অখিল গগৈৰ জামিন আবেদন গুৱাহাটী উচ্চ ন্যায়ালয়ে নাকচ কৰাৰ পাছতে বটদ্ৰৱাত অসম জাতীয় পৰিষদৰ সভাপতি লুৰীণজ্যোতি গগৈৰ ৰাজ্য চৰকাৰলৈ দাবী ‘অখিল গগৈক অতি ক্ষিপ্ৰতাৰে বিনাচৰ্তে মুকলি কৰি দিব লাগে।‘
অখিল গগৈক অতদিনে বন্দী কৰি ৰখাটোৱে চৰকাৰখনৰ ফেচিষ্ট চৰিত্ৰ আৰু আক্ৰোশমূলক মনৰ বহিঃপ্ৰকাশ ঘটাইছে বুলি দাবী কৰি লুৰীণে লগতে কয়, ‘চৰকাৰখনে বাৰেপতি অখিল গগৈক ষড়যন্ত্ৰ কৰি বাৰেপতি বন্দী কৰি ৰাখিব বিচাৰিছে।কোনো চৰ্ত আৰোপ নকৰাকৈ অখিল গগৈক শীঘ্ৰে মুক্তি দিব লাগে।‘
তেওঁ লগতে কয়, ‘ৰাষ্ট্ৰসংঘৰ মানৱ অধিকাৰ সংস্থাই কৰ’নাৰ কালছোৱাত এটা সিদ্ধান্ত হৈছিল যে যিবোৰ কাৰাৰুদ্ধ লোক আছে বা যিসকল দেশদ্ৰোহিতাৰ গোচৰত নাই সেইসকলক মুকলি কৰি দিব পাৰে।‘
‘অসমতো যিসকল বিদেশী নথি-পত্ৰ নোহোৱাৰ বাবে কাৰাৰুদ্ধ হৈ আছিল সেইসকলক নুন্যতম বণ্ডত চহী কৰি মুকলি কৰি দিলে। অথচ অখিল গগৈক মুকলি কৰি নিদিলে।‘ গগৈয়ে লগতে কয়।
চৰকাৰ যে প্ৰতিশোধপৰায়ন বা হিংসুকভাৱে অখিল গগৈক বন্দী কৰি থ’ব বিচাৰিছে সেই কথাৰ বহিঃপ্ৰকাশ ঘটিছে বুলিও লুৰীণে কয়।
