বিপদে যেন লগ নেৰা হৈছে শিৱসাগৰৰ কোঁৱৰপুৰৰ বিখ্যাত মহন্ত পৰিয়ালৰ। শ্যামকানু মহন্তৰ পিছত এইবাৰ ৰাইজৰ ৰোষত পৰিছে শ্যামকানু মহন্তৰ ভাতৃ তথা গুৱাহাটী বিশ্ববিদ্যালয়ৰ উপাচাৰ্য ননী গোপাল মহন্ত।
ননী গোপাল মহন্তৰ বিৰুদ্ধে উত্থাপন হৈছে গুৰুতৰ দুৰ্নীতিৰ অভিযোগ। বিশ্ববিদ্যালয়ত বিত্তীয় অনিয়ম, স্বজন তোষণ, পুঁজিৰ অপব্যৱহাৰৰ দৰে বহু অভিযোগ উত্থাপন হৈছে মহন্তৰ বিৰুদ্ধে।
ইফালে, এই অভিযোগ মিছা বুলি প্ৰমাণ কৰি দেখুওৱাৰ বিপৰীতে অভিযোগ উত্থাপন কৰা লোকৰ বিৰুদ্ধে মানহানি গোচৰ তৰাৰহে ভাবুকি দিছে উপাচাৰ্যগৰাকীয়ে।
এনে প্ৰেক্ষাপটত ননী গোপাল মহন্তক উপাচাৰ্য পদৰ পৰা অব্যাহতি লোৱাৰ পৰামৰ্শ দি হাতে হাতে পত্ৰ প্ৰেৰণ কৰিলে অসম জাতীয়তাবাদী যুৱ-ছাত্ৰ পৰিষদে।
পত্ৰখনত লিখিছে, “অভিনন্দন গ্রহণ কৰিব। ইয়াৰ দ্বাৰা আপোনাক জনাওঁ যে শেহতীয়াভাবে বিভিন্ন পক্ষৰ তৰফৰ পৰা বিভিন্ন ৰাজহুৱা মাধ্যমত আপোনাৰ বিৰুদ্ধে গুৱাহাটী বিশ্ববিদ্যালয়ৰ উপাচার্য হিচাপে ক্ষমতাৰ অপব্যৱহাৰ, নিবিদা আহ্বান নকৰি অনৈতিকভাবে ঐতিহ্যমণ্ডিত গুৱাহাটী বিশ্ববিদ্যালয়ৰ আন্তঃগাঁথনি নির্মাণ, বিশ্ববিদ্যালয়ৰ বিভিন্ন শিতানত ব্যাপক বিত্তীয় অনিয়ম, স্বজনতোষণ আৰু দুর্নীতিৰ ৰাজহুৱা অভিযোগ উত্থাপন হৈছে।”
অসম জাতীয়তাবাদী যুৱ-ছাত্ৰ পৰিষদে লগতে পত্ৰখনত লিখিছে, “আপোনাৰ বিৰুদ্ধে ৰাজহুৱাকৈ কোনো পক্ষই যদি ভিত্তিহীন অভিযোগ উত্থাপন কৰিছে, তেনেহলে আপুনি তেনে পক্ষৰ বিৰুদ্ধে আইনী ব্যৱস্থা গ্রহণ কৰাৰ আপোনাৰ সম্পূৰ্ণ অধিকাৰ আছে। কিন্তু কেৱল মানহানি গোচৰ দিয়াটোৱেই আপোনাৰ শেষ দায়িত্ব হব নোৱাৰে। প্ৰতিটো অভিযোগ ৰাজহুৱাকৈ তথ্য আৰু প্রমাণ সহকাৰে নস্যাৎ কৰাটোও আপোনাৰ নৈতিক কৰ্তব্য আৰু দায়িত্ব। তাৎপর্যপূর্ণ বিষয়টো হ’ল যে আপুনি আপোনাৰ বিৰুদ্ধে উত্থাপিত উপৰোক্ত ভয়াবহ দুর্নীতি আৰু স্বজনতোষণৰ অভিযোগ সমূহ অদ্যপি যুক্তিনিষ্ঠ আৰু প্ৰমাণ সহকাৰে খণ্ডন কৰিব পৰা নাই অথবা আপোনাৰ বিৰুদ্ধে উত্থাপিত অভিযোগ মিছা বা ভিত্তিহীন বুলি প্ৰমাণ কৰিবলৈ আপুনি নিৰপেক্ষ তদন্তৰ আহ্বান জনোৱা নাই। অভিযোগ নস্যাৎ কৰিবলৈ তথ্য প্রমাণ দি ৰাইজক আশ্বস্ত কৰিবলৈ সামান্যতম চেষ্টা কৰাও আমাৰ দৃষ্টিগোচৰ হোৱা নাই। ইয়াৰ পৰিবৰ্তে আপুনি অভিযোগ উত্থাপনকাৰীৰ বিৰুদ্ধে মানহানি গোচৰ তৰিবলৈ আইনগত ব্যবস্থা গ্রহণ কৰাৰ ভাবুকি দি দায়িত্ব সামৰিছে। সেয়া দৰাচলতে মুখ বন্ধ কৰাৰ এক কৌশল বুলি আমি ভাবিবলৈ বাধ্য হৈছোঁ।”
শেষত পত্ৰখনত লিখিছে, “ মহাশয়, আপুনি ক্ষমতাশালী লোক, সেয়া সর্বজনবিদিত। কিন্তু আইনী ব্যৱস্থা গ্ৰহণৰ ভাবুকি দি মুখ বন্ধ কৰাৰ ভাবুকি দিয়াতকৈ অসমৰ ৰাইজে ঐতিহ্যমণ্ডিত গুৱাহাটী বিশ্ববিদ্যালয়ৰ উপাচাৰ্য গৰাকীৰ বিৰুদ্ধে উত্থাপিত অভিযোগ সমূহৰ সঠিক তদন্তৰে প্ৰকৃত সত্য উদ্ঘাটন হোৱাটো কামনা কৰে। গতিকে অসমৰ ৰাইজ আৰু ছাত্ৰ-ছাত্ৰীৰ ওচৰত দায়বদ্ধ এক সংগঠন হিচাপে আমি অসম জাতীয়তাবাদী যুৱ-ছাত্ৰ পৰিষদে আপোনাৰ বিৰুদ্ধে উত্থাপিত ভয়াবহ দুর্নীতি আৰু স্বজনতোষণৰ অভিযোগ সমূহৰ প্ৰকৃত সত্য উন্মোচনৰ বাবে আপুনি সমগ্র বিষয়টোৰ নিৰপেক্ষ তদন্ত আহ্বান কৰি তদন্ত প্রক্রিয়া সম্পূর্ণ নোহোৱা পর্যন্ত নৈতিক দায়িত্ব পালন কৰি উপাচার্য পদৰ পৰা অব্যাহতি গ্রহণ কৰিবলৈ দাবী জনালোঁ। আশা কৰোঁ ঐতিহ্যমণ্ডিত গুৱাহাটী বিশ্ববিদ্যালয়ৰ সোণসেৰীয়া ইতিহাস আৰু বিদ্যায়তনিক দিশৰ গৰিমা ৰক্ষাৰ স্বার্থত বিষয়টোত গুৰুত্ব প্রদান কৰি আৰু নৈতিকতাৰ ওচৰত শিৰনত কৰি কাৰ্যকৰী পদক্ষেপ গ্রহণ কৰিব।”
এই চিঠিখনৰ পিছতেই এতিয়া পোহৰলৈ আহিছে গুৱাহাটী বিশ্ববিদ্যালয়ত ননী গোপাল মহন্তৰ দুৰ্নীতিৰ অভিযোগৰ কথা। অসম জাতীয়তাবাদী যুৱ-ছাত্ৰ পৰিষদৰ আৰু অসমৰ সচেতন ৰাইজে উপাচাৰ্য পদৰ পৰা ননী গোপাল মহন্তৰ অব্যাহতিৰ লগতে বিচাৰিছে এক নিৰপেক্ষ তদন্ত।
