অল ইণ্ডিয়া কাউন্সিল ফৰ টেকনিকেল এডুকেশ্যনে(এ আই চি টি ই) ইয়াৰ বিভিন্ন অভিযান্ত্ৰিক পাঠ্যক্ৰমত নামভৰ্তিৰ অন্তিম সময়সীমা ৩১ ডিচেম্বৰ পৰ্যন্ত বৃদ্ধি কৰাৰ কথা ঘোষণা কৰে।
কোভিডৰ বাবে কিছুসংখ্যক ৰাজ্যই পলমকৈ কেট ( CET)ৰ ফলাফল ঘোষণা কৰা কাৰণে অল ইণ্ডিয়া কাউন্সিল ফৰ টেকনিকেল এডুকেশ্যনে এই সিদ্ধান্ত গ্ৰহণ কৰে।
‘‘যিবোৰ ৰাজ্যত কাউঞ্চিলিং আৰু নামভৰ্তি আৰম্ভ হোৱা নাই সেইবোৰ ৰাজ্যত বিভিন্ন পাঠ্যক্ৰমত নাম ভৰ্তিৰ অন্তিম সময়সীমা বৃদ্ধি কৰা হৈছে,’’ এ আই চি টি ইয়ে উল্লেখ কৰে।
আনহাতে, যিবোৰ ৰাজ্যত এতিয়ালৈ শ্ৰেণীত পাঠদান আৰম্ভ হোৱা নাই সেইবোৰ ৰাজ্যতো এই সিদ্ধান্ত প্ৰযোজ্য হ’ব।
মূলত ছাত্ৰ-ছাত্ৰীৰ শিক্ষা বৰ্ষ নষ্ট নহ’বৰ বাবে এ আই চি টি ইয়ে এনে সিদ্ধান্ত গ্ৰহণ কৰিছে বুলি উল্লেখ কৰে।
উল্লেখযোগ্য যে, বিভিন্ন ৰাজ্যই চলিত বৰ্ষত কোভিডৰ সংক্ৰমণৰ পৰিপ্ৰেক্ষিতত সময়মতে পৰীক্ষাৰ ফলাফল ঘোষণা কৰিবলৈ সক্ষম হোৱা নাছিল।
কোভিডৰ সংক্ৰমণৰ বাবে ঘোষণা কৰা ল’কডাউনৰ পূৰ্বৰে পৰা ভাৰতৰ শিক্ষা প্ৰতিষ্ঠান সমূহ প্ৰায় বন্ধ হৈ আছিল। এতিয়া পৰ্যায় ক্ৰমে বিভিন্ন শিক্ষানুষ্ঠান খোলাৰ বাবে ৰাজ্য চৰকাৰ সমূহে ব্যৱস্থা গ্ৰহণ কৰিছে।