অখিল গগৈ চিণ্ডিকেটৰ নায়ক নহয় মহানায়ক আৰু তেওঁ খেতিয়ক আৰু মেহনতী মানুহৰ পৰাও কমিছন খায়, অভিযোগ ছাত্ৰ মুক্তি সংগ্ৰাম সমিতিৰ পৰা একেটা ওলোটা খৰতে বিজেপিত যোগ দিয়া হিৰণ্য পাথৰিৰ।
চিণ্ডিকেট প্ৰসংগৰ লগতে নিতি আয়োগৰ শেহতীয়া প্ৰতিবেদন দাঙি ধৰি সোমবাৰে অখিল গগৈয়ে সোণোৱাল চৰকাৰক সমালোচনা কৰাৰ পিছতে মঙলবাৰে গুৱাহাটীত সংবাদমেলযোগে পাথৰিয়ে এই অভিযোগ কৰিছে।
পাথৰিৰ অভিযোগ, পাৱাৰগ্ৰিডৰ বিৰুদ্ধে আন্দোলনত সাধাৰণ ৰাইজৰ পৰা কৃষক মুক্তি নেতা গগৈয়ে বৃহৎ পৰিমাণৰ ধন আত্মসাৎ কৰিছিল। তাৎপৰ্য্যপূৰ্ণভাৱে পাথৰি সেই আন্দোলনৰ সময়ত অখিল গগৈ নেতৃত্বাধীন কৃষক মুক্তিৰ ভগ্নী সংগঠন ছাত্ৰ মুক্তি সংগ্ৰাম সমিতিৰ বিত্ত সম্পাদক আছিল।
“অখিল গগৈয়ে সাধাৰণ খেতিয়ক তথা খাতি খোৱা মানুহৰ পৰাও কমিছন লয়। প্ৰফুল্ল ডেকা, অমৃত ডেকা, হৰেশ্বৰ পাটোৱাৰী, ভোলা মহন্তকে ধৰি অন্যান্য বহুতৰে পৰা ধন লৈছিল। পাৱাৰগ্ৰিড কৰ্প’ৰেশ্বনৰ বিৰুদ্ধে কিছুদিন পূৰ্বে ৰাজপথত ডাঙৰ ডাঙৰ আন্দোলন কৰিছিল। পাৱাৰগ্ৰিড নিৰ্মাণৰ ফলত ক্ষতিগ্ৰস্ত ৰাইজৰ কিছুসংখ্যকে ৮ লাখ, ৬ লাখ টকাকৈ পাবলগীয়া আছিল। অখিল গগৈয়ে এই ধন মোকলাই দিম বুলি আশ্বাস দিছিল আৰু ক্ষতিগ্ৰস্ত ৰাইজৰ পৰা পাঁচ, দহ হাজাৰ টকাকৈ ধন তুলিছিল। এনেকৈয়ে অখিল গগৈয়ে ক্ষতিগ্ৰস্ত হাজাৰ হাজাৰ ৰাইজৰ পৰা ১০-১৫ কোটি টকা সংগ্ৰহ কৰিছিল। এতিয়া তেওঁ পাৱাৰগ্ৰিডৰ বিৰুদ্ধে মাত নামাতে,” পাথৰিৰ মন্তব্য।
লগতে পঢ়ক– বিজেপিত যোগ দিয়ক, নগদ ৬০ হাজাৰ টকাকৈ লওক!
অহা দহ দিনৰ ভিতৰত অখিল গগৈয়ে কাৰ কাৰ পৰা ধন লৈছিল তাৰ তালিকা তেওঁ ৰাজহুৱা কৰিব বুলিও সদৰী কৰে।
আনহাতে সোণোৱাল চৰকাৰ অহাৰ পিছত চিণ্ডিকেট বন্ধ হৈ যোৱা বাবে অখিল গগৈয়ে কংগ্ৰেছৰ দিনৰে পৰা পাই অহা চিণ্ডিকেটৰ ধনৰ ভাগ বন্ধ হোৱা বুলিও তেওঁ মন্তব্য কৰে।
“অখিল গগৈ চিণ্ডিকেটৰ মহানায়ক। তেওঁ চিণ্ডিকেটৰ নায়কতকৈয়ো ওপৰত। কংগ্ৰেছৰ দিনত চিণ্ডিকেটৰ পৰা আটাইতকৈ বেছি কমিছন লাভ কৰি থকা মানুহজনেই আছিল অখিল গগৈ। কংগ্ৰেছৰ দিনত অখিল গগৈয়ে চিণ্ডিকেটৰ পৰা লাখ লাখ টকা লাভ কৰিছিল। গোলাঘাটৰ বাবলু খান চুপাৰি ব্যৱসায়ৰ সৈতে জৰিত। তেওঁ কংগ্ৰেছ চৰকাৰৰ দিনৰে পৰা চুপাৰি ব্যৱসায় কৰি আহিছিল। কংগ্ৰেছৰ দিনত চুপাৰি চিণ্ডিকেটৰ বিৰুদ্ধে অখিল গগৈয়ে মাত মতা নাছিল। বাবলু খানৰ পৰা আটাইতকৈ বেছি কমিছন পাই আছিল অখিল গগৈয়ে। সৰ্বানন্দ সোণোৱাল যেতিয়া অসমৰ মুখ্য মন্ত্ৰী হ’ল, তেতিয়াই চিণ্ডিকেটৰ বিৰুদ্ধে সবল স্থিতি গ্ৰহণ কৰিলে। তেতিয়াই চিণ্ডিকেটৰ পৰা অখিল গগৈয়ে পাই থকা কমিছন বন্ধ হৈ গ’ল,” পাথৰিয়ে কয়।
পাথৰিয়ে অসমত এতিয়া কোনো চিণ্ডিকেট চলি থকা নাই বুলি দাবী কৰে।
পাথৰিৰ অভিযোগ সন্দৰ্ভত নৰ্থ ইষ্ট নাও-এ অখিল গগৈৰ মন্তব্য লোৱাৰ চেষ্টা কৰিছিল। কিন্তু বহুবাৰ চেষ্টা কৰাৰ পিছতো তেওঁ ফ’ন ধৰা নাই।
নাগৰিকত্ব বিধেয়ক বিৰোধিতাৰে মন্ত্ৰী হিমন্ত বিশ্ব শৰ্মাক ক’লা পতাকা দেখুৱাওঁতে ৰঙিয়া আৰক্ষীয়ে মৃত্যুৰ ভাবুকি দিয়া বুলি অভিযোগ তুলি পাথৰি বাতৰিৰ শিৰোনামলৈ আহিছিল।
সেই ঘটনাৰ মাত্ৰ কিছুদিন পিছতেই লোকসভা নিৰ্বাচনৰ পূৰ্বে পাথৰিসহিতে বহুকেইজন বিধেয়কবিৰোধী আন্দোলনকাৰীয়ে গেৰুৱা দলটোত যোগ দিছিল।
