দিছিল যে এই প্ৰযুক্তিয়ে চলচ্চিত্ৰ উদ্যোগৰ প্ৰতিটো দিশতে প্ৰভাৱ পেলাব আৰু ইয়াৰ ফলত অভিনেতা, সম্পাদনা কৰ্মীসকল আৰু শব্দযন্ত্ৰীসকলৰ চাকৰিৰ প্ৰতি ডাঙৰ ভাবুকি আহি পৰিব।
পেৰীয়ে শিল্পীসকলৰ সুৰক্ষাৰ কথা উল্লেখ কৰি কৈছিল যে এনে নিয়ম নহ’লে উদ্যোগটো বাচি থকাটো টান হ’ব। এতিয়া একাডেমীয়ে নতুন নিয়ম প্ৰৱৰ্তন কৰি পেৰীকে ধৰি অন্যান্য নেতাসকলে দীৰ্ঘদিন ধৰি বিচাৰি থকা সুৰক্ষা প্ৰদান কৰিছে। নতুন নিয়ম অনুসৰি, কেৱল মানুহে প্ৰদৰ্শন কৰা অভিনয়হে পুৰস্কাৰৰ বাবে যোগ্য হ’ব আৰু ইয়াৰ বাবে অভিনেতাৰ স্পষ্ট সন্মতি থাকিব লাগিব। তদুপৰি, মানুহৰ সৃষ্টিশীলতা বজাই ৰাখিবলৈ একাডেমীয়ে যিকোনো মনোনয়নৰ ক্ষেত্ৰত এআইৰ ব্যৱহাৰ সম্পৰ্কে সবিশেষ তথ্য বিচৰাৰ অধিকাৰ সংৰক্ষিত কৰি ৰাখিছে।
এআই নিষিদ্ধ কৰাৰ উপৰিও একাডেমীয়ে শ্ৰেষ্ঠ আন্তঃৰাষ্ট্ৰীয় চলচ্চিত্ৰৰ ক্ষেত্ৰত থকা দশক দশক পুৰণি নিয়মৰো পৰিৱৰ্তন কৰিছে। আগতে এখন দেশৰ পৰা কেৱল এখন ছবিয়েহে প্ৰতিযোগিতাত অংশ ল’ব পাৰিছিল যদিও এতিয়া এখন দেশে একাধিক ছবিৰ মনোনয়ন লাভ কৰিব পাৰিব। লগতে, কান, ভেনিচ, বাৰ্লিন, চাণ্ডেন্স বা টৰন্টোৰ দৰে সন্মানীয় চলচ্চিত্ৰ মহোৎসৱত শীৰ্ষ বঁটা লাভ কৰা ছবিয়ে স্থানীয় নিৰ্বাচন প্ৰক্ৰিয়া পাৰ নোহোৱাকৈয়ে পোনে পোনে যোগ্যতা অৰ্জন কৰিব পাৰিব। আটাইতকৈ গুৰুত্বপূৰ্ণ পৰিৱৰ্তনটো হ’ল, এতিয়াৰ পৰা এই শিতানত অস্কাৰ বঁটা কেৱল দেশখনৰ নামত দিয়াৰ পৰিৱৰ্তে ছবিখনৰ পৰিচালকজনক তেওঁৰ নামেৰে প্ৰদান কৰা হ’ব। যিদৰে চলিত বৰ্ষৰ আৰম্ভণিতে নৰৱেৰ ছবি এখনৰ জয়ৰ কৃতিত্ব পোনপটীয়াকৈ চলচ্চিত্ৰ নিৰ্মাতা জোৱাচিম ট্ৰাইয়াৰক দিয়াৰ কথা আছিল, ঠিক সেইদৰেই এতিয়াৰে পৰা পৰিচালকসকলে এই সন্মান লাভ কৰিব।
