দিল্লীৰ পৰা পঞ্জাৱলৈ যোৱাৰ পথত এক ভয়ংকৰ নাটকীয় ঘটনাৰ সাক্ষী হ’ল এয়াৰ ইণ্ডিয়াৰ এখন যাত্ৰীবাহী বিমান। মাজ আকাশত দিশ পাহৰি হঠাতে আন্তঃৰাষ্ট্ৰীয় সীমা অতিক্ৰম কৰি পাকিস্তানৰ আকাশত সোমাই পৰে বিমানখন। এই কথা জানিব পৰাৰ লগে লগে দুয়োখন দেশৰ বিমান চলাচল বিভাগত তীব্ৰ চাঞ্চল্যৰ সৃষ্টি হয়। পাকিস্তানৰ এয়াৰ ট্ৰেফিক কণ্ট্ৰোলে এই কথা গম পোৱাৰ লগে লগে বিমানখনক সতৰ্ক কৰি দিয়ে। ইয়াৰ পিছত পাইলটজনে লগে লগে বিমানখন ঘূৰাই আনি পুনৰ ভাৰতৰ আকাশলৈ লৈ আহে। এই নজিৰবিহীন ঘটনাটোক লৈ ইতিমধ্যে উচ্চ পৰ্যায়ৰ তদন্ত আৰম্ভ হৈছে।
এই ঘটনাটো যোৱা সোমবাৰে নিশা সংঘটিত হৈছিল। নিশা ৯ বাজি ১৮ মিনিটত দিল্লীৰ বিমানবন্দৰৰ পৰা এয়াৰ ইণ্ডিয়াৰ এ আই ৪৭৯ নম্বৰৰ এখন বিমানে উৰণ আৰম্ভ কৰিছিল। বিমানখনৰ গন্তব্যস্থান আছিল পঞ্জাৱৰ অমৃতসৰৰ শ্ৰী গুৰু ৰামদাসজী আন্তঃৰাষ্ট্ৰীয় বিমানবন্দৰ। কিন্তু অমৃতসৰত অৱতৰণ কৰাৰ ঠিক আগমুহূৰ্তত বিমানখন আটাৰী সীমান্তৰ ফালে আগুৱাই যায় আৰু আন্তঃৰাষ্ট্ৰীয় সীমা অতিক্ৰম কৰি পাকিস্তানৰ আকাশত প্ৰৱেশ কৰে। জানিব পৰা মতে, বিমানখন মাত্ৰ দুমিনিটমান সময়ৰ বাবে পাকিস্তানৰ আকাশত আছিল। কিন্তু সেই সামান্য সময়ৰ ভিতৰতে লাহোৰৰ এয়াৰ ট্ৰেফিক কণ্ট্ৰোল সক্ৰিয় হৈ পৰে। ৰাডাৰত ভাৰতীয় বিমানখনৰ উপস্থিতি দেখা পোৱাৰ লগে লগে তেওঁলোকে পাইলটজনলৈ কঠোৰ সতৰ্কবাণী প্ৰেৰণ কৰে। নিজৰ ভুল বুজিব পাৰি পাইলটজনে পলম নকৰি লগে লগে বিমানখন ভাৰতৰ সীমালৈ ঘূৰাই আনে।
তদন্তৰ প্ৰাথমিক সূত্ৰৰ পৰা জানিব পৰা গৈছে যে, সেই সময়ত অমৃতসৰ বিমানবন্দৰৰ আকাশত প্ৰচণ্ড বিমানৰ ভিৰ আছিল। সেইবাবে এ টি চিৰ পৰা বিমানখনক পোনে পোনে ৰানৱেত নানামি আকাশত এপাক ঘূৰিবলৈ নিৰ্দেশ দিয়া হৈছিল। পাইলটজনে সেই অনুসৰি এবাৰ অৱতৰণৰ চেষ্টা কৰি বিফল হয় আৰু বিমানখন পুনৰ ওপৰলৈ তুলি লয়। এইদৰে আকাশত ঘূৰি থাকোঁতেই বিমানখনে দিশ হেৰুৱাই কিছু সময়ৰ বাবে সীমান্ত পাৰ হৈ যায়।
পাকিস্তানৰ আকাশৰ পৰা ঘূৰি অহাৰ পিছতো অমৃতসৰৰ আকাশত ভিৰ কম নোহোৱাত বিমানখনে তাত অৱতৰণ কৰাৰ বিপদৰ আশংকা নল’লে। পাইলটজনে বিমানখন পোনে পোনে পুনৰ দিল্লীলৈ ঘূৰাই লৈ যায়। তাত বিমানখনত ইন্ধন ভৰোৱা হয়। ইয়াৰ পিছত সকলো জটিলতা অতিক্ৰম কৰি অৱশেষত বুধবাৰে গভীৰ নিশা প্ৰায় ২ বাজি ১০ মিনিটত বিমানখনে নিৰাপদে অমৃতসৰ বিমানবন্দৰত অৱতৰণ কৰে। অৱশ্যে ঘটনাৰ সময়ত বিমানখনত কিমানজন যাত্ৰী আছিল, সেয়া এতিয়াও স্পষ্টকৈ জানিব পৰা হোৱা নাই। এয়াৰ ইণ্ডিয়া কৰ্তৃপক্ষই জানিবলৈ দিয়া মতে, সমগ্ৰ বিষয়টো দেশৰ বিমান চলাচল নিয়ন্ত্ৰক সংস্থা ডি জি চি এক জনোৱা হৈছে আৰু ঘটনাটোৰ পুংখানুপুংখ তদন্ত চলি আছে। বিশেষজ্ঞসকলৰ মতে, আন্তঃৰাষ্ট্ৰীয় সীমান্তৰ ওচৰত এনে ঘটনা একেবাৰে নতুন নহয়। ইয়াৰ আগতেও ভুলৱশত পাকিস্তানৰ বিমান ভাৰতৰ আকাশত সোমাই পৰিছিল আৰু ভাৰতীয় কৰ্তৃপক্ষই তেওঁলোকক সঠিক ৰাস্তা দেখুৱাই নিৰাপদে ওলাই যোৱাত সহায় কৰিছিল।
