অসম আৰু উত্তৰ-পূবৰ জনসাধাৰণৰ নাগৰিকত্ব সংশোধনী বিধেয়কৰ প্ৰবল বিৰোধিতাৰ বাবে বিজেপি নেতৃত্বাধীন কেন্দ্ৰীয় চৰকাৰে বুধবাৰে ৰাজ্যসভাত বিধেয়কখন উত্থাপন কৰাত ব্য়ৰ্থ হোৱাত সন্তুষ্টি প্ৰকাশ কৰিছে নিখিল ভাৰত ছাত্ৰ ফেডাৰেশ্যনৰ অসম ৰাজ্যিক পৰিষদে।
ৰাজ্যসভাত বিধেয়ক উত্থাপন নোহোৱা প্ৰসংগত সংগঠনটোৰ ৰাজ্যিক সভাপতি মানস বৰাই এক বিবৃতি যোগে এ আই এছএফে ২০১৬ চনৰ ১৯ জুলাইত প্ৰথমবাৰৰ বাবে লোকসভাত বিধেয়কখনৰ প্ৰসংগ উত্থাপন হোৱাৰে পৰা বিৰোধিতা কৰি আহিছে বুলি উল্লেখ কৰে।
আনহাতে, চৰকাৰে জনসাধাৰণৰ গণতান্ত্ৰিক প্ৰতিবাদক মষিমুৰ কৰাৰ চেষ্টা কৰিছিল যদিও সকলো স্তৰৰ জনতাৰ সহযোগত এই প্ৰচেষ্টা ব্যৰ্থ হয় বুলিও ৰাজ্যিক সভাপতিজনে মত ব্যক্ত কৰে। বিজেপি চৰাকাৰে অধ্য়াদেশ জাৰি কৰি বিধেয়ক গৃহীত কৰাৰ কূট কৌশল ৰচনা কৰিব পাৰে বুলি সন্দেহ ব্যক্ত কৰি অসম আৰু উত্তৰ-পূবৰ জনসাধাৰণক এই ক্ষেত্ৰত সজাগ হৈ থাকিবলৈ আহ্বান জনাই বৰাই।
‘‘এই সাময়িক জয়ত অধিক আবেগিক হৈ আনন্দত মতলীয়া হ’লে নহ’ব, এতিয়া বিকল্প গঢ়াৰ সময়। নহ’লে এই জয় পৰাজয়লৈ ৰূপান্তৰিত হ’বলৈ বেছি সময় নালাগিব’’ বুলি অসমৰ ৰাইজক সচেতন হৈ থকাৰ বাবে অনুৰোধ কৰি ৰাজ্যত গঢ় লোৱা বিধেয়ক বিৰোধী আন্দোলনক ভবিষ্যতে বিজেপি বিৰোধী আন্দোলন হিচাপে গঢ় দিবলৈ কয় ছাত্ৰ সংগঠনটোৰ অসম ৰাজ্যিক পৰিষদৰ উপ-সভাপতি বিতোপন গগৈয়ে। অসম বিৰোধী দলটোক আগন্তুক নিৰ্বাচনত যোগ্য প্ৰত্যুত্তৰ দি অসমৰ ৰাজনীতিৰ পৰা বিদায় দিয়াৰো পোষকতা কৰে সংগঠনটোৱে।
