ৰাজ্যৰ বিদ্যালয়সমূহত গুণোৎসৱ চলি থকা সময়তে গুণোৎসৱ সন্দৰ্ভত এক বিস্ফোৰক মন্তব্য আগবঢ়াইছে বিধায়ক অখিল গগৈয়ে। অখিল গগৈৰ মতে গুণোৎসৱে আচলতে অসমৰ শিক্ষাব্যবস্থাৰ বিশেষ মৌলিক পৰিবৰ্ত্তন ঘটাব নোৱাৰে।
আজি বিশ্বনাথৰ বিহালী সমষ্টিৰ ১৫ নং ৰাষ্ট্ৰীয় ঘাইপথত বিহালী ছাত্ৰ মুক্তি সংগ্ৰাম সমিতিৰ নেতাৰ সৈতে ক্ষন্তেক সময় মত বিনিময় কৰা সময়ত সাংবাদিকৰ আগত ৰাইজৰ দল তথা শিৱসাগৰৰ বিধায়ক অখিল গগৈয়ে গুণোৎসৱৰ সন্দৰ্ভত এই দৰে বিস্ফোৰক মন্তব্য কৰে।
অখিল গগৈয়ে কয়, ‘’মোৰ নিজৰ সমষ্টিতে দেখিছো বেছিভাগ বিদ্যালয়তে বৰষুণত পানী পৰে, যিখন বিদ্যালয়ৰ বিল্ডিং ভঙা, সেইবোৰ বিদ্যালয়ত গুণোৎসৱ পতিলে কিবা লাভ হব জানো। বহু বিদ্যালয়ত ছাত্ৰ-ছাত্ৰীৰ তুলনাত শিক্ষকৰ অভাব। বিজেপি চৰকাৰৰ দিনত চৰকাৰী বিদ্যালয়সমূহৰ শিক্ষা ব্যবস্থাটো উন্নত কৰাৰ বিপৰীতে এফালৰ পৰা চৰকাৰী বিদ্যালয়বোৰ বন্ধ কৰিবলৈ গৈ আছে।‘’
তেওঁ লগতে কয়, ‘’হিমন্ত বিশ্ব শৰ্মা চৰকাৰ অথবা হিমন্ত বিশ্ব শৰ্মা শিক্ষামন্ত্ৰীৰ দায়িত্বত থকা সময়তে অসমৰ আটাইতকৈ বেছি চৰকাৰী বিদ্যালয় বন্ধ হৈছে।‘’