হিন্দু বাংলাদেশীক অসমত নাগৰিকত্ব প্ৰদানৰ বিৰোধিতাত ৰাজ্যত এতিয়াও চলি আছে প্ৰতিবাদ। সোমবাৰে সন্ধিয়া শিৱসাগৰত হিন্দু বাংলাদেশীক নাগৰিকত্ব প্ৰদানৰ বিৰোধিতা কৰি অসম জাতীয়তাবাদী যুৱ ছাত্ৰ পৰিষদে এক জোঁৰ সমদল বাহিৰ কৰে।
সংগঠনটোৰ কেইবা শতাধিক সদস্যই জোঁৰ লৈ বৃহৎ সমদল কৰি নগৰৰ ষ্টেশ্যন চাৰিআলিৰ বৰপুখুৰী হৈ উপায়ুক্তৰ কাৰ্যালয়ৰ সন্মুখেৰে আহি দ’লমুখ চাৰিআলিত সমবেত হয়। প্ৰতিবাদকাৰী সকলে বিজেপি চৰকাৰ মুৰ্দাবাদ, বিজেপি নেতাকৰ্মীক এঘৰীয়া কৰক, হিমন্ত বিশ্ব শৰ্মা মুৰ্দাবাদ, কামাখ্যা প্ৰসাদ তাচা মুৰ্দাবাদ, হিন্দু বাংলাদেশীৰ হৈ ওকালতি নচলিব আদি শ্লোগানেৰে শিৱসাগৰৰ ৰাজ পথ উত্তাল কৰি তোলে।
জোঁৰ সমদলত অংশ লৈ সংগঠনটোৰ কেন্দ্ৰীয় কাৰ্যনিৰ্বাহক সদস্য কুল প্ৰসাদ শইকীয়াই কয় যে, উত্তৰ-পূূবৰ কেইবাখনো ৰাজ্যৰ মুখ্য মন্ত্ৰীয়ে নাগৰিকত্ব সংশোধনী বিধেয়কৰ মুকলি বিৰোধিতা কৰাৰ বিপৰীতে অসমৰ মুখ্য মন্ত্ৰী সৰ্বানন্দ সোণোৱালে কিন্তু এই বিধেয়কখন সমগ্ৰ ভাৰতবৰ্ষৰ বাবে গৃহীত হ’ব বুলি কৈ অসমীয়া জাতিক চূড়ান্তভাৱে প্ৰতাৰণা কৰিছে।
তেওঁ লগতে কয় যে অসমীয়া জাতিৰ অস্তিত্ব ৰক্ষাৰ কথা কোৱা ব্যক্তিয়ে হিন্দু বাংলাদেশীক সংস্থাপন দিব বিচৰাটো অত্যন্ত লজ্জাজনক বিষয়।
আনহাতে সংগঠনটোৰ শিৱসাগৰ জিলাৰ সভাপতি দিব্যজ্যোতি দাস আৰু সাধাৰণ সম্পাদক গৌতম গগৈয়ে মন্ত্ৰী হিমন্ত বিশ্ব শৰ্মা আৰু সাংসদ কামাখ্যা প্ৰসাদ তাচাই হিন্দু বাংলাদেশীৰ পক্ষ লোৱাৰ বাবে তীব্ৰ প্ৰতিক্ৰিয়া প্ৰকাশ কৰে। দুয়োগৰাকী নেতাই ৮৫৫ জন চহিদৰ কেঁচা তেজক অৱমাননা কৰিছ বুলি উল্লেখ কৰে।
মন্ত্ৰী হিমন্ত বিশ্ব শৰ্মাই শেহতীয়াকৈ হিন্দু বাংলাদেশীক সংস্থাপিত কৰি লোকসভা নিৰ্বাচনৰ বৈতৰণী পাৰ হোৱাৰ উদ্দেশ্যে অসমৰ বিভিন্ন ধৰ্মালম্বী লোকৰ মাজত সাম্প্ৰদায়িক সংঘাত বৃদ্ধিৰ বাবে প্ৰৰোচনামূলক বক্তব্য আগবঢ়োৱাতো জাতিটোৰ বাবে ক্ষতিকাৰক বুলিও দুয়োজন নেতাই মন্তব্য কৰে।
