বৰপেটা চহৰৰ এটি দুখীয়া পৰিয়ালক আজি আজমল ফাউণ্ডেশ্যনৰ তৰফৰপৰা প্ৰদান কৰা হয় এখন ই-ৰিক্সা। দেখাত সৰু যেন লাগিলেও দুৰ্ভগীয়া পৰিয়ালটোলৈ এই খবৰটোৱে কঢ়িয়াই আনিছে কিছু আশাৰ বতৰা।
পৰিয়ালটোৰ এক.মাত্ৰ উপাৰ্জনক্ষম ব্যক্তিগৰাকী প্ৰায় এবছৰ পূৰ্বে মৃত্যু হয়। পৰিয়ালটোক কিছু সকাহ দিয়াৰ উদ্দেশ্যে ই-ৰিক্সাখন আজি প্ৰদান কৰা হয়৷
উল্লেখ্য যে, বৰপেটা চহৰৰ ঘোঁৰামাৰা হাটীৰ জিতু দাস নামৰ দুখীয়া লোকগৰাকী এবছৰ পূৰ্বে নিজ গৃহত দুৰাৰোগ্য ৰোগত আক্ৰান্ত হৈ শয্যাশায়ী হৈ আছিল। এই লোকগৰাকীৰ চিকিৎসাৰ সহায়ৰ বাবে বৰপেটাৰ সংবাদকৰ্মী পুলেন্দ্ৰ দাসৰ লগতে সতীৰ্থ সকলে বাতৰি পৰিৱেশন কৰিছিল।
এই বাতৰিৰ ওপৰত ভিত্তি কৰি বিগত বৰ্ষৰ ছেপ্টেম্বৰ মাহত আজমল ফাউণ্ডেশ্যনৰ হৈ মুফতি ছামচুদ্দিন আহমেদ কাছিমী আৰু আশ্ৰাফুল মামুনে জিতু দাসৰ গৃহত উপস্থিত হৈ কিছু আৰ্থিক সাহায্য প্ৰদান কৰে।
কিন্তু দুৰ্ভাগ্যবশতঃ আৰ্থিক সাহায্য প্ৰদানৰ এদিন পিছতেই দুৰাৰোগ্য ৰোগত আক্ৰান্ত হৈ থকা জিতু দাসৰ মৃত্যু হয়।
এই খবৰ লাভ কৰি আজমল ফাউণ্ডেশ্যনৰ প্ৰতিনিধি সকল আৱেগিক হৈ পৰে আৰু দুৰ্ভগীয়া পৰিয়ালটোৰ সকাহ হ’ব পৰাকৈ সংবাদকৰ্মী পুলেন্দ্ৰ দাসৰ সৈতে পুনৰ আলোচনা কৰে। এই আলোচনাৰ ভিত্তিত আজি দুৰ্ভগীয়া পৰিয়ালটোক আজমল ফাউণ্ডেশ্যনৰ তৰফৰপৰা এখন ই-ৰিক্সা প্ৰদান কৰা হয়।
আজমল ফাউণ্ডেশ্যনৰ হৈ মুফতি ছামচুদ্দিন আহমেদ কাছিমী, আশ্ৰাফুল মামুনৰ উপৰি আজমল ফাউণ্ডেশ্যনৰ জিলা তত্বাৱধায়ক মোজাম্মিল হকে প্ৰয়াত জিতু দাসৰ গৃহত উপস্থিত হৈ ই-ৰিক্সাখন প্ৰদান কৰে। ই-ৰিক্সা খন ভাড়াত দি পৰিয়ালটো চলাত কিছু সহায় হ’ব বুলি আশা ব্যক্ত কৰে প্ৰতিনিধিৰ দলটোৱে।
ই-ৰিক্সাখন লাভ কৰি জিতু দাসৰ পৰিয়াল আৱেগিক হৈ পৰে আৰু আজমল ফাউণ্ডেচনক ধন্যবাদ জনায়৷