নাগৰিকত্ব সংশোধনী বিধেয়ক ২০১৬ বাতিলৰ দাবীত সমগ্ৰ ৰাজ্য উত্তাল হৈ থকাৰ পাছতো মৌনতা অৱলম্বন কৰা জাতীয় নায়ক তথা মুখ্য মন্ত্ৰী সৰ্বানন্দ সোণোৱালৰ বিৰুদ্ধে জ্বলিছে ক্ষোভৰ জুই।
বিধেয়কখনক লৈ ৰাজ্যৰ ভিন্ন প্ৰান্তত প্ৰতিবাদ চলি থকাৰ সময়তে ১০ জানুৱাৰি বৃহস্পতিবাৰে হাউলীতো জ্বলিল মুখ্য মন্ত্রী সৰ্বানন্দ সোনোৱাল আৰু প্ৰধান মন্ত্রী নৰেন্দ্ৰ মোদীৰ প্ৰতিকৃতি।
অসম জাতীয়তাবাদী যুৱ পৰিষদৰ বৰপেটা জিলা সমিতিৰ উদ্দ্যোগত বৰপেটা জিলাৰ হাউলী চহৰৰ চাৰি আলি চ’কত মুখ্য মন্ত্রী সোণোৱাল আৰু আৰু প্ৰধান মন্ত্রী মোদীৰ প্ৰতিকৃতি দাহ কৰাৰ লগতে অতি শীঘ্ৰে জাতিধ্বংসী বিধেয়কখন বাতিলৰ দাবীত উত্তাল প্ৰতিবাদ সাব্যস্ত কৰে।
প্ৰতিবাদকাৰীসকলে মুখ্য মন্ত্রী মুৰ্দাবাদ, প্ৰধান মন্ত্রী হায় হায়, নাগৰিকত্ব সংশোধনী বিধেয়ক বাতিল কৰক আদি বিভিন্ন শ্লোগানেৰে চহৰখনৰ পৰিবেশ উত্তাল কৰি তোলা পৰিলক্ষিত হয়।
উল্লেখ্যযোগ্য যে বহু চৰ্চিত এই বিধেয়কখনক লৈ প্ৰতিবাদৰ উপৰি ৰাজ্যৰ ৰাজনীতিত হোৱা ব্যাপক পৰিৱৰ্তনৰ পাছতো জাতি-মাটি-ভেটি ৰক্ষাৰ কথা কোৱা মুখ্য মন্ত্ৰী তথা জাতীয় নায়ক সৰ্বানন্দ সোণোৱালে কোনো ধৰণৰ মন্তব্য নকৰা কাৰ্যক বিভিন্ন দল-সংগঠনৰ লগতে সৰ্বসাধাৰণ ৰাইজে একেমুখে গৰিহনা দিছে।