অসম বিধানসভা নিৰ্বাচন, ২০২৬ ৰ ভোট গণনালৈ মাজত মাত্ৰ ১২ ঘণ্টা বাকী থকা অৱস্থাত দেওবাৰে শিৱসাগৰত এক সংবাদ মেল সম্বোধন কৰি ৰাইজৰ দলৰ নেতা অখিল গগৈয়ে এক বিস্ফোৰক অভিযোগ উত্থাপন কৰিছে। বিৰোধী মিত্ৰজোঁটে ৭০ খন আসন লাভ কৰি ৰাজ্যত নতুন চৰকাৰ গঠন কৰিব বুলি দৃঢ়তা প্ৰকাশ কৰাৰ লগতে গগৈয়ে অভিযোগ কৰে যে ভোট গণনাৰ দিনাই তেওঁক হত্যা কৰাৰ বাবে বিজেপি প্ৰাৰ্থী কুশল দুৱৰীয়ে এক ভয়ংকৰ পৰিকল্পনা কৰিছে। সোমবাৰে পুৱা আৰম্ভ হ’বলগীয়া ভোট গণনা প্ৰক্ৰিয়াৰ পূৰ্বে উত্থাপিত এই গুৰুতৰ অভিযোগে ৰাজ্যৰ ৰাজনৈতিক মহলত তীব্ৰ চাঞ্চল্যৰ সৃষ্টি কৰিছে।
সংবাদ মেলত প্ৰতিক্ৰিয়া ব্যক্ত কৰি অখিল গগৈয়ে কয়, “কুশল দুৱৰীয়ে বিভিন্ন ব্যক্তিৰ সন্মুখত মোক গণনাৰ দিনাই গুলীয়াই হত্যা কৰিম বুলি মুকলিকৈ জনাইছে। প্ৰায় দুশ যুৱকৰ হতুৱাই এই হত্যাকাণ্ড সংঘটিত কৰাৰ ভয়ংকৰ পৰিকল্পনা কৰা হৈছে।” তেওঁ দাবী কৰে যে এই ভাবুকিৰ পৰিসৰ কেৱল তেওঁৰ মাজতেই আৱদ্ধ থকা নাই, বৰঞ্চ তেওঁৰ ব্যক্তিগত সচিব অম্লানজ্যোতি গগৈকো একেদৰেই প্ৰাণে মৰাৰ হুংকাৰ দিয়া হৈছে। বিৰোধী মিত্ৰজোঁটৰ সম্ভাৱ্য বিজয়ত শংকিত হৈয়েই বিৰোধী পক্ষই এনেধৰণৰ কূটাঘাতমূলক কাৰ্যপন্থা হাতত লোৱা বুলি তেওঁ সন্দেহ প্ৰকাশ কৰে।
নিজৰ আৰু সতীৰ্থসকলৰ নিৰাপত্তাক লৈ গভীৰ উদ্বেগ প্ৰকাশ কৰি অখিল গগৈয়ে ৰাজ্যৰ আৰক্ষী প্ৰশাসনৰ ভূমিকাৰ ওপৰতো প্ৰশ্ন উত্থাপন কৰিছে। তেওঁ জানিবলৈ দিয়ে যে এই গুৰুতৰ বিষয়টো সন্দৰ্ভত অসম আৰক্ষীৰ সঞ্চালক প্ৰধানৰ লগতে বিশেষ শাখাৰ সঞ্চালক প্ৰধানক ইতিমধ্যে সবিশেষ অৱগত কৰা হৈছিল। পিছে প্ৰশাসনৰ ফালৰ পৰা বৰ্তমানলৈকে কোনো সুদুত্তৰ লাভ নকৰা বুলি তেওঁ আক্ষেপ প্ৰকাশ কৰে। আৰক্ষীৰ এনে নীৰৱতাই নিৰ্বাচনী প্ৰক্ৰিয়াৰ নিৰাপত্তাজনিত দিশটোক লৈও প্ৰশ্নবোধক চিনৰ সৃষ্টি কৰিছে বুলি তেওঁ মন্তব্য কৰে।সোমবাৰে সমগ্ৰ ৰাজ্যজুৰি নিৰ্বাচনৰ ফলাফল ঘোষণাৰ বাবে প্ৰশাসনে ভোট গণনা কেন্দ্ৰসমূহত নিৰাপত্তা ব্যৱস্থা কটকটীয়া কৰিছে। অখিল গগৈয়ে উত্থাপন কৰা এই গুৰুতৰ অভিযোগৰ সত্যসত্যতা আৰু ইয়াৰ পৰৱৰ্তী প্ৰশাসনিক পদক্ষেপৰ বিষয়ে এতিয়ালৈকে কোনো আনুষ্ঠানিক বিবৃতি প্ৰকাশ পোৱা নাই।
