অন্ধ্ৰ প্ৰদেশৰ বিশাখাপট্টনমত শেহতীয়াকৈ গুগল আৰু ৰাজ্য চৰকাৰে গুগল ক্লাউড ইণ্ডিয়া এআই হাবৰ কাম আৰম্ভ কৰিছে। এই প্ৰকল্পটোৱে ভাৰত যাতে এতিয়া কেৱল তথ্য প্ৰযুক্তি সেৱা আৰু ক’ডিঙৰ কামতে সীমাবদ্ধ নাথাকি নিজাকৈ বৃহৎ প্ৰযুক্তিগত আন্তঃগাঁথনি গঢ়ি তুলিব পাৰে সেয়া নিশ্চিত কৰিছে। বিশাখাপট্টনমত হ’বলগীয়া এই বৃহৎ ডিজিটেল আন্তঃগাঁথনি প্ৰকল্পটোত প্ৰায় ১.২৫ লাখ কোটি টকা বিনিয়োগ কৰা হ’ব বুলি আশা কৰা হৈছে। ইয়াৰ ফলত দেশত উন্নত মানৰ কম্পিউটাৰ হাৰ্ডৱেৰৰ চাহিদা বৃদ্ধি পাব আৰু ভাৰতৰ ছেমিকণ্ডাক্টৰ উৎপাদন খণ্ডটোকো সহায় কৰিব। ইয়াৰ উপৰি এই প্ৰকল্পটো আমেৰিকা-ভাৰতৰ অৰ্থনৈতিক সংযোগ আঁচনিৰ সৈতে জড়িত হোৱাৰ বাবে বিশাখাপট্টনমত বহুতো আন্তঃৰাষ্ট্ৰীয় চাবমেৰিন কেবল সংযোগ হ’ব। ফলত ভাৰতীয় ডাটা বা তথ্যসমূহ আন কোনো বন্দৰৰ ওপৰত নিৰ্ভৰ নকৰাকৈ পোনে পোনে আমেৰিকা, দক্ষিণ আফ্ৰিকা, ছিংগাপুৰ আৰু অষ্ট্ৰেলিয়ালৈ পঠিয়াব পৰা যাব। ইয়াৰ দ্বাৰা লোহিত সাগৰীয় অঞ্চলৰ ভূ-ৰাজনৈতিক অস্থিৰতাৰ ওপৰত থকা নিৰ্ভৰশীলতা হ্ৰাস পাব আৰু ডাঙৰ মহানগৰসমূহৰ বাহিৰতো প্ৰযুক্তিগত উন্নয়ন সম্ভৱ হ’ব।
কিন্তু এই বৃহৎ প্ৰকল্পটোৰ সৈতে কিছুমান ডাঙৰ প্ৰত্যাহ্বানো সাঙোৰ খাই আছে। যিহেতু এই কেন্দ্ৰটোৱে স্পৰ্শকাতৰ তথ্যসমূহ পৰিচালনা কৰিব, গতিকে ভাৰতীয় কোম্পানীসমূহৰ খৰচ কম হ’ব যদিও তেঁওলোকে এটা বিদেশী কোম্পানীৰ ওপৰত সম্পূৰ্ণৰূপে নিৰ্ভৰ কৰিবলগীয়া হ’ব। ইয়াৰ ফলত দেশৰ সাৰ্বভৌম এআই বা প্ৰযুক্তিৰ ধাৰণাটো কেৱল নামতহে থাকি যাব পাৰে। আনহাতে এই এআই মডেলসমূহ চলাবলৈ ১ গিগৱাট বিদ্যুতৰ প্ৰয়োজন হ’ব, যিয়ে স্থানীয় বিদ্যুৎ যোগান ব্যৱস্থাত এক বৃহৎ চাপৰ সৃষ্টি কৰিব পাৰে। গুগলে ১০০ শতাংশ নৱীকৰণযোগ্য শক্তি ব্যৱহাৰ কৰাৰ প্ৰতিশ্ৰুতি দিছে যদিও জৰুৰীকালীন অৱস্থাৰ বাবে ৰখা ডিজেল জেনেৰেটৰসমূহে স্থানীয়ভাৱে বায়ু প্ৰদূষণ বৃদ্ধি কৰিব পাৰে বুলি আশংকা কৰা হৈছে।
এই প্ৰকল্পটোৰ বাবে আন এক আটাইতকৈ ডাঙৰ সমস্যা হৈছে পানীৰ ব্যৱহাৰ। বিশাখাপট্টনমৰ গৰম আৰু আৰ্দ্ৰ বতৰত কম্পিউটাৰসমূহ ঠাণ্ডা কৰি ৰাখিবলৈ প্ৰতিদিনে প্ৰায় ২০ নিযুত লিটাৰ পানীৰ প্ৰয়োজন হ’ব পাৰে। কিন্তু এই জিলাখনত ইতিমধ্যে খোৱাপানী আৰু কৃষিৰ বাবে পানীৰ তীব্ৰ নাটনি আছে আৰু ইয়াত ভূগৰ্ভস্থ পানীৰ স্তৰো ৰাজ্যখনৰ ভিতৰতে আটাইতকেই নিম্ন। ইয়াৰ উপৰি মানৱ অধিকাৰ কৰ্মীসকলে অভিযোগ কৰিছে যে চৰকাৰে এই প্ৰকল্পটোক এনে এটা শ্ৰেণীত অন্তৰ্ভুক্ত কৰিছে যাৰ ফলত ইয়াৰ কোনো সম্পূৰ্ণ পৰিৱেশ প্ৰভাৱ মূল্যায়ন বা জনশুনানি কৰাৰ প্ৰয়োজন হোৱা নাই। ভাৰতত এতিয়াও পৰিৱেশৰ সুৰক্ষা নিশ্চিত কৰিবলৈ কেন্দ্ৰীয়ভাৱে এক শক্তিশালী নিয়মৰ প্ৰয়োজন আছে, নহ’লে প্ৰযুক্তিৰ নামত দেশৰ পৰিৱেশ আৰু গণতান্ত্ৰিক ব্যৱস্থা ক্ষতিগ্ৰস্ত হোৱাৰ সম্ভাৱনা আছে বুলি কৰ্মীসকলে উল্লেখ কৰে।
