মাজ বাটতে যাত্ৰীসকলক এৰি পাইলটজনে ঘৰলৈ ৰাওনা হ’ল। ফলত কেইবা ঘন্টা অপেক্ষা কৰাৰ অন্তত অৱশেষত যাত্ৰীসকলে বাছেৰে গন্তব্য স্থানলৈ যাবলৈ বাধ্য হয়। দেশৰ অন্যতম আগশাৰীৰ বিমান সংস্থা এয়াৰ ইণ্ডিয়াত সংঘটিত হৈছে এনে এক ঘটনা। দৰাচলতে কি হৈছিল?
বৰ্তমান প্ৰদূষণৰ বাবে দিল্লীৰ পৰিস্থিতি অত্যন্ত বেয়া। ফলত বহু বিমানে নিৰ্ধাৰিত সময়ৰ ভিতৰত ৰাজধানীত অৱতৰণ কৰিব পৰা নাই। এয়াৰ ইণ্ডিয়াৰ এয়াৰবাছ এআই-২০২২ বিমানো একে কাৰণতে সময়মতে দিল্লীত অৱতৰণ কৰিব পৰা নাছিল। গতিকে ইয়াক জয়পুৰলৈ ডাইভাৰ্ট কৰি দিয়া হ’ল। বিমানখন তাতেই অৱতৰণ কৰা হয়। বিমানখনে ১৮০ জনতকৈ অধিক যাত্ৰী কঢ়িয়াই আনিছিল। তেওঁলোকক সকলোকে বাছেৰে গন্তব্যস্থানলৈ লৈ যাবলগীয়া হয়।
লগতে পঢ়কঃ বৃদ্ধস্য তৰুণী ভার্যা! ৬২ বছৰীয়া বিধায়কে বিয়া কৰালে ২৫ বছৰীয়া যুৱতীক
দেওবাৰে নিশা স্থানীয় সময় অনুসৰি ১০:০০ বজাত পেৰিছৰ পৰা দিল্লী অভিমুখে উৰা মৰা এয়াৰ ইণ্ডিয়াৰ বিমানখন সোমবাৰে পুৱা ১০:৩৫ বজাত দিল্লীত উপস্থিত হোৱাৰ কথা আছিল। কিন্তু সেইখন নিৰ্ধাৰিত সময়ত উপনীত হ’ব নোৱাৰিলে। কাৰণ একেটাই। সেয়া হ’ল দিল্লীৰ প্ৰদূষণ। চাৰিওফালে ধূলি আৰু ধোঁৱাই ঢাকি থোৱা আছিল। ফলত পাইলটজনে বিমানখন জয়পুৰত অৱতৰণ কৰিবলৈ বাধ্য হয়।
বিমানবন্দৰৰ সূত্ৰ অনুসৰি জয়পুৰত অৱতৰণ কৰাৰ পিছত বহু সময় অপেক্ষা কৰি আছিল আটাইবোৰ যাত্ৰী। কিন্তু তেতিয়াও পাইলটে দিল্লীলৈ বিমানখন লৈ যোৱাৰ কোনো অনুমতি নাপালে। ইফালে তেওঁৰ ডিউটিৰ সময় শেষ হৈ আহিছিল। ফলত তেওঁ সকলো যাত্ৰীক তাতেই এৰি ঘৰলৈ ৰাওনা হ’ল।
লগতে পঢ়কঃ ৪৩টা চাৰি, ২৪টা ছয়, ১৫২টা বলত অপৰাজিত ৪১৯ ৰান! শচীনৰ ১৫ বছৰৰ ৰেকৰ্ড ভংগ কৰিলে আয়ুষে
ইপিনে যাত্ৰীসকলে একো কৰিব পৰা নাছিল। সেই পৰিস্থিতিত বিমানবন্দৰত কেইবা ঘণ্টা অপেক্ষা কৰিব লগা হয়। অৱশেষত যেতিয়া তেওঁলোকে প্ৰতিবাদ কৰিবলৈ আৰম্ভ কৰে তেতিয়া তেওঁলোকক কোৱা হয় যে পাইলটজন ঘৰলৈ গৈছে। ইফালে তেওঁলোকৰ বাবে আন কোনো বিমানৰ ব্যৱস্থাও কৰা হোৱা নাছিল। ৯ ঘণ্টা অপেক্ষা কৰি অৱশেষত বাছ আৰু টেক্সিৰে গন্তব্যস্থানলৈ ৰাওনা হ’ল যাত্ৰীসকল। কোম্পানীটোৱে সমগ্ৰ ঘটনা সন্দৰ্ভত অৱশ্যে এই পৰ্যন্ত কোনো আনুষ্ঠানিক বিবৃতি দিয়া নাই।
